ބޮޑު ހިތްހަމަ ޖެހުމެއް! ދިވެހި ހައްޖުވެރިންނަށް ފުރޭނެ ގޮތް ހަމަޖެހިއްޖެ
ފުރުން މާދަމާ ހަވީރު 5:00 ގައި
މިދިޔަ އަހަރު ހައްޖުގެ އަޅުކަން އަދާކުރަން ދިޔަ ދިވެހިންގެ ބަޔަކު
އިތުރު ކޯޓާގައި މިއަހަރު ހައްޖަށް ދިއުމަށް ހަމަޖެހުމަށް ފަހު ފުރޭނެ ގޮތް ނުވެފައި ތިބި 396 މީހުންނަށް ފުރޭނެ ގޮތް ސައުދީ އެއާލައިނުން ހަމަޖައްސާފައިވާ ކަމަށާއި ހޮނިހިރު ދުވަހު ހަވީރު ފުރާނެ ކަމަށް ހައްޖު ކޯޕަރޭޝަނުން ބުނެފި އެވެ.
ހައްޖު ކޯޕަރޭޝަންގެ އޮފިޝަލަކު ވިދާޅުވި ގޮތުގައި އެ ކުންފުނީގެ ހަވާލުގައި ދާ އެންމެންގެ ފުރުން ހަމަޖެހިފައިވަނީ ހޮނިހިރު ދުވަހު ހަވީރު 5:00 ގަ އެވެ. އެ މީހުން ސައުދީ އަރަބިއްޔާއަށް ދާނީ ސައުދީ އެއާލައިންގެ ފްލައިޓެއްގަ އެވެ.
އެ އެންމެންގެ ވިސާ އާއި މައްކާ އާއި މަދީނާގައި ތިބުމާއި ހައްޖުގެ އަޅުކަމުގެ އެހެން އިންތިޒާމުތައް ވެސް ހަމަޖެހިފައިވާ އޮފިޝަލް ވިދާޅުވި އެވެ.
"ސައުދީ އެއާލައިންގެ ސިސްޓަމަށް ދިމާވެފައިވާ މައްސަލައަކުން މިފަދަ ބުރޫއެއް މި އެރީ. ވަރަށް ބުރަކޮށް މަސައްކަަތްކޮށްގެން މިކަން ﷲ ގެ ރަހްމަތްފުޅާއެކު ކާމިޔާބު މިވީ. އިރާދަކުރެއްވިއްޔާ ދިވެހި ހުރިހާ ހާޖީންނަށް ހައްޖުގެ އަޅުކަން ފުރިހަމައަށް ލިބޭނެ،" އޮފިޝަލް ވިދާޅުވި އެވެ.
ރާއްޖެ އަށް ލިބުނު އިތުރު ކޯޓާގައި ހައްޖު ކޯޕަރޭޝަންގެ ހަވާލުގައި 396 ހައްޖާޖީން ފުރުމަށް ހަމަޖައްސާފައި އޮތީ ހުކުރު ދުވަހު ހަވީރު 3:30 ގަ އެވެ. ނަމަވެސް ފުރުން ލަސްވީ ސައުދީ އެއާލައިންގެ މައްސަލައަކުންނެވެ.
