ރާއްޖެ ޓީވީއަކީ ވަރަށް ހިތްވަރުގަދަ ޓީމެއް އެކުލެވޭ ސްޓޭޝަނެއް ކަމަށް ޖުމްހޫރީ ޕާޓީގެ ބާނީ ގާސިމް އިބްރާހިމްގެ އަނބިކަނބަލުން އަދި ޖޭޕީގެ ކައުންސިލް މެންބަރު އައިޝަތު ނަހުލާ ވިދާޅުވެއްޖެއެވެ.
ގުޅިފައިވާ ސިޔާސީ ޕާޓީތަކުގެ ރިޔާސީ ކެންޑިޑޭޓް އިބްރާހިމް މުހައްމަދު ސާލިހާއި ރަނިންމޭޓް ފައިސަލް ނަސީމަށް ތާއީދު ހޯއްދެވުމަށް އައިޝާ އިސްވެ ހުންނަވައި އދ. އަތޮޅަށް ކުރައްވާ ދަތުރުފުޅަށް ފުރާވަޑައިގަތުމުގެ ކުރިން ރާއްޖެ ޓީވީއާ ވާހަކަ ދައްކަވަމުން އައިޝާ ވިދާޅުވީ ބްރޯޑް ކާސްޓިން ކޮމިޝަނުން ދެ މިލިއަން ރުފިޔާ އިން ރާއްޖެ ޓީވީ ޖޫރިމަނާކުރި ކުރުމާ މެދު ވަރަށް ހިތާމަ ކުރައްވާ ކަމަށެވެ.ހުރިހާ ރައްޔިތުން ވެސް ތިބީ ރާއްޖެ ޓީވީއާ އެކުގައި ކަމަށް އައިޝާ ވިދާޅުވިއެވެ.
ބުދަ ދުވަހު ބްރޯޑްކާސްޓިން ކޮމިޝަނުން ރާއްޖެ ޓީވީ ހަތަރު ވަނަ ފަހަރަށް ޖޫރިމަނާ ކޮށްފައިވަނީ އަބުރުގެ ގާނޫނުގެ ދަށުން ޖޫރިމަނާ ކުރެވޭ އެންމެ ބޮޑު އަދަދުންނެވެ. ދެ މިލިއަން ރުފިޔާ އިން ޖޫރިމަނާކުރީ، މިއަހަރުގެ މާޗް 16 ވަނަ ދުވަހުގެ ރޭ މާލޭގައި ކުރަމުންދިޔަ މުޒާހަރާ ރާއްޖެ ޓީވީން ގެނެސްދެމުން ދިޔައިރު މީހަކު ދެއްކި ވާހަކައަކާ ގުޅިގެންނެވެ.
އެ މީހާ ދެއްކި ވާހަކަ އިން ގައުމީ ސަލާމަތަށް ނުރައްކާވި ކަމަށް ބްރޯޑްކާސްޓިން ކޮމިޝަނުން ބުނާއިރު، ގައުމީ ސަލާމަތުގެ ކަންކަން ބެލެހެއްޓުމަށް ގާނޫނުން މަތިކޮށް އެކަމުގެ ވާޖިބު ހަވާލު ކޮށްފައިވާ ދައުލަތުގެ އެއްވެސް މުއައްސަސާއަކުން އެކަމާ ބެހޭ ގޮތުން އެއްވެސް އެއްޗެއް މިހާތަނަށް ބުނެފައެއް ވެސް ނެތް ކަން ރާއްޖެޓީވީން ވަނީ ފާހަގަކޮށްފައިއެވެ. އޭގެއިތުރުން އެކަމުގެ މައްސަލައެއް ވެސް ބަލާފައެއް ނެތްކަން ވެސް ސްޓޭޝަނުން ފާހަގަކޮށްފައި ވެއެވެ. އެ ވާހަކަ ދެއްކި މީހާއާ ސުވާލެއް ވެސް ނުކުރެއެވެ.
ބްރޯޑްކާސްޓިން ކޮމިޝަނުން ރާއްޖެޓީވީ ހަތަރުވަނަ ފަހަރަށް ކުރި ޖޫރިމަނާ ދެއްކުމަށް ފައިސާ ހޯދުމުގެ ގޮތުން ހުކުރު ދުވަހު ހަވީރު 15:45 ގައި އަބުރުފުޅު ފަންޑު ހުޅުