އެހެންދީނެއް ގެންނަ ވާހަކަ ޔާމިން ދައްކަވަނީ ޤާނޫނު އަސާސީގައި އޮތް އެއްޗެއް ހަނދުމަފުޅު ނެތީމަ: މާރިޔާ
ޤާނޫނު އަސާސީގައި އޮންނާނެ ކޮންމެ ދިވެއްސަކީ އިސްލާމަކަށް ވާން ޖެހޭނެޔޭ
ގުޅިފައިވާ ޕާޓީތަކުގެ ރިޔާސީ ކެންޑިޑޭޓްގެ ތަރުޖަމާން މާރިޔާ އަހުމަދު ދީދީ
ގުޅިފައިވާ ޕާޓީތަކުގެ މެނިފެސްޓޯގައި ރާއްޖެއަށް އިސްލާމްދީން ނޫން އެހެންދީނެއް ނުގެންނާނެ ކަމަށް ކަނޑައެޅިގެން ބުނެފައި ނުވާ ކަމަށް ވިދާޅުވެ ވާހަކަ ދައްކަވަނީ ރާއްޖޭގެ ޤާނޫނު އަސާސީގައި ލިޔެފައި އޮތް އެއްޗެއް އެމަނިކުފާނު ހަނދުމުފުޅު ނެތުމުން ކަމަށް ގުޅިފައިވާ ޕާޓީތަކުގެ ރިޔާސީ ކެންޑިޑޭޓް، އިބްރާހީމް މުހައްމަދު ސޯލިހްގެ ތަރުޖަމާން، މާރިޔާ އަހުމަދު ދީދީ ވިދާޅުވެއްޖެއެވެ.
ރައީސް ޔާމީން ނޫން ބޭފުޅަކު ރާއްޖޭގެ ވެރިކަމަށް ވަޑައިގަންނަވައިފި ނަމަ ރާއްޖޭގައި އިސްލާމްދީން ނޫން އެހެން ދީންތަކަށް ފުރުސަތު އޮވެދާނެ ކަމަށާއި އިދިކޮޅު ފަރާތްތަކުގެ މެނިފެސްޓޯގައި އިސްލާމްދީން ނޫން އެހެންދީނެއް ރާއްޖޭގައި ނޯންނާނެ ކަމަށް ކަނޑައެޅިގެން ބުނެފައި ނުވާ ކަމަށް ރައީސް ޔާމީނާއި ޕީޕީއެމްގެ އިސްބޭފުޅުން ތަކުރާރުކޮށް ދަނީ ވިދާޅުވަމުންނެވެ.
މިކަމާ ގުޅިގެ ގުޅިފައިވާ ޕާޓީތަކުން ހޯމަ ދުވަހު ބޭއްވި ޕްރެސް ކޮންފަރެންސެއްގައި މާރިޔާ ވިދާޅުވީ އިސްލާމް ދީން ނޫން އެހެން ދީނެއް ރާއްޖޭގައި ނޯންނާނެ ކަމަށް ޤާނޫނު އަސާސީގައި ސާފު ސަރީޙަ އިބާރާތުން ބުނެފައިވާ ކަމަށާއި ރައީސުލް ޖުމްހޫރިއްޔާ ކަމަށް ވަޑައިގަންނަވާ ބޭފުޅަކު ޢަމަލްކުރަން ޖެހޭނީ ސީދާ އެ ޤާނޫނު އަސާސީއާ އެއްގޮތަށް ކަމަށް ލިޔެފައިވާ ކަމަށެވެ.
މީގެ އިތުރުން ކޮންމެ ސިޔާސީ ޕާޓީއެއްގެ އަސާސީ ޤަވާއިދުގައި ވެސް އިސްލާމްދީން ނޫން އެހެން ދީނެއް ރާއްޖޭގައި ނޯންނާނެ ކަމަށް ސާފުކޮށް ލިޔެފައިވާއިރު އެނޫން ގޮތަކަށް ޢަމަލެއް ނުކުރެއްވޭނެ ކަމަށް މާރިޔާ ވިދާޅުވިއެވެ.
