ރާއްޖޭގައި ރިޓެއިލް ވިޔަފާރީގައި އެންމެ ބޮޑު އެއް ބްރޭންޑް ކަމަށްވާ ރެޑްވޭވް އިން ބުރާސްފަތި ދުވަހު ރެޑްވޭވް "މެގަ މޯލް" ހުޅުމާލެގައި ހުޅުވަން ނިންމަފިއެވެ.
ރެޑްވޭވް މެގަ މޯލް ހަތަރު ފްލޯގެ މައްޗަށް އެކުލެވިގެންވާ އިރު އެތަން ހުންނާނީ ހުޅުމާލޭގެ ހިތިގަސްމަގުގައެވެ.
ރެޑްވޭވް އިން ބުނީ އެ މޯލް އިން ހުރިހާ ވައްތަރެއްގެ ސާމާނު ވެސް ލިބެން ހުންނާނެ ކަމަށެވެ. އެގޮތުން ފަރުނީޗަރާއި އިލްކްޓްރޯނިކްސްގެ ސާމާނުގެ އިތުރުން ބަދިގެ އަށް ބޭނުންވާ ސާމާނު އެ ތަނުން ލިބެން ހުންނާނެ ކަމަށް ވެސް ރެޑްވޭވް އިން ބުންޏެވެ.
އެ ކުންފުނިން ބުނީ ހުޅުމާލޭގައި އަލަށް ހުޅުވާ މޯލްގައި ގިނަ އައިޓަމްތަކެއް ލިބެން ހުންނާނެ ކަމަށާއި މޯލްގެ ފުރަތަމަ ފްލޯއަށް އަރައި ފޭބުމަށް ދެ އެކްސްކަލޭޓަރު ހަރުކޮށްފައިވާ ކަމަށެވެ. އަދި ގްރައުންޑް ފްލޯ އިން ފެށިގެން ހުރިހާ ފްލޯއަކަށް އަރަން ލިފްޓް ވެސް ބަހައްޓާފައިވާ ކަމަށް އެ ކުންފުނިން ވަނީ ބުނެފައެވެ.
މިއީ ރެޑްވޭވް އިން މިއީ ހުޅުމާލޭގައި ހުޅުވާ ދެވަނަ ފިހާރައެވެ. އެ ކުންފުނިން ވަނީ 2016 ވަނަ އަހަރުގެ ކުރީކޮޅު 50 މިލިއަން ރުފިޔާ ހަރަދުކޮށްގެން ރެޑްވޭވް ސިޓީ ސްކެއާ ހުޅުވާފައެވެ.
ރެޑްވޭވްއަކީ ގޭތެރެއަށް ބޭނުންވާ ތަފާތު ސާމާނު ވިއްކަމުން އަންނަ އަދި ހަލުވިކަމާ އެކު ކުރި އަރަމުން އަންނަ ކުންފުންޏެކެވެ.
