ރާއްޖޭގެ ބާޒާރުގައި ފިޔާ އަދި ބިސް އަދި އަލުވީގެ އަގު އަގު އިންތިހާއަށް އުފުލިއްޖެއެވެ.

މި ވަގުތު ފިޔާ ބަސްތާއެއް 900ރ އަށް، ބިސް ކޭހެއް 500ރ އަދި އަލުވި ބަސްތާއެއް އުޅެނީ 450ރ އަށެވެ.

މާލެގެ ފިހާރަތަކުން ފިޔާ ކިލޯއެއް ވިއްކާ އަގު 45ރ އަށް އުފުލިފައިވާއިރު ކުކުޅު ބިހެއްގެ އަގު އުޅެނީ 2.50ރ އަށެވެ. އަދި އަލުވި ކިލޯއެއް ވެސް ލިބެނީ 30ރ އަށެވެ.

ބާޒާރުގައި ފިޔާ އަދި ބިހުގެ އަގު އުފުލިފައި ވަނީ ތެލުގެ އަގު އުފުލުމާ ގުޅިގެން އިންޑިއާގައި ޓްރަކް ޑްރައިވަރުންތަކެއް ކުރި މުޒާހަރާތަކުގެ ސަބަބުން އެތަކެތި އިންޑިއާ އިން އެހެން ޤައުމުތަކަށް އެކްސްޕޯޓް ކުރުމުގައި ދަތިތަކަކާ ކުރިމަތިވުމާ ގުޅިގެންނެވެ. 

ކުރިން ފިޔާ ކިލޯއެއް 12ރ އަށް ލިބެން ހުރިއިރު އަލުވި ކިލޯއެއް ލިބެންހުރީ 10ރ އަށެވެ. އަދި އޭރު ބިސް ވިއްކަން ހުރީ 1.50ރ އަށް ބިހެކެވެ.

ފިޔާ، އަލުވި އަދި ބިހުގެ އަގު އީދަށް ފަހު ހެޔޮވެގެންދާނެ ކަމަށް ވިޔަފާރިވެރިން ލަފާކުރެއެވެ.

އާންމު ގޮތެއްގައި ފިޔާ އަދި ބިސް ފަދަ ތަކެތީގެ އަގު އުފުލެނީ ރޯދަ މާހައި ދިމާކޮށެވެ. އެހެންނަމަވެސް އިންޑިއާގައި ކުރި މުޒާހަރާތަކާ ގުޅިގެން ރާއްޖެއަށް ފިޔާ އަދި ބިސް އެތެރެކުރުމުގައި ދަތިތަކާ ކުރިމަތިވުމުން ވިޔަފާރިވެރިން ތިބީ ކަންބޮޑުވެފައެވެ.