ގަވަރުނަރު ނަސީރުގެ ސޮޔާއެކު އާ ނޫޓުތައް ބާޒާރަށް ނެރެފި

ގަވަރުނަރު އަހުމަދު ނަސީރު ސޮއެ ކުރައްވާފައިވާ 10ރ އަދި 100ރ ގެ ނޫޓު ދައުރުކުރެވެމުންދާ ފައިސާއާއިއެކު ބޭނުންކުރުމަށް ބާޒާރަށް ނެރެފިއެވެ.

އަލުން ޗާޕުކުރަން ޖެހޭ ވަރަށް ސްޓޮކް ހުސްވުމުން، ޗާޕުކޮށްގެން ގެނެސް 5 ޖުލައިގައި ދައުލަތުގެ ޚަޒާނާގައި ރައްކާކޮށްފައިވާ 10ރ އަދި 100ރ ގެ ނޫޓުތައް ދައުރުކުރުމަށް ނެރުމަށް ހަމަޖެހިފައިވާކަމަށް، މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން މީގެ ކުރިން ވަނީ ބުނެފައެވެ. ގަވަރުނަރު އަހުމަދު ނަސީރު ސޮއެކުރައްވާ ނެރުއްވާފައިވާ ނޫޓުތަކުގައި ޖަހާފައިވާ ތާރީޚަކީ 10 މާރޗް 2018 (22 ޖުމާދަލްއާޚިރާ 1439) އެވެ.

އަލަށް ނެރޭ ނޫޓުތަކާއިއެކު ކުރީގެ ގަވަރުނަރު އަޒީމާ އާދަމް ސޮއެކުރައްވާފައިވާ ނޫޓުތައްވެސް ދައުރު ކުރަމުންދާނެއެވެ.

މިނިވަން ފަންސާހާއި ދިމާކޮށް އަލަށް ނެރުނު ނޫޓު ސީރީޒްގައި ފުރަތަމަ ސޮއެ ކުރައްވާފައިވަނީ އޭރު ގަވަރުނަރަކަށް ހުންނެވި އަޒީމާއެވެ.