ކުޅުފުއްދުށީގެ އެއާޕޯޓަށް ޓެސްޓް ފްލައިޓް ޖައްސައިފި
އެއާޕޯޓުގެ މަސައްކަތް އެއްކޮށް ނިމިފައެއް ނުވޭ
ކުޅުދުއްފުށީގެ އެއާޕޯޓަށް ޖެއްސި ޓެސްޓް ފްލައިޓަށް މަރުހަބާ ކިޔުމުގެ ހަރަކާތުގެ ތެރެއިން
ހދ. ކުޅުދުއްފުށީގެ ކުޅިން ބައެއް ހިއްކައިގެން ތަރައްގީ ކުރަމުންދާ އެއާޕޯޓުގެ ރަންވޭއަށް ޓެސްޓް ފްލައިޓް ޖައްސައިފިއެވެ.
ކުޅުދުއްފުށީ އެއާޕޯޓުގެ ރަންވޭއަށް ފްލައިޓް ޖައްސާފައި ވަނީ ރަންވޭގެ މަސައްކަތް ނިމުނުތާ ތިން ދުވަސް ފަހުންނެވެ. ރަންވޭގެ މަސައްކަތް ނިންމައި ޓެސްޓް ފްލައިޓް ޖައްސާފައި ވަނީ ކުޅުދުއްފުށީ އެއާޕޯޓުގެ ޓަރމިނަލް ވެސް އަޅައި ނުނިމެނީސްއެވެ.
ބުދަ ދުވަހު ކުޅުދުއްފުށީގެ އެއާޕޯޓަށް ޖެއްސި ޓެސްޓް ފްލައިޓުގައި ޓޫރިޒަމް މިނިސްޓަރު މޫސާ ޒަމީރާއި ބަންޑާރަ ނައިބު މުހައްމަދު އަނިލް އެ ރަށަށް ވަޑައިގެންނެވިއެވެ. އެ ބޭފުޅުންނަށް މަރުހަބާ ދެންނެވީ ކުޅުފުއްފުށީ ދެކުނު ދާއިރާގެ މެމްބަރު މުހައްމަދު ނަޝީދުއެވެ.
ކުޅުދުއްފުށީގެ އެއާޕޯޓު އެޅުމަށް އެ ރަށުގެ ކުޅިން 30 ޕަސެންޓް ވަނީ ހިއްކާފައެވެ. ކުޅި ހިއްކުމުގެ މަސައްކަތް ފަށައި، އެއާޕޯޓު ތަރައްގީ ކުރުމުގެ މަޝްރޫއު ފަށާފައި ވަނީ މިދިޔަ އަަހަރުގެ ނޮވެމްބަރު މަހުއެވެ.
ސަރުކާރުން އެމްޓީސީސީއާ ކުޅުދުއްފުށީގެ އެއާޕޯޓްގެ މަޝްރޫއު ހަވާލުކޮށްފައި ވަނީ 53.4 މިލިއަން ރުފިޔާ އަށެވެ. ނަމަވެސް އެއާޕޯޓް އެޅުމަށްޓަކާ ބިން ހިއްކުމާއި ރަންވޭގެ މަސައްކަތާއި ޓަރމިނަލް އެޅުމާއި އަލިފާން ނިއްވާ އާލާތްތައް ހަރުކުރުމަށް އެއާޕޯޓުގެ މަޝްރޫއަށް 113 މިލިއަން ރުފިޔާ ހަރަދުވެއެވެ.
