ދިވެހި ހައްޖުވެރިންގެ ހާލު ރަނގަޅު، މާދަމާ އެނބުރި މައްކާއަށް
22 އޯގަސްޓު 2018 | ބުދަ 08:09މިފަހަރު ރާއްޖެއިން 1،400އެއްހާ މީހުން ވަނީ ހައްޖަށް ގޮސްފައި
ހައްޖުވެރިން ޖަމްރާއަށް ހިލަ އުކަނީ
ހައްޖު ކޯޕަރޭޝަނަށް މިފަހަރު ދީފައިވާ 1,000 ކޯޓާއަށް ހައްޖަށް ގޮސްފައިވާ އެންމެންގެ ހާލުވެސް ރަނގަޅުކަމަށް އެ ކޯޕަރޭޝަންގެ ބޯޑު މެމްބަރ އަދި އިސްލާމިކް މިނިސްޓްރީގެ ޑެޕިއުޓީ މިނިސްޓަރ އަލީ ވަހީދު ވިދާޅުވެއްޖެއެވެ.
އަލީ ވަހީދު ވިދާޅުވީ ހައްޖު ދުވަހުގައި ހައްޖާޖީއެއް ހާލު ދެރަވެގެން ހޮސްޕިޓަލުގައި އެޑްމިޓްކުރި ކަމަށާއި އެހެން ނަމަވެސް އޭނާ މިހާރު ދޫކޮށްލާފައިވާކަމަށެވެ. އެމީހާގެ ހާލު ވެސް ރަނގަޅު ކަމަށް އޭނާ ވިދާޅުވިއެވެ.
މިފަހަރު ރާއްޖެއިން 1،400އެއްހާ މީހުން ވަނީ ހައްޖަށް ގޮސްފައެވެ. އެއީ ހައްޖު ކޯޕަރޭޝަނާއި ސިސިލްފަރު ޖަމާއަތާއި އަލްހަރަމައިން ޖަމާއަތާއި ތަޒްކިޔާ ޖަމާއަތާއި ޒައީ ޖަމާއަތުގެ ހަވާލުގައި ހައްޖަށް ދިޔަ މީހުންނެވެ. އެއެންމެންގެވެސް ހާލު ރަނގަޅުކަމަށްވެއެވެ.
އަލީ ވަހީދު ވިދާޅުވީ ޖަމްރާއަށް ހިލަ އުކައި ނިންމުމަށް ފަހު އެ ކޯޕަރޭޝަންގެ ހަވާލުގައި ހައްޖަށް ދިޔަ އެންމެން މާދަމާ މައްކާއަށް ދާނެ ކަމަށެވެ.
