މިމަހުގެ 23 ގައި ބާއްވާ ރިޔާސީ އިންތިހާބުގެ ވޯޓުގެ ނަތީޖާ ވޯޓުލާ މަރުކަޒުން އިޢުލާނު ކުރުމުގެ ކުރިން ނަތީޖާ ޓެބްލެޓުން އިލެކްޝަން ކޮމިޝަނަށް އަންގަން ޖެހޭނެކަމަށް ދެކެވޭ ވާހަކަތައް ސާފުކޮށްދިނުމަށް އެދި ވިމެން އެންޑް ޑިމޮކްރަސީ އިން އިލެކްޝަންސް ކޮމިޝަން (އީސީ) އަށް ސިޓީއެއް ފޮނުވައިފިއެވެ.

އީސީއަށް ފޮނުވި އެ ސިޓީގައި ބުނީ ރިޔާސީ އިންތިހާބުގެ ވޯޓުގެ ނަތީޖާ ވޯޓުލާ މަރުކަޒުން އިޢުލާނު ކުރުމުގެ ކުރިން ވޯޓުގެ ނަތީޖާ އީސީއަށް އެނގޭނެ ގޮތެއް އޮވެގެންނުވާނެކަމަށެވެ. އަދި ނަތީޖާ އިޢުލާނުކުރުމުގައި ޓެބްލެޓް ބޭނުން ނުކުރާނެކަމަށް އެކޮމިޝަނުން ކުރިން ބުނެފައިވީ ނަމަވެސް ރިޔާސީ އިންތިހާބުގައި ވޯޓު ގުނުމަށްފަހު ވަގުތުން ނަތީޖާ އިއުލާނު ކުރުމުގެ ކުރިން ވޯޓުގެ ނަތީޖާ މުވާސަލާތީ ވަސީލަތަކަށް (ޓެބްލެޓަށް) އެންޓަރ ކުރުމަށް އީސީން އޮފިޝަލުންނަށް އަންގާފައިވާކަމުގެ މަޢުލޫމަތާ ފެތުރެމުންދާކަމަށާއި އެކަމާއި ގުޅިގެން ވޯޓު ގުނުމުގެ ކަންކަން ހިނގަމުންދާނީ އިންސާފުވެރިކޮށް ކަމާމެދު ގިނަ ފަރާތްތަކުން ސުވާލު އުފައްދަމުންދާކަމަށެވެ.

ވިމެން އެންޑް ޑިމޮކްރަސީ ގެ އެސިޓީގައި އިތުރަށް ބުނީ، އިންތިހާބާ ބެހޭ ޢާންމު ޤާނޫނުގެ 57 ވަނަ މާއްދާގެ (ހ) އާއި، އެ ޤާނޫނުގެ 55 ވަނަ މާއްދާގެ (ށ)ގައި ބުނެފައިވާ ގޮތުގެ މަތިން އެ މަރުކަޒެއްގެ ނަތީޖާ ޝީޓުގައި އެ މާއްދާގައި ބުނެފައިވާ ފަރާތްތައް ސޮއިކުރުމަށްފަހު، އެ މަރުކަޒުގެ ވަގުތީ ނަތީޖާ ވަގުތުން އެ މަރުކަޒުގައި އިޢުލާނުކުރަންވާނެ ކަމަށް ބަޔާންކޮށްފައިވުމާއި އަދި އެ މާއްދާގެ (ށ)ގައި އިއުލާނު ކުރުމާއެކު ލަސްނުކޮށް މައިމަރުކަޒަށް ނަތީޖާ ފޮނުވަންވާނެކަމަށް ބަޔާންކޮށްފައިވާތީ، ވޯޓު ގުނައި އިޢުލާންކޮށް ނިމުމަށްފަހު މެނުވީ އީސީގެ މައި މަރުކަޒަށް ވޯޓުގެ ނަތީޖާ ފޮނުވުމަކީ ނުވަތަ އެއްވެސް ގޮތަކުން އެ ނަތީޖާގެ އެއްވެސް މަޢުލޫމަތެއް އީސީއަށް އެނގުމަކީ ޤާނޫނާ ޚިލާފުކަމެއްކަން ސާފުކޮށް އެނގެން އެބައޮތްކަމަށެވެ. އެހެންކަމުން ވޯޓު ގުނާ އިއުލާނު ކުރުމުގެ ކުރިން ވޯޓުގެ ނަތީޖާ މުވާސަލާތީ ވަސީލަތަކަށް އެންޓާކުރުމަކީ ޤާނޫނާއި ހިލާފުކަމެއްކަމަށާއި އެއާ ހިލާފަށް އަމަލުކޮށްފިނަމަ އީސީއަށް ވޯޓުގެ ނަތީޖާ ބަދަލުކުރުމުގެ ފުރުސަތު ލިބި، ނަތީޖާ އިންސާފުވެރިވާނެކަމާއި މެދު ގިނަ ބަޔަކު ސުވާލު އުފައްދާނެކަމަށް އެސިޓީގައި ބުނެއެވެ.

މީގެއިތުރުން އެސިޓީގައި ވަނީ، ގާނޫނުއަސާސީގެ 170 ވަނަ މާއްދާގެ (ހ)ގެ ދަށުން އިންތިހާބުގެ ކަންތައްތައް ހިނގަމުންދަނީ އިންސާފުވެރިކަމާއި ތަޅާފޮޅުމެއް ނެތި، އެއްވެސް ނުފޫޒެއްނެތި މިނިވަންކަމާއެކު ކަށަވަރުކޮށްދިނުމަކީ އިލެކްޝަން ކޮމިޝަންގެ މަސްއޫލިއްޔަތެއް ކަމަށެވެ. އެހެންކަމުން، ވޯޓު ގުނާ ނިންމައި ވަގުތުން އިއުލާނު ކުރެއްވުމަށްފަހު ނޫނީ މުވާސަލާތީ އެއްވެސް ވަސީލަތަކަށް ވޯޓުގެ ނަތިޖާ އެންޓާކުރުމަށް ހަމަޖެހިފައި ނުވާކަމުގެ ޔަޤީންކަން ރައްޔިތުންނަށް އީސީން ދޭންޖެހޭކަމަށް ވިމެން އެންޑް ޑިމޮކްރަސީގެ ސިޓީގައި ފާހަގަކޮށށްފައި ވެއެވެ.