ކ. މާލެ
|
30 އޯގަސްޓް 2018 | ބުރާސްފަތި 17:23
ސިނަމާލެ ބްރިޖް - ބްރިޖްގެ މަސައްކަތްތަކުގެ ޝުކުރު ރައީސް ނަޝީދުއަށް ދޭންޖެހޭކަމަށް އަދީބް ވިދާޅުވި
ސިނަމާލެ ބްރިޖް - ބްރިޖްގެ މަސައްކަތްތަކުގެ ޝުކުރު ރައީސް ނަޝީދުއަށް ދޭންޖެހޭކަމަށް އަދީބް ވިދާޅުވި
ޓްވިޓަރ
ސިނަމާލެ ބްރިޖް
ރައީސް ޔާމީން އުޅުއްވީ ޑޮލަރު ގުނުމުގައި، ބްރިޖްގެ ވައުދު މެނިފެސްޓޯގައި ހިމެނީ ރައީސް މައުމޫންްގެ އެދުމުގެ މަތިން އަޅުގަނޑު: އަދީބް
 
ބްރިޖް ހުޅުވާފައި އަރުވާ ހަވާގެ އަޑަކީ އަންނަން އުޅޭ އިންޤިލާބުގެ އަޑު
 
ބުރިޖު އެޅުމުގެ ވިސްނުމަކީ ރައީސް އިބްރާހީމް ނާސިރުގެ ދައުރުން ފެށިގެން އޮތް ވިސްނުމެއް
 
އިކޮނޮމިކް ކައުންސިލްގެ ބައްދަލުވުންތައް އަހަރެއްގެ ތެރޭގައި 172 ފަހަރު ބޭއްވުނުއިރު އެންމެ ބައްދަލުވުމެއްގައިވެސް ރައީސް ޔާމީން ބައިވެރިވެވަޑައިނުގަންނަވާ

ބްރިޖްގެ މަސައްކަތް ފެށުމަށް ތައްޔާރުވަމުން ދިޔައިރު ރައީސް އަބްދުﷲ ޔާމީން އުޅުއްވީ ޑޮލަރު ގުނުއްވުމުގައި ކަމަށާއި، މެނިފެސްޓޯގައި ބްރިޖްގެ ވައުދު ހިމެނުއްވީ ރައީސް މައުމޫން އަބްދުލްޤައްޔޫމްގެ އެދިވަޑައިގެންނެވުމުގެ މަތިން ކަމަށް ކުރީގެ ނައިބް ރައީސް އަހުމަދު އަދީބް ވިދާޅުވެއްޖެއެވެ.

ސެޕްޓެމްބަރު މަހުގެ 7 ވަނަ ދުވަހު ސިނަމާލެ ބްރިޖް އާންމު ދަތުރުތަކަށް ހުޅުުވާލާއިރު، އަދީބްގެ ފަރާތުން ވަކީލުން އާންމުކުރެއްވި ބަޔާނެއްގައި ބުނީ، މިއަދު ދިވެހިރާއްޖޭގައި ހެދެމުންދާ ރިސޯޓުތަކާއި، އަދި ނިމިފައިވާ ގިނަ ޕްރޮޖެކްޓްތަކުގެ މަސައްކަތަކީ ސީދާ އަދީބްގެ މަސައްކަތްތަކެއް ކަމަށާއި، "ރައީސް ޔާމީން އުޅުއްވީ ޑޮލަރު ޗެކް މާރުކުރުމާއި، ފައިސާ ގުނުއްވުމުގައި" ކަމަށެވެ. އަދި އިކޮނޮމިކް ކައުންސިލްގެ ބައްދަލުވުންތައް އަހަރެއްގެ ތެރޭގައި 172 ފަހަރު ބޭއްވުނުއިރު އެންމެ ބައްދަލުވުމެއްގައިވެސް ރައީސް ޔާމީން ބައިވެރިވެވަޑައި ނުގަންނަވާ ކަމަށާއި، އެއިން ބައްދަލުވުމެއް ބާއްވާއިރު އެ މާލަމަށް ބޯދިއްކޮށްލައްވާފައިވެސް ނުވާ ކަމަށެވެ.

