ފިތުނައިގެ އަސްލަކަށް މިސްކިތުގެ އިމާމުން ވެގެންނުވާނެ: މިނިސްޓަރު ބާގިރު
2 ސެޕްޓެމްބަރު 2018 | އާދީއްތަ 11:28ފުލުހުން ފޮނުވައިގެން އަސުރު ނަމާދު ކުރުވަން ޖެހުނު
އިސްލާމިކް މިނިސްޓަރު ބާގިރާއި ރައީސް ޔާމީންގެ ކެންޑިޑޭޓް ޑރ ޝަހީމް ބައްދަލުކޮށްލައްވަނީ
ފިތުނައިގެ އަސްލަަކަށް މިސްކިތްތަކުގެ އިމާމުންވެގެން ނުވާނެ ކަމަށް އިސްލާމިކް މިނިސްޓަރު ޑރ. އަހުމަދު ޒިޔާދު ބާގިރު މިއަދު ވިދާޅުވެއްޖެއެވެ.
މިނިސްޓަރު ޒިޔާދު އެހެން ވިދާޅުވީ އިމާމުންނާއި ހާތިމުން ތަމްރީންކުރުމުގެ މަހާސިންތާ ހުޅުވައިދިނުމަށް ބޭއްވި ރަސްމިއްޔާތުގައި ވާހަކަ ދައްކަވަމުންނެވެ.
ޒިޔާދު ވިދާޅުވީ ބައެއް އިމާމުންގެެ ފަރާތުން ފެންނަމުންދާ ނޭދެވޭ ކަންތައްތަކުގެެ ސަބަބުން މިސްކިތްތަކަށް ވަންނަ މީހުންގެ އަދަދު މަދުވަމުންދާ ކަމަށެވެ.
އިމާމުންގެ ސަބަބުން މިސްކިތްތަކަށް އަރާ މީހުން މަދުވާ ކަމަށް މިނިސްޓަތރު ވިދާޅުވިޔަސް އެހެން ވިދާޅުވި ސީދާ ސަބަބެއް އަދި އެފަދަ ހާލެއްގެ ތަފްސީލެއް ދެއްވާފައެެއްނުވެއެވެ.
މިނިސްޓަރު ވިދާޅުވީ ދާދިފަހުން ރާއްޖޭގެ ރަށެއްގައި ފުލުހުން ފޮނުވައިގެން ހަވީރު 5:30 ގެ ފަހުން އަޞްރު ނަމާދު ކުރަންޖެހުމަކީ ހިތާމަހުރި ކަމެއް ކަމަށެވެ. ނަމަވެސް އެކަމުގެ ތަފްސީލެއްވެސް މިނިސްޓަރު ހާމަކުރައްވާފައެއް ނުވެއެވެ.
މީގެ އިތުރުން މިނިސްޓަރު ވިދާޅުވީ ދީނީ ހުކުމްތަކާމެދު އިމާމުންގެ ވިސްނުން އެ ދަރަޖައަށް ދާނަމަ އެއީ ވަރަށް ބޮޑު މައްސަލައެއް ކަމަށެވެ. އަދި އެފަދަ ފަރާތްތަކަކީ އިމާމުކަމުގެ ކުފޫ ހަމަވާ މީހުންނޫން ކަމަށް ޑރ. ޒިޔާދު ވިދާޅުވި އެވެ.
މިނިސްޓަރު ވިދާޅުވި ގޮތުގައި ދީނީ ކުދިކުދި މައްސަލަތައް ބޮޑެތި މައްސަލަތަކަށް ހަދައި، މިސްކިތްތަކުގެ އިމާމުންނާއި މިސްކިތްތަކަށް ދާ މީހުންނާ ތަޅާފޮޅާ ހިސާބަށް ގޮސް، ގައުމީ ދިފާއި ޚިދުމަތްތަކުން އެ ދެމެދަށް ވަންނަން ޖެހުމަކީ ބޮޑު މައްސަލައެކެވެ.
