ޓެކްސް އިންސްޕެޓްރސް ވިތައުޓް ބޯޑަރސްގެ ފުރަތަމަ މިޝަން މީރާ އިން ފަށައިފި

ޓެކްސް އިންސްޕެޓްރސް ވިތައުޓް ބޯޑަރސްގެ ފުރަތަމަ މިޝަން މީރާ އިން ފަށައިފިއެވެ.

މި މިޝަން އަކީ ޓީއައިޑަބްލިއުބީ އަކީ އޯ.އީ.ސީ.ޑީ އާއި ޔޫ.އެން.ޑީ.ޕީ ގުޅިގެން ޓެކުހާއި ގުޅޭ އޮޑިޓްތައް ކުރިއަށް ގެންދިއުމަށް ބޭނުންވާ އިލްމާއި ހުނަރު ތަރައްޤީވަމުން އަންނަ ޤައުމުތަކަށް ފޯރުކޮށްދިނުމުގެ ގޮތުން ފަށާފައިވާ ހަރަކާތެކެވެ. އެގޮތުން މިޝަން ކޯޕަރޭޝަން އެގްރީމަންޓުގައި މީރާ އާއި ޓީއައިޑަބްލިއުބީ އިން ވަނީ މި ހަފްތާގައި ސޮއިކޮށްފައެވެ.

ޓީއައިޑަބްލިއުބީގެ ފަރާތުން މީރާގައި މަސައްކަތް ކުރާ ޓެކްސް އޮޑިޓަރުންގެ ފެންވަރު ރަނގަޅު ކުރުމަށާއި ބައިނަލްއަޤްވާމީ ގޮތުން ކުރާ ވިޔަފާރި މުއާމަލާތްތައްކޮށް އޮޑިޓް ކުރުމަށް ދިމާވާ ގޮންޖެހުންތައް ހައްލުކުރުމުގައި އެހީތެރިވެދިނުމުގެ ގޮތުން ވަނީ ޓެކްނިކަލް އެސިސްޓެންޓް ޕްރޮޖެކްޓެއް ފައްޓާފައި ކަމަށް މީރާ އިން ބުނެއެވެ. އެގޮތުން ޕްރޮޖެކްޓް ފެއްޓެވުމުގެ ގޮތުން ޓިއައިޑަބްލިއުބީ ގެ ޕްރޮޖެކްޓް މެނޭޖަރ އަމްނާ ހަލީފާ އާއި ޕްރޮޖެކްޓް ފަންޑުކޮށްފައިވާ ޔޫއެންޑީޕީގެ ފަރާތުން ޓިއައިޑަބްލިއުބީ އަށް ކަނޑައަޅާފައިވާ ޕްރޮޖެކްޓް އެޑްވައިޒަރ ރާދާ ކުލްކަރްނީގެ އިތުރުން ޕްރޮޖެކްޓްގައި ފަންނީ އެހީތެރިކަން ފޯރުކޮށްދިނުމަށް ހޮވާފައިވާ ޓްރާންސްފަރ ޕްރައިޒިން އެކްސްޕަރޓް ސިލްވިއާ ކަރެލޯވާ ވަނީ ރާއްޖެ ވަޑައިގެން ޕްރޮޖެކްޓް ރަސްމީކޮށް ފައްޓަވައި ދެއްވާ މީރާގެ އޮޑިޓް ޓީމްތަކާއި ބައްދަލު ކުރައްވާފައެވެ.

ޕްރޮޖެކްޓް ދެ އަހަރު ދުވަހަށް ކުރިއަށް ގެންދިއުމަށް ހަމަޖެހިފައިވާއިރު ޕްރޮޖެކްޓްގެ ދަށުން މީރާ ޓެކްސް އޮޑިޓަރުން ޓެކުހުގެ މައިދާނުގައި ފެންނަމުންދާ ޓްރާންސްފަރ ޕްރައިޒިންގެ މައްސަލަތައް އޮޑިޓް ކުރުމަށް ތަމްރީނުވެގެންދާނެ ކަމަށް މީރާ އިން ބުނެއެވެ.