އަދީބްގެ ބަޔާނުގައި ވަނީ މާލެއާއި ހުޅުލެއާ ދެމެދު ބުރިޖު އެޅުމުގެ ވިސްނުމަކީ ރައީސް އިބްރާހީމް ނާސިރުގެ ދައުރުން ފެށިގެން އޮތް ވިސްނުމެއް ކަމަށާއި، ރައީސް މައުމޫން "މޫންބޭ މެރީނާ" ނަމުގައި ބުރިޖް އެޅުމަށްޓަކައި ކުރަންޖެހޭ މަސައްކަތްތައް އެމަނިކުފާނުގެ ދައުރުގެ ފަހުކޮޅުގައި ކުރައްވާފައިވާކަން ފާހަގަކުރައްވާފައެވެ. އަދި އެ ބުރިޖްގެ އިންޖިނައަރިންގ އާއި، އޮޕްޝަންސްތަކުގެ އިތުރުން ތިލަފުށި، ވިލިމާލެ، ހުޅުމާލެއާއި ބުރިޖުން ގުޅުވާލަން ހަދާފައިވާ ޕްލޭންތައް ހުރީ ރައީސް މުޙައްމަދު ނަޝީދުގެ ވެރިކަމުގައި ފުރިހަމަކޮށްފައި ކަމަށާއި، ރައީސް ވަޙީދުގެ ސަރުކާރުގައި ޗައިނާއަށް ކުރެއްވި ދަތުރުފުޅުތަކުގައި ޗައިނާ ސަރުކާރާއެކު ބުރިޖުގެ ވާހަކަތައް ދެކެވި، ޗައިނާ ސަރުކާރާއި، ޗައިނާގެ އެކްސްޕާޓުންގެ ރުހުން އޭރު އެކަމަށް ލިބިފައިވާކަމަށް އަދީބްގެ ބަޔާނުގައިވެއެވެ.

ރައީސް ވަޙީދުގެ ވެރިކަމުގައި، އެ ސަރުކާރުންނާއި، އޭގެ ކުރީ ސަރުކާރުތަކުން ކޮށްފައިވާ މަސައްކަތްތައް ދެކިވަޑައިގަތްކަން ފާހަގަކޮށް އަދީބްގެ ބަޔާނުގައި ބުނެފައިވަނީ އެ މަޢުލޫމާތުތަކުގެ އަލީގައި، ބުރިޖް އެޅުމުގެ ޕްރޮޖެކްޓް، 2013 ގެ ރިޔާސީ ވައުދެއްގެ ގޮތުގައި މެނިފެސްޓޯގައި ހިމެނުއްވީ ރައީސް މައުމޫންގެ ލަފާފުޅުގެ މަތީން ސީދާ އަދީބް ކަމަށެވެ. އަދި ރައީސް ޔާމީން ބުރިޖް ކަންތައް ނެންގެވީ ވޯޓު ހޯދުމަށްޓަކައި، ރިސޯޓު މުވައްޒަފުންނަށް ޙިއްސާ ދެއްވާނެ ކަމަށް ވިދާލުވެ ވެލެއްވި ވަޢުދު ފަދަ ވައުދެއްގެ ގޮތުގައި ކަމަށް އަދީބް ގެ ބަޔާނުގައި ވެއެވެ. އޭގެއިތުރުން ބުރިޖުގެ ޢަމަލީ މަސައްކަތް ފުރިހަމަކުރަން ފެށުމާ ހަމައަށްވެސް، ބުރިޖު އެޅިދާނޭ ކަމަށް ރައީސް ޔާމީން ޤަބޫލުފުޅު ނުކުރައްވާ ކަމަށާއި ބުރިޖުގެ ވިސްނުން، ޤާސިމް އިބްރާހީމް 2008 ގެ ކެމްޕެއިން ވައުދެއްގެ ގޮތުގައި ހުށަހެޅުއްވުމުން، އެއީ ނުވާނޭކަމެއްކަމަށް ޢާންމުކޮށް ވިދާޅުވެ ރައީސް ޔާމީން އޭރުވެސް އެކަމަށް ހަޖޫޖައްސަވާފައިވާކަން އަދީބްގެ ބަޔާނުގައި ފާހަގަކުރައްވާފައިވެއެވެ.

ޗައިނާ ސަރުކާރާއެކު ބުރިޖުގެ މަޝްވަރާތައް ކުރަމުން ގެންދިޔައިރު، ދެ ފަހަރެއްގެ މަތީން ރައީސް ޔާމީން އެ މަޝްވަރާތައް ހުއްޓުވައި، ރައީސް ޔާމީން ބޭނުންފުޅުވާ، ވަރަށް އާދައިގެ ކުންފުންޏަކާ ޕްރޮޖެކްޓް ޙަވާލުކުރުމަށް ނިންމާފައިވާކަމަށް އަދީބްގެ ބަޔާނުގައި ވެއެވެ. ނަމަވެސް ދޫ ނުދެއްވައި، ރައީސް ޔާމީންއާ ޒުވާބުކުރައްވައި، ޕްރޮޖެކްޓްގެ ކަންކަން ކުރިއަށް ގެންދިއުމަށް ކޮންޓްރެކްޓަރަކު ކަނޑައެޅުން ޗައިނާ ސަރުކާރާ ޙަވާލުކުރެއްވިކަމަށްވެސް އަދީބް ވިދާޅުވިއެވެ.

