ވެލާނާ އިންޓަރނޭޝަނަލް އެއަރޕޯޓްގައި އަލަށް ހެދި ރަންވޭގައި އޮޅިގެން އެއަރ އިންޑިއާގެ މަތިންދާބޯޓެއް ޖައްސައިފިއެވެ. 

އައު ރަންވޭގައި ޖައްސާފައިވަނީ ހުކުރު ދުވަހުގެ ހަވީރު 3:20 ހާއިރު ޓްރިވެންޑްރަމްއިން މާލެއަށް އައި އެއަރ އިންޑިއާ ފްލައިޓް އޭ.އައި. 263 އެވެ. މި ފްލައިޓް ޓްރިވެންޑްރަމްއިން މާލެ އައުމުގެ ކުރިން ޓްރިވެންޑްރަމްއަށް ގޮސްފައިވަނީ އިންޑިއާގެ ވެރިރަށް ނިއުދިއްލީއިންނެވެ. 

މަތިންދާބޯޓު އައު ރަންވޭގައި ޖެއްސިކަމަށް ބުނާ ފޮޓޯތައް ސޯޝަލް މީޑިއާގައި ވަނީ އާއްމުވެފައެވެ. އެއަރ އިންޑިއާގެ އެ ފްލައިޓަކީ އެއަރބަސް އޭ 320 މަރުކާގެ މަތިންދާބޯޓެކެވެ. 

މިޙާދިސާގައި މަތިންދާބޯޓަށް ލިބުނީ ކިހާ ވަރެއްގެ ގެއްލުމެއްކަމެއް އަދި ސާފެއް ނޫނެވެ. އެހެންނަމަވެސް މަތިންދާބޯޓުގެ ފަހަތު ލޭންޑިންގ ގިއަރގައި ސަތަރިގަނޑެއް އޮޅިފައިވާ މަންޒަރު ފޮޓޯތަކުން ފެނެއެވެ. އަދި އެއަރޕޯޓުގެ ފަޔަރ އެންޑް ރެސްކިއު ވެހިކަލެއް މަތިންދާބޯޓު ކައިރީގައި އޮތްތަންވެސް ފޮޓޯތަކުން ފެނެއެވެ. 

މިހާދިސާއާއި ގުޅޭ ގޮތުން އެއަރޕޯރޓްސް ކޮމްޕެނީގެ ބަހެއް ލިބޭ ގޮތް ވަނީ ނުވެފައެވެ.