މާރިޔާ ވިދާޅުވީ ޤާނޫނު އަސާސީ އާއި ޤާނޫނުތަކުގައި އެހާ ސާފުކޮށް ލިޔެފައިވަނިކޮށް އެފަދަ ގޮތަކަށް ރައީސް ޔާމީން ވާހަކަފުޅު ދައްކަވަނީ ޤާނޫނު އަސާސީގައިވާ އެއްޗެއް ހަނދުމަފުޅު ނެތުމުން ކަމަށެވެ. އަދި އެމަނިކުފާނު އެހެން ވިދާޅުވާ ނަމަ އެވިދާޅުވެވެނީ ވެރިކަން ކުރައްވާއިރު ޤާނޫނު އަސާސީ އާއި ޤާނޫނުތަކަށް ހުރުމަތްތެރިކޮށް ނުހިއްތަވާނެކަން ކަމަށް މާރިޔާ ވިދާޅުވިއެވެ.
މާރިޔާ ވިދާޅުވީ ގުޅިފައިވާ ޕާޓީތަކުގެ މެނިފެސްޓޯ ވަރަށް އަވަހަށް ނެރޭނެ ކަމަށާއި އެމެނިފެސްޓޯގައި އިސްލާމްދީނާ ގުޅޭ ގޮތުން ވާހަކަތައް ލިޔެފައި ހުންނާނެ ކަމަށެވެ. ޚާއްޞަކޮށް އެ ސިޔާސަތު ލިޔުމުގައި ގުޅިފައިވާ ޕާޓީތަކުގައި ހިމެނޭ އަދާލަތު ޕާޓީގެ ދައުރު ވަރަށް ބޮޑުވާނެ ކަމަށް ވެސް މާރިޔާ ވިދާޅުވިއެވެ.
"ކޮންމެ ސިޔާސީ ޕާޓީއެއްގެ އަސާސީ ޤަވާއިދުގައި ވެސް އޮވޭ، އެމްޑީޕީގެ އަސާސީ ޤަވާއިދުގައި ވެސް އޮންނާނެ ސާފުކޮށް ލިޔެފަ އަޅުގަނޑުމެންގެ ރާއްޖޭގައި އިސްލާމްދީން ނޫން އެހެން ދީނަކަށް ފުރުސަތު ނުދޭނެކަން. އެއީ އަސާސީ ޤަވާއިދުގައި އަސާސެއް ގޮތަށް އަޅުގަނޑުމެން ލިޔެފައިވާ ކަމެއް. ޤާނޫނު އަސާސީގައި ވެސް ވަރަށް ސާފުކޮށް އޮވޭ ކޮންމެ ދިވެއްސަކު ވާން ޖެހޭނީ އިސްލާމެއް ކަމަށް. އަދި ދައުލަތަކީ ވެސް އިސްލާމް ދީން ކަމާއި އިސްލާމީ ޝަރީއަތައް ތަބާވާ ބައެއް ކަމަށް އަޅުގަނޑުމެންނަކީ. މިހާ ސާފުކޮށް ޤާނޫނުގައި ކަނޑައެޅިފައި އޮންނަ ކަމެއް. ހަޤީގަތުގައި ވެދާނެ ރައީސް ޔާމީން އެހެން އެވިދާޅުވަނީ އެމަނިކުފާނަކީ ޤާނޫނު އަސާސީއަށް ހުރުމަތްތެރިކޮށް ހިއްތަވާ ބޭފުޅަކަށް ނުވާތީ ކަމަށް،" މާރިޔާ ވިދާޅުވިއެވެ.
ގުޅިފައިވާ ޕާޓީތަކުގެ ރިޔާސީ ކެންޑިޑޭޓް އިބްރާހީމް މުހައްމަދު ސޯލިހް މި ހަފުތާގައި ރާއްޖެޓީވީގެ "ފަލަސުރުހީ" ޕްރޮގްރާމްގައި ވާހަކަ ދައްކަވަމުން ވިދާޅުވެފައި ވަނީ ގުޅިފައިވާ ޕާޓީތަކުގެ ދީނީ ސިޔާސަތަކަށް ވެގެންދާނީ ދިވެހިރާއްޖެއަކީ ސައްތައިންސައްތަ މުސްލިމް ޤައުމެއްގެ ގޮތުގައި ދެމެހެއްޓުމަށް މަސައްކަތް ކުރުން ކަމަށެވެ.
"އަޅުގަނޑުމެންގެ ދީނީ ސިޔާސަތަކަށް ވާނީ ދިވެހިރާއްޖޭގައި ސައްތައިންސައްތަ މުސްލިމް ޤައުމެއްގެ ގޮތުގައި ދެމެހެއްޓުމަށް މަސައްކަތް ކުރުން. އެގޮތުން ސައްޙަ އިސްލާމީ އަޤީދާއެއްގެ މަތީގައި މުޖުތަމައެއް ބިނާކުރުމުގެ މަސައްކަތް ކުރާނަން. އެއީ އެކަން ވާން ޖެހޭނެ ގޮތަކީ. ރާއްޖޭގައި އެހެން ދީނަކަށް ފުރުސަތެއް ނުދެވޭނެ. އެއީ ރައްޔިތުން ޤަބޫލު ވެސް ކުރައްވާނެ ކަމެއް ނޫން. އަދި އަޅުގަނޑުމެން އެއްވެސް މީހަކު ވެސް ޤަބޫލުކުރާނެ ކަމެއް ނޫން،" އިބޫ ވިދާޅުވިއެވެ.
