އިބޫ އާއި ރައީސް ނަޝީދު ބައްދަލުކުރައްވައިފި

ގުޅިފައިވާ ސިޔާސީ ޕާޓީތަކުގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިހު (އިބޫ)، ކުރީގެ ރައީސް މުހައްމަދު ނަޝީދާ ސްރީ ލަންކާގައި ބައްދަލުކުރައްވައިފިއެވެ.

ސެޕްޓެމްބަރު 23 ގައި ބާއްވާ ރިޔާސީ އިންތިހާބަށް ތާއިދު ހޯއްދެވުމަށް އިބޫ ލަންކާގައި ތިބި ދިވެހިންނާ ބައްދަލު ކުރެއްވުމަށް ކުރައްވާ ދަތުރުފުޅުގައި ލަންކާ އެއާޕޯޓުން އިބޫ އަށް މަރުހަބާ ވިދާޅުވީ ކުރީގެ ފޮރިން މިނިސްޓަރު އަހްމަދު ނަސީމް (ކެރަފާ ނަސީމް) އެމްޑީޕީގެ އިންޓަނޭޝަލް ސްޕޯކްސްޕާސަން ހާމިދު އަބްދުލްޣަފޫރު އެވެ. އެއްފަހު ގުޅިފައިވާ ސިޔާސީ ޕާޓީތަކުގެ އިސްވެރިންނާއި އެކު އިބޫ ވަޑައިގެންނެވީ ރައީސް ނަޝީދުގެ އަރިހަށެވެ.

Advertisement

މިއީ އެމްޑީޕީގެ ރިޔާސީ ކެންޑިޑޭޓަކަށް އެޕާޓީގެ ކޮންގްރެސް އިން އިބޫ އިންތިހާބު ކުރެއްވި ފަހުން ރައީސް ނަޝީދާ ބައްދަލުކުރެއްވި ފުރަތަމަ ފަހަރެއެވެ. ގުޅިފައިވާ ސިޔާސީ ޕާޓީތަކުގެ ފަރާތުން މި ދަތުރުފުޅުގައި އެމްޑީޕީގެ ޗެއާޕާސަން ހަސަން ލަތީފާއި، އެޕާޓީގެ ނައިބް ރައީސް މުހައްމަދު ޝިފާޒާއި، ޖުމްހޫރީ ޕާޓީގެ ނައިބް ލީޑަރ ޑރ ހުސެއިން ރަޝީދާއި، އަދާލާތު ޕާޓީގެ ނައިބް ރައީސް އަލީ ޒާހިރުގެ އިތުރުން ރައީސް މައުމޫންގެ އިރުހުގައި މަސައްކަތްފުޅު ކުރައްވާ އައިމިނަތު ނާދިރާ ބައިވެރިވަޑައިގަންނަވާއިރު، ރައީސް ނަޝީދު ވަނީ ވަފުދުގައި ހިމެނިވަޑައިގަންނަވާ ހުރިހާ ބޭފުޅުނަން މަރުޙަބާ ދަންނަވާ ބައްދަލުކުރައްވާފައެވެ.

ލަންކާގައި ދިރިއުޅޭ ދިވެހިންނާ، ރައީސް ނަޝީދާ އިބޫ ހޯމަ ދުވަހު ބައްދަލުކުރައްވާނެ

މި ދަތުރުފުޅުގައި އިބޫ އާއި ރައީސް ނަޝީދު، ލަންކާގައި ދިރިއުޅޭ ދިވެހިންނާ ބައްދަލުކުރައްވާނީ ހޯމަ ދުވަހުގެ ހަވީރު އެވެ.

ކޯލިޝަންގެ ފަރާތުން ސްރީ ލަންކާގައި ހަރަކާތްތެރިވާ ކެމްޕޭން ކޯޑިނޭޓަރ މުހައްމަދު ތޯރިގު ވިދާޅުވީ ހޯމަ ދުވަހުގެ ހަވީރު 05:00 އިން ފެށިގެން ރޭގަނޑު 08:00 އަށްބަރްޖާޔާ ހޮޓެލްގައި އިބޫ އާއި ނަޝީދު، ލަންކާގައި ދިރިއުޅޭ ރައްޔިތުންނާއި ބައްދަލުކުރަން ހަމަޖެހިފައިވާ ކަމަށެވެ. އޭނާ ވިދާޅުވީ އެ ބައްދަލު ކުރެއްވުމަކީ ހުޅުވާލެވިގެން ބާއްވާ ބައްދަލުކުރެއްވުމެއް ކަމަށާއި ކޮންމެ މީހަކަށްވެސް ވަދެވޭނެ ކަމަށެވެ.