އިބޫ އާއި ރައީސް ނަޝީދު ބައިވެރިވަޑައިގަންނަވާ ޖަލްސާއެއް ލަންކާގައި މިއަދު ބާއްވަނީ

އެމްޑީޕީގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިހު (އިބޫ) އާއި ކުރީގެ ރައީސް މުހައްމަދު ނަޝީދު ބައިވެރިވަޑައިގަންނަވާ ޖަލްސާއެއް ގުޅިފައިވާ ސިޔާސީ ޕާޓީތަކުން މިއަދު ލަންކާގައި ބާއްވަން ވަނީ ހަމަޖެހިފައެވެ.

ސެޕްޓެމްބަރު 23 ގައި ބާއްވާ ރިޔާސީ އިންތިހާބަށް ތާއިދު ހޯއްދެވުމަށް އިބޫ ލަންކާ އަށް ކުރައްވާ ކެމްޕެއިން ދަތުރުފުޅުގައި ބާއްވާ މި ޖަލްސާ އޮންނާނީ މިއަދު ހަވީރު 5:00 ގައި ބަރްޖަޔާ ހޮޓަލްގައެވެ. މި ޖަލްސާގައި ލަންކާގައި ދިރިއުޅޭ ގިނަ އަދަދެއްގެ ދިވެހިން ބައިވެރިވާއިރު، ރާއްޖެޓީވީން ވަގުތުން ގެނެސް ދިނުމަށް ވަނީ ހަމަޖެހިފައެވެ.

މި ޖަލްސާ ވެގެންދާނީ އެމްޑީޕީގެ ރިޔާސީ ކެންޑިޑޭޓަކަށް އެޕާޓީގެ ކޮންގްރެސް އިން އިބޫ އިންތިހާބު ކުރެއްވި ފަހުން ރައީސް ނަޝީދާ އެކު ބައިވެރިވަޑައިގަންނަވާ ފުރަތަ ޖަލްސާއަށެވެ. މި ޖަލްސާގައި އެމްޑީޕީގެ ޗެއާޕާސަން ހަސަން ލަތީފާއި، އެޕާޓީގެ ނާއިބު ރައީސް މުހައްމަދު ޝިފާޒާއި، ޖުމްހޫރީ ޕާޓީގެ ނާއިބު ލީޑަރ ޑރ. ހުސެއިން ރަޝީދާއި، އަދާލާތު ޕާޓީގެ ނާއިބު ރައީސް އަލީ ޒާހިރުގެ އިތުރުން ރައީސް މައުމޫންގެ އަރުހުގައި މަސައްކަތްކުރައްވާ އައިމިނަތު ނާދިރާ ބައިވެރިވަޑައިގަންނަވާނެވެ. އަދި ކުރީގެ ފޮރިން މިނިސްޓަރު އަހްމަދު ނަސީމް (ކެރަފާ ނަސީމް) އާއި ލަންކާގެ ކެމްޕެއިން ކޯޑިނޭޓަރ ރައްޔިތުންގެ މަޖިލީހުގެ ކުރީގެ މެމްބަރު މުހައްމަދު ތޯރިގް ބައިވެރިވަޑައިގަންނަވާނެވެ.

މިއަދު ބާއްވާ ޖަލްސާގެ ތައްޔާރީތައް ކުރިއަށް ދަނީ

ލަންކާގައި ބާއްވާ ބޮޑު ޖަލްސާގައި އިބޫ އާއި ރައީސް ނަޝީދު ވާހަކަފުޅު ދެއްކެވުމަށް ވަނީ ހަމަޖެހިފައެވެ.

އިބޫއާ އެކު ގުޅިފައިވާ ސިޔާސީ ޕާޓީތަކުގެ ވަފުދުގައި ހިމެނިބވަޑައިގަންނަވާ ބޭފުޅުން ލަންކާއަށް އާދީއްތަ ދުވަހުގެ ރޭ ވަޑައިގެންނެވުމުން ލަންކާ އެއާޕޯޓުން އިބޫ އަށް މަރުހަބާ ވިދާޅުވީ ކުރީގެ ފޮރިން މިނިސްޓަރު އަހްމަދު ނަސީމް (ކެރަފާ ނަސީމް) އާއި އެމްޑީޕީގެ އިންޓަނޭޝަލް ސްޕޯކްސްޕާސަން ހާމިދު އަބްދުލްޣަފޫރެވެ. ރައީސް ނަޝީދު ވަނީ އިބޫ އާއި ގުޅިފައިވާ ސިޔާސީ ޕާޓީތަކުގެ އިސްވެރިންނާ ބައްދަލުކުރައްވާ މަރުޙަބާ ދަންނަވާފައެވެ.