ވަގަށް ނެގި ފައިސާ ހޯދުމުގެ ތައްޔާރީތައް ހަސަން ލަތީފާ ހަވާލު ކުރަން ފާސްކޮށްފި
26 އޯގަސްޓު 2018 | އާދީއްތަ 08:34ހިޔާނަތުގެ ތަފްސީލު ހާމަކުރަން މުއައްސަސާތަކަށް އިބޫ ގޮވާލެއްވި
އެމްޑީޕީގެ 165 ވަނަ ގައުމީ މަޖިލީހުގެ ބައްދަލުވުން: ސަރުކާރުން ވަގަށް ނަގާފައިވާ ފައިސާ ހޯދަން ގަރާރެއް ވަނީ ފާސްކޮށްފައި
ރައީސް އަބްދުﷲ ޔާމީންގެ ވެރިކަމުގައި ވަގަށް ނަގާފައިވާ ކަމަށް ތުހުމަތު ކުރެވޭ ދައުލަތުގެ ފައިސާ އާއި މުދާ، ގުޅިފައިވާ ޕާޓީތަކުގެ ވެރިކަމެއްގައި ހޯދުމަށް ކުރަންޖެހޭ މަސައްކަތަށް އެހީތެރިވުމުގެ ގޮތުން ކުރަންޖެހޭ ފަންނީ މަސައްކަތް އެމްޑީޕީގެ ޗެއާޕާސަން ހަސަން ލަތީފާ ހަވާލު ކުރުމަށް އެމްޑީޕީގެ ގައުމީ މަޖިލީހުން ފާސްކޮށްފިއެވެ.
އެމްޑީޕީ ގައުމީ މަޖިލީހުގެ 52 މެމްބަރުންނާ އެކު ސެންޓަރަލް ހޮޓެލްގައި ބޭއްވި ބައްދަލުވުމުގައި އެގޮތަށް ފާސްކޮށްފައި ވަނީ އެ ޕާޓީގެ ނައިބު ރައީސް މުހައްމަދު ޝިފާޒު ހުށަހެޅުއްވި ގަރާރާ އެކުގައެވެ.
އިބޫގެ ވެރިކަމުގެ ފުރަތަމަ ދުވަހު ކުރަން ނިންމާފައިވާ ތިން ކަންތައްތަކުގެ ތެރޭގައި ދައުލަތަށް ގެއްލުނު ފައިސާ އަބުރާ ހޯދަން ނިންމާފައި ވާތީ، އެކަން ކުރުމަށް އެހީތެރިވެދިނުމުގެ ގޮތުން ފަންނީ ތަޖުރިބާކާރުން ހޯދައި، ވާންޖެހޭ ތައްޔާރީތައްވުމުގެ މަސައްކަތް ހަސަން ލަތީފާ ހަވާލު ކުރުމަށް ހުށަހެޅި ގަރާރު ފާސްކޮށްފައި ވަނީ ވޯޓުގައި ބައިވެރިވެވަޑައިގެންނެވި 52 މެމްބަރުންގެ އިއްތިފާގުންނެވެ.
ޝިފާޒު ގަރާރުގައި ބުނެފައި ވަނީ ގުޅިފައިވާ ޕާޓީތަކުގެ ވެރިކަމެއްގައި ރައީސް ޔާމީންގެ ސަރުކާރުން ވަގަށް ނެގި ކަމަށް ތުހުމަތު ކުރާ ފައިސާ ދައުލަތަށް އަބުރާ ހޯދައި، ރައްޔިތުންގެ މަންފާއަށާއި ލާބައަށް ބޭނުން ކުރުމަށް ނިންމާފައިވާ ކަމަށެވެ.