"ފިނިފެންމާ ލޯންޗު ޑުރާމާއަށްފަހު، އެ ކަމަކީ ރައީސް ޔާމީން އަވަހާރަކޮށްލުމަށް އަޅުުގަނޑު ދިން ހަމަލާއަކަށް ހަދައި، އެކަން އަޅުގަނޑުގެ ބޮލުގައި އެޅުވުމަށް ހުރިހާ މަސައްކަތްތަކެއް ކުރަމުންދިޔަ ވަގުތުވެސް، ޗައިނާ ސަރުކާރުން ދީފައިވާ ދައުވަތަށް ޗައިނާގެ ރައީސްއާ ބައްދަލުކުރަން ދިޔައީ ސީދާ އަޅުގަނޑެވެ. އަޅުގަނޑުގެ ސަލާމަތަށްޓަކައި އެވަގުތަށް އެ ދަތުރު ކެންސަލްއެއް ނުކުރަމެވެ. އަޅުގަނޑު އިސްކުރީ އަޅުގަނޑުގެ ޤައުމީ ވާޖިބެވެ. އެ ދަތުރު ނިންމައި، އަޅުގަނޑު ރާއްޖެއައީ ބުރިޖާއި، އެއަރޕޯޓު މަޝްރޫޢުގެ ހުރިހާ ކަމެއް ހަމަޖައްސައި ނިންމާފައެވެ." އަދީބް ބަޔާނުގައި ވިދާޅުވެފައިވެއެވެ.

އަދީބް ވިދާޅުވީ އެހެން މީހުން ކުރާ ކަންކަމުގެ މެޑެލްޖަހަން ރައީސް ޔާމީން ލަދުގަންނަންޖެހޭނެ ކަމަށެވެ. އަދި ރައީސް ޔާމީން މި ސަރުކާރުގައި ރިބަންކެނޑި ޕްރޮޖެކްޓްތަކާއި، ޑޮމެސްޓިކް އެއަރޕޯޓުތަކަކީވެސް ރައީސް ނަޝީދާއި، ރައީސް ވަޙީދުގެ މަސައްކަތްޕުޅުތައް ކަމަށާއި، ލ. ބޮޑު މަގާއި، އައްޑޫ އެއަރޕޯޓާއި، އެފަދަ އެތައް މަސައްކަތްތަކަކީވެސް ރައީސް ޔާމީނާއި ބެހޭ މަސައްކަތްތަކެއް ނޫން ކަމަށް އަދީބްގެ ބަޔާނުގައި ވެއެވެ.

ބުރިޖް ހުޅުވާއިރު އެ ބުރިޖުގެ ޙަޤީޤީ ޝުކުރާއި، ތައުރީފް ރައީސް މައުމޫނާއި، ރައީސް ނަޝީދާއި، ރައީސް ވަޙީދަށް ނިސްބަތްކުރެވޭކަމަށް އަދީބް ވިދާޅުވިއެވެ.

މިރޭ ބުރިޖް ހުޅުވާއިރު ދިވެހިރައްޔިތުންނަށް އަޅުގަނޑު ދަންނަވާލަން ބޭނުންވަނީ އެ ބުރިޖުގެ ޙަޤީޤީ ޝުކުރާއި، ތައުރީފް ރައީސް މައުމޫނާއި، ރައީސް ނަޝީދާއި، ރައީސް ވަޙީދަށް ނިސްބަތްކުރުމަށެވެ. މި ޕްރޮޖެކްޓުގައި ރައީސް ޔާމީން އުޅުއްވީ ބުރިޖުގެ އަގު މާ ބޮޑުތަނުން ބޮޑުކޮށްލައިގެން ޖީބަށް އެއްޗެއް ލެވޭތޯއެވެ. މި ބުރިޖު އެޅުމުގެ މަސައްކަތްތަކުގައި ބައިވެރިވި ދިވެހި ހުރިހާ ކޮންސަލްޓެންޓުންނަށާއި، ހައުސިންގ މިނިސްޓަރ މުއިއްޒުއަށާއި، ފިޝަރީޒް މިނިސްޓަރު ޝައިނީއަށް އަޅުގަނޑު ޝުކުރު ދަންނަވެމެވެ.

