އިންޑިއާ އަބަދުވެސް އޮންނާނީ އެންމެ އެކުވެރި ގައުމުގެ ގޮތުގައި: ފައިސަލް
ފައިސަލް ނަސީމު
ރިޔާސީ އިންތިހާބުގެ ނަތީޖާ އޮޅުވާލައިފި ނަމަ އިންޑިއާ އިން ރާއްޖެ ހިފަން ޖެހޭނެ ކަމަށް އެ ގައުމުގެ ގާނޫނު ހަދާ މަޖިލީހުގެ މެމްބަރު ސުބްރަމާނިއަން ސުވާމީ ގޮވާލެއްވުމުން، އެކަމާ ދެކޮޅު ހައްދަވާ ކަމަށް ގުޅިފައިވާ ޕާޓީތަކުގެ ރިޔާސީ ކެންޑިޑޭޓުގެ ރަނިންމޭޓް ފައިސަލް ނަސީމް ވިދާޅުވެއްޖެއެވެ.
އިންޑިއާގެ ވެރިކަން ކުރާ ޕާޓީ، ބީޖޭޕީ ތަމްސީލު ކުރައްވާ ސުބްރަމާނިއަންގެ ގޮވާލެއްވުމާ ދެކޮޅު ހައްދަވައި، ހުކުރު ދުވަހުގެ ރޭ ފައިސަލް ކުރެއްވި ޓްވީޓެއްގައި ވިދާޅުވީ އިންތިހާބުގެ ނަތީޖާ އޮޅުވާލައިފި ނަމަ އިންޑިއާ އިން ރާއްޖެ ހިފަންޖެހޭ ކަމަށް ސުބްރަމާނިއަން ވިދާޅުވުމަކީ ޒިންމާދާރުކަން ކުޑަ ކަމެއް ކަމަށެވެ.
އިންޑިއާ އަބަދު ވެސް ދެމި އޮންނާނީ ރާއްޖޭގެ އެންމެ އެކުވެރި ގައުމުގެ ގޮތުގައި ކަމަށާއި އެ ގުޅުމަށް ލޮޅުން އަންނާނެ ކަމެއް އެ ގައުމުން ނުކުރާނެ ކަމަށް ފައިސަލް ވިދާޅުވެފައި ވެއެވެ.
އިންޑިއާގެ ރާޖަ ސަބާގެ މެމްބަރު، ސުބްރަމާނިއަންގެ ގޮވާލުން އިދިކޮޅު ކޯލިޝަންގައި ހިމެނޭ އަދަލަތު ޕާޓީން ވެސް ވަނީ ކުށްވެރިކޮށްފައެވެ. އެ ޕާޓީން ނެރުނު ބަޔާނުގައި ބުނެފައި ވަނީ ބޭރުގެ އެއްވެސް ގައުމަކުން ރާއްޖެ އިސްތިއުމާރު ކުރަން ޖެހޭ އެއްވެސް ހާލަތެއް އޮންނާނެ ކަމަށް އެ ޕާޓީން ނުދެކޭ ކަމަށެވެ. ނަމަވެސް ހެޔޮލަފާ ވެރިކަމެއް ގާއިމުކޮށް، ޑިމޮކްރެޓިން މާހައުލެއް ރާއްޖޭގައި ގާއިމު ކުރުމަށް އިންޑިއާގެ އެހީތެރިކަން ބޭނުންވާ ކަމަށް އަދާލަތުން ބުންޏެވެ.