އިބޫ ވިދާޅުވީ އެކަން އެގޮތަށް ކުރުމަށްޓަކައި ރައްޔިތުން އިތުބާރު ކުރައްވާ ދީނީ އިލްމުވެރިންގެ މަޝްވަރާ ހޯއްދަވާނެ ކަމަށެވެ. އަދި ޚާއްޞަކޮށް އެކަމުގައި ގުޅިފައިވާ ޕާޓީތަކުގައި ހިމެނޭ ޢަދާލަތު ޕާޓީގެ ޢިލްމުވެރިންނާއި ރައީސް މައުމޫނުގެ މަޝްވަރާ ހޯއްދަވާނެ ކަމަށް އިބޫ ވިދާޅުވިއެވެ.
އިބޫ ވިދާޅުވީ ގުޅިފައިވާ ޕާޓީތަކުގެ މެނިފެސްޓޯ ތައްޔާރު ކުރަމުންދާ ކަމަށާއި ދާދި އަވަހަށް އެ މެނިފެސްޓޯ ހާމަވެގެންދާއިރު މިހާތަނަށް ރިޔާސީ ކެންޑިޑޭޓަކު ނުނެރޭވަރުގެ މެނިފެސްޓޯއަކަށް އެމެނިފެސްޓޯ ވެގެންދާނެ ކަމަށެވެ.
"އަޅުގަނޑު މިހާރު ވެސް މިދަނީ ރާއްޖޭގައި ތިއްބެވި ރައްޔިތުން އިތުބާރުކުރައްވާ، ރައްޔިތުން ޤަބޫލުކުރައްވާ ދީނީ ޢިލްމުވެރިންނާ މަޝްވަރާކޮށްގެން ދީނީ ސިޔާސަތުތައް އެކުލަވާލަމުން. އެނގިވަޑައިގަންނަވާނެ އަޅުގަނޑުމެންގެ އެއް ޕާރޓްނަރަކީ، އަދި ގުޅިފައިވާ ޕާޓީތަކުގެ އެއްބައިވެރިއަކީ އަދާލަތު ޕާޓީ. އަދާލަތު ޕާޓީއަކީ ވަރަށް ގިނަ ދީނީ އިލްމުވެރިން ހިމެނިވަޑައިގަންނަވާ ޕާޓީއެއް. އެޕާޓީގައި އެބައޮވޭ ދީނީ އިލްމުވެރިންގެ މަޖިލީހެއް. އެމަޖިލީހުގެ މަޝްވަރާގެ އަލީގައި، އަދި އެބަހުންނެވި ރައީސް މައުމޫން ވެސް. ރާއްޖޭގައި ހުންނެވި ދީނީގޮތުން ކުރިއަރާފައިވާ އެއްބޭފުޅާ. އެބޭފުޅުންގެ ވިސްނުމުގެ އަލީގައި އަޅުގަނޑުމެން މިގެންދަނީ އެސިޔާސަތުތައް ބައްޓަންކުރަމުން. އިރާދަކުރެއްވިއްޔާ ގުޅިފައިވާ ސިޔާސީ ޕާޓީތަކުގެ މެނިފެސްޓޯ ހާމަވެގެންދާއިރު މިއަދާ ހަމައަށް ރިޔާސީ ކެންޑިޑޭޓަކު ނުނެރޭވަރުގެ ދީނީ ސިޔާސަތެއް ލިޔެވިފައި އޮތް މެނިފެސްޓޯއެއް ފެނިގެންދާނެ. އޭގެ ނަތީޖާއަކަށް އިރާދަކުރެއްވިއްޔާ އެމެނިފެސްޓޯ ވެގެންދާނީ ރާއްޖޭގެ މުޖުތަމައަށް ހެޔޮ ބަދަލުތަކެއް ފެނިގެން ދިއުން. އެއީ އަޅުގަނޑުމެންގެ ދީނީ ސިޔާސަތު އެކުލެވިގެންވާ ގޮތަކީ،" އިބޫ ވިދާޅުވެފައި ވެއެވެ.