އަދީބް ވިދާޅުވީ ބުރިޖަކީ ރައީސް ޔާމީންއަށް ވޯޓެއް ދޭންޖެހޭ ސަބަބެއް ނޫން ކަމަށާއި، މިއީ ޗައިނާގެ ރައްޔިތުންނާއި، ޗައިނާގެ ސަރުކާރުން ދިވެހިރާއްޖޭގައި ކޮށްފައިވާ އެ ޤައުމުގެ އިންވެސްޓްމަންޓެއް ކަމަށެވެ. އަދި މި ބުރިޖާ ގުޅުވައި، ހަނދާންކުރަންޖެހެނީ މި ބުރިޖު އެޅިފައިމިވަނީ އެމަނިކުފާނު ޖަލަށްލުމުގެ ކުރިން ވެފައިވާ އެއްބަސްވުމުގެ ބޭރުން ބޭކާރު އެތައް ޚަރަދެއް ފަހުންކޮށް، އިސްރާފް ބޮޑުކޮށް ކަމަށް އެ ބަޔާނުގައި ވެއެވެ.

"މިރޭ، ހަވާއަރުވައި، ބުރިޖް ހުޅުވާއިރު، އަޅުގަނޑުވެސް ބުރިޖުގެ އަރިމަތީގައި މިއޮތް ދޫނިދޫގައި ސިމެންތި އައްޓެއް މަތީ އޮތްކަން ދިވެހިރައްޔިތުން ހަނދާކުރުމަކީ އަޅުގަނޑުގެ އިލްތިމާސެކެވެ. އަޅުގަނޑުގެ ބަލިހާލަށް ނުބަލައި، ބޭސްފަރުވާގެ ޙައްޤު ހިފަހައްޓައިގެން ދެމުން ގެންދާ އަނިޔާގައިވެސް އަޅުގަނޑު މިހުރީ ދެގޮތެއްނުވެ ދިވެހި ރައްޔިތުންނާއެކުގައެވެ. އިރާދަކުރެއްވިއްޔާ މި ރިޔާސީ އިންތިޚާބުގައި ރައީސް ޔާމީން ބަލިކޮށް، އަނިޔާ ލިބެމުން ގެންދާ ހުރިހާ ބޭފުޅުން ސަލާމަތްކުރުމުގައި ކުރަންޖެހުނު ކޮންމެ ކަމެއް ދިވެހިރައްޔިތުންނާއި، ސިޔާސީ ލީޑަރުން ކުރައްވާނޭކަމަށް އަޅުގަނޑު ޔަޤީންކުރަމެވެ. އަޅުގަނޑު މިރޭ ހޭދަކުރާނީ ހަވާ އަރުވާ މަންޒަރު ނުފެނުނު ނަމަވެސް އެ އަޑު އެހުމުގައެވެ. އެއީ އަންނަންއުޅޭ ހެޔޮ އިންޤިލާބުގެ އަޑު ކަމުގައި ދެކިގެންނެވެ."

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: އިސްމާއިލް ނާއިލް ނަޝީދު
6%
15%
6%
6%
6%
61%
ކޮމެންޓް
30 އޯގަސްޓް 2018 | ބުރާސްފަތި 14:05
ސަފީރު
ތިބުރިޖްވެސް އަދި ތަރައްޤީގެ އެހެންކަންތައް ވެސް ކުރަން ދައުލަތަށް އާއްމްދަނީ އިތުރުވެގެން ދިޔައީ ރައީސް ނަޝީދު ނަންގަވަން ފެއްޓެވި ޓެކުސް އިން ކަމީ ދެބަސްވެވެންނެތް ޙަޤީޤަތެކެވެ.. އެކަމް އެދުވަހު ބަޔަކު ނުކުމެ "ހަނާވަނީ ފަނާވަނީއޭ" ކިޔާފަ އެމަނިކުފާނުގެ ވެރިކަން ވައްޓާލީ މިފަދަ އެތަކެއް ބުރިޖެއް މިދިވެހިރާއްޖެއިން ފެންނާނެކަން ޔަޤީންވީމާ ކެތްނުކުރެވިގެންކަމީ ޤަބޫލުކުރެއްވިޔަސް ނުކުރެއްވިޔަސް ދެބަސްވެވެންނެތް ޙަޤީޤަތެކެވެ.