ގާފަރުގެ ބިން ހިއްކުމުގެ ވައުދާއެކު ގިނަ ވައުުދުތަކެއް
15 ސެޕްޓެމްބަރު 2018 | ހޮނިހިރު 17:23ސިއްހީ މަރުކަޒު އަޕްގްރޭޑް ކުރައްވާނެ ކަމަށް ވިދާޅުވި
އިއްތިހާދުގެ ކެންޑިޑޭޓް އިބްރާހިމް މުހައްމަދު ސޯލިހް، ގާފަރުން އެމަނިކުފާނަށް ވަނީ ހޫނު މަރުހަބާއެއް ކިޔާފައި
ކ. ގާފަރުގެ ބިން ހިއްކުމުގެ ވައުދާއެކު އެރަށުގެ ރައްޔިތުން އެދުނު ގިނަ ކަންތައްތަކެއް ކޮށްދިނުމަށް އިއްތިހާދުގެ ކެންޑިޑޭޓް އިބްރާހިމް މުހައްމަދު ސޯލިހު ވައުދުވެވަޑައިގެންފި އެވެ.
ހޮނިހިރު ދުވަހު ގާފަރަށް ވަޑައިގެން އެރަށުގައި ތިބި ސަޕޯޓަރުންނާ ބައްދަލު ކުރައްވައި އެމަނިކުފާނު ވަނީ އެމްޑީޕީގެ ސަރުކާރުގައި އެރަށަށް ކޮށްދިނުމަށް ނިންމާފައިވާ ކަންކަން ހަގީގަތަކަށް ހައްދަވާ ދެއްވާނެ ކަމަށް ވިދާޅުވެފަ އެވެ. އަދި އިތުރު ވައުދުތައް އެމަނިކުފާނު ވެވަޑައިގެންނެވި އެވެ.
ގިނަ އަދަދެއްގެ މަސްވެރިން އުޅެމުންދާ ގާފަރުގައި އައިސްޕްލާންޓެއް ބަހައްޓާ ދެއްވާނެ ކަމަށް އެމަނިކުފާނު ވިދާޅުވި އެވެ. އަދި ގާފަރުގައި ދޯނިއެހިލަން ޒަމާނީ ތަނެއް ހައްދާ ދެއްވަން ވެސް ވައުދުވެވަޑައިގެންފަ އެވެ.
ގާފަރުގެ ބަނދަރު ސަރައްދު ގައި ގިނަ ބަޔަކު އިބޫއަށް މަރުަހަބާ ކިޔުމަށް ނިކުމެ:-އެ ރަށަށް ގިނަ ވައުދުތަކެއް އިބޫ ވެވަޑައިގެންނެވި
ރަށުގައި ނަރުދަމާ އާއި ފެނުގެ ނިޒާމް އެމަނިކުފާނުގެ ވެރިކަމުގައި ގާއިމުކޮށްދެއްވާނެ ކަމަށްވެސް ވިދާޅުވި އެވެ. ރަށުގެ ސިއްހީ މަރުކަޒު އަޕްގްރޭޑްކޮށް ސިއްހީ މަރުކަޒުގައި ލެބޯޓްރީއެއް ގާއިމުކޮށް ސިއްހީ މަރުކަޒުގެ ހިދުމަތް މިހާރަށް ވުރެ ރަނގަޅު ކުރައްވާނެ ކަމަށް ވިދާޅުވި އެވެ.
ގާފަރުގެ މަސްދޯންޏެއްގައި އެރަށުގެ ބަޔަކާއެކު އިބޫ ފޮޓޯއަކަށް ހުއްޓި:- މަސްވެރިންގެ ކަންބޮޑުވުންތަކަށް ހައްލު ހޯދާ ދެއްވާނެ ކަމަށް ވިދާޅުވި
ސްކޫލުގެ ޖާގައަށް ދިމާވެފައިވާ މައްސަލައަށް ހައްލު ލިބެން އޮތީ ރަށުގެ ސިއްޙީ މަރުކަޒު ހުރިތަނުން އެހެން ތަނަކަށް ބަދަލުކޮށް ސިއްހީ މަރުކަޒު ހުރި ބިން ސްކޫލާ ގުޅުވާލުން ކަމަށްވާނަމަ އެކަން ކުރުމަށް ވެސް ފުރުސަތު ދެއްވާނެ ކަމަށް ވިދާޅުވި އެވެ
.ގާފަރަށް އިބޫ ވެވަޑައިގެންނެވި ބައެއް ވައުދުތައް:
- ބިން ހިއްކުން
- ބޯޓު އެހިލާތަނެއް އާޅާދިނުން
- ފެން ޕްލާންޓެއް އެޅުން
- ފެނާއި ނަރުދަމާގެ ނިޒާމް ގާއިމުކޮށްދިނުން
- ސިއްހީ މަރުކަޒު އަޕްގްރޭޑްކުރުން
- ސްކޫލުގެ ޖާގަ ބޮޑުކޮށްދިނުން
އިބޫގެ ރަނިމޭޓް ފައިސަލް ނަސީމް ތަމްސީލްކުރައްވާ ގާފަރުގައި ހުންނަވައިގެން ފައިސަލްގެ އިހްލާސްތެރި މަސައްކަތަށް އިބޫ ވަނީ ތައުރީފު ކުރައްވާފަ އެވެ.
