ރާއްޖެއަށް އެތެރެވާ ބިދޭސީންނަށް ދޫކުރާ ބިޒްނަސް ވިސާގެ މުއްދަތު އިތުރުކޮށްފިއެވެ.
މޯލްޑިވްސް އިމިގްރޭޝަނުން ބުދަ ދުވަހު ކުރި އިއުލާނެއްގައި ބުނެފައި ވަނީ ބިޒްނަސް ވީޒާގައި އެތެރެވުމަށް ހުއްދަދޫކުރެވޭ ފަރާތްތަކަށް، އެ ހުއްދަ ދޫކުރެވޭ ދުވަހުން ފެށިގެން ރާއްޖެ އެތެރެވުމަށް ދެވިފައިވާ މުއްދަތު، 15 ދުވަހުގެ ބަދަލުގައި 30 ދުވަހުގެ މުއްދަތަށް އިތުރު ކުރެވިފައިވާ ކަމަށެވެ.
ރާއްޖެއަށް އެތެރެވުމުގައި މިފަހުން ކޮންމެވެސް ވަރެއްގެ ދަތިތަކެއް ބޭރުގެ ބައެއް ފަރާތްތަކުންނާއި ވިސާއަށް އެދޭ ދިވެހި ބައެއް ފަރާތްތަކުން ފާހަގަކޮށްފައި ވެއެވެ.
އެގޮތުން މި އަހަރުގެ ފެބްރުއަރީ މަހުން ފެށިގެން އިންޑިއާގެ ރައްޔިތުންނަށް ވޯކްޕާމިޓް އަދި ބިޒިނަސް ވިސާއަށް އެފަރާތުން އެކި ފަހަރު މަތިން އެދިފައިވީ ނަމަވެސް، ފަސް، ހަ މަސް، ފާއިތު ވެގެން ދިޔައިރުވެސް އެއިން އެއްވެސް އެޕްލިކޭޝަނަކަށް ވޯކްޕާމިޓް އަދި ބިޒިނަސް ވިސާވެސް ދޫކޮށްފައި ނުވާ ކަން ބައެއް ފަރާތްތަކުން "ރާއްޖެއެމްވީ"އަށް މީގެކުރިން ވަނީ މައުލޫމާތު ދީފައެވެ.
މީގެ ތެރެއިން ބައެއް ފަރާތްތަކުގެ ބިޒްނަސް ވިސާ އަށް އެދި ތަކުރާރުކޮށް އެތައް ފަހަރަކު ހުށަހަޅާ މުއްދަތު ހަމަވުމުން އަނެއްކާވެސް ހުށަހަޅަމުން ގެންދާކަންވެސް އެފަރާތްތަކުން މީގެކުރިން ފާހަގަކޮށްފައި ވެއެެވެ.
