އިބޫއަށް ތާއީދު ހޯދުމަށް މެލޭޝިޔާގައި ކުޅިވަރު ހަރަކާތްތަކެއް ފަށައިފި
16 ސެޕްޓެމްބަރު 2018 | އާދީއްތަ 07:09މެލޭޝިއާގައި ދިރިއުޅޭ ދިވެހި ކިޔަވާކުދިން ބައިވެރިވާ ފުޓްސަލް އަދި ބަށި މުބާރާތެއް ވަނީ ފަށާފައި
އިބޫއަށް ތާއީދު ހޯދުމުގެ ގޮތުން މެލޭޝިއާގައި ކުޅޭ ފުޓްސަލް މުބާރާތުގެ ތެރެއިން.
ގުޅިފައިވާ ސިޔާސީ ޕާޓީތަކުގެ ރިޔާސީ ކެންޑިޑޭޓް އިބްރާހިމް މުހައްމަދު ޞާލިޙާއި ރަނިންމޭޓް ފައިސަލް ނަސީމަށް ތާއީދު ހޯދުމަށް މެލޭޝިޔާގައި ކުޅިވަރު ހަރަކާތްތަކެއް ފަށައިފި އެވެ.
އިބޫއަށް ތާއީދު ހޯދުމަށް ހިންގާ ކެމްޕޭން ހަރަކާތްތަކުގެ ތެރެއިން "ޖަޒީރާ ގޭމްސް" ގެ ނަމުގައި އާދިއްތަ ދުވަހު މެލޭޝިއާގައި ދިރިއުޅޭ ދިވެހި ކިޔަވާކުދިން ބައިވެރިވާ ފުޓްސަލް މުބާރާތަކާއި ބަށި މުބާރާތެއް ވަނީ ފަށާފައެވެ.
ސަންވޭ އެކްސްޓްރީމް ޕާކްގައި ކުރިއަށްދާ މި ފުޓްސަލް މުބާރާތުގައި ފިރިހެން 12 ޓީމާއި އަންހެން 3 ޓީމް ބައިވެރި ވެއެވެ.
އަދި ބަށި މުބާރާތުގައި ޖުމްލަ އަންހެން 4 ޓީމުން ބައިވެރިވެއެވެ.
އިބޫއަށް ތާއީދު ހޯދުމަށް މެލޭޝިޔާގައި ދަނީ ކެމްޕޭން ތަފާތު ގިނަ ހަރަކާތްތައް ހިންގަމުންނެވެ. އެގޮތުން ޕްލޭސްޓޭޝަން ގޭމް މުބާރާތެއްވެސް ބާއްވައި ވަނަތަކަށް ހޮވުނު ފަރާތްތަކަށް ވަނީ އިނާމްދީފައެވެ.
ގުޅިފައިވާ ސިޔާސީ ޕާޓީ ތަކުގެ ރިޔާސީ ކެންޑިޑޭޓްގެ ރަނިންމޭޓް ފައިސަލް ނަސީމާއި ކެމްޕޭން ޓީމުން ވަނީ މިދިޔަ ހުކުރު ދުވަހު މެލޭޝިޔާއަށް ވަޑައިގެން މެލޭޝިޔާގައި ދިރިއުޅޭ ދިވެހިންނާއި ކިޔަވާކުދިންނާއި ބައްދަލު ކުރައްވައި ހުރި ކަންބޮޑުވުންތައް އޮޅުންފިލުވާފައެވެ.