އެމްޑީޕީ ގައުމީ މަޖިލީހުގައި އިބޫ ވާހަކަފުޅު ދައްކަވަނީ-- ފޮޓޯ/ މުހައްމަދު ޝަރުހާން
"އިބޫ ހުވާ ކުރެއްވުމަށްފަހު، އެމަނިކުފާނުގެ ބަންޑާރަ ނައިބު އައްޔަން ކުރައްވާއިރަށް، އަޅުގަނޑާ ހަވާލު ކުރެއްވި މަސައްކަތްކޮށް ނިންމުން. އިރާދަ ކުރެއްވިއްޔާ އަޅުގަނޑު އެކަން ކުރާނަން،" ގާނޫނީ ވަކީލުކަން ވެސް ކުރައްވާ ހަސަން ވިދާޅުވިއެވެ.
ގަރާރަށް ވާހަކަފުޅު ދައްކަވަމުން ގައުމީ މަޖިލީހުގައި ބައިވެރިވެވަޑައިގެންނެވި ގުޅިފައިވާ ޕާޓީތަކުގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިހު (އިބޫ) ގޮވާލައްވާފައި ވަނީ ސަރުކާރުން ހިންގާފައިވާ ކޮރަޕްޝަންގެ ތަފްސީލު ދައުލަތުގެ މުއައްސަސާތަކުން އާންމު ކުރެއްވުމަށެވެ. އެގޮތުން ރައީސް އަބްދުﷲ ޔާމީން ހިންގެވި ކަމަށް ބުނާ ހިޔާނާތުގެ ތަފްސީލު އެންޓި ކޮރަޕްޝަންސް ކޮމިޝަން (އޭސީސީ) އާއި އޮޑިޓަރ ޖެނަރަލްގެ އޮފީހުން ހޯދާފައިވާ ކަމަށާއި އެކަމުގެ ތަފްސީލު އެ މުއައްސަސާތަކުން އާންމު ކުރެއްވުމަށް އިބޫ ވަނީ އެދިވަޑައިގެންފައެވެ.
އެމްޑީޕީ ގައުމީ މަޖިލީހުގައި ބައިވެރިވި ގިނަ މެމްބަރުން ވަނީ ޝިފާޒު ހުށަހެޅުއްވި ގަރާރަށް ތާއިދު ކުރައްވައި ވާހަކަފުޅު ދައްކަވާފައެވެ. އަދި ސަރުކާރުން ހިންގާފައިވާ ކޮރަޕްޝަންގެ އަމަލުތައް ކުށްވެރިކޮށް ވާހަކަފުޅު ދައްކަވާފައެވެ.
ހެންވޭރު އުތުރު ދާއިރާގެ މެމްބަރު އަބްދުﷲ ޝާހިދު ވާހަކަފުޅު ދައްކަވަނީ-- ފޮޓޯ/ މުހައްމަދު ޝަރުހާން
އަންނަ މަހު 23ގައި ބާއްވާ ރިޔާސީ އިންތިހާބު ގުޅިފައިވާ ޕާޓީތަކުން ކާމިޔާބުކޮށް، އިބޫ ވެރިކަމާ ހަވާލުވާ ދުވަހު ހިޔާނާތުގެ ފައިސާ ހޯދުމުގެ އަމަލީ މަސައްކަތް ފަށަންޖެހޭ މިންވަރަށް، ކަންކަން ރާވާފައި ބޭއްވުމަށް ބާރު އަޅައި މެމްބަރުން ވަނީ ވާހަކަފުޅު ދައްކަވާފައެވެ.
ހިޔާނާތުގެ ފައިސާ ހޯދުމުގެ އިތުރުން އިބޫގެ ވެރިކަމުގެ ފުރަތަމަ ދުވަހު ކުރަން ނިންމާފައި ވަނީ ހައްޔަރުކޮށްފައިވާ ސިޔާސީ ލީޑަރުން މިނިވަން ކުރުމާއި ޕީޕީއެމްގެ ސަރުކާރުގައި ހިނގާފައިވާ މަރުތަކުގެ ހަގީގަތް ހޯދުމުގެ މަސައްކަތް ކުރުމެވެ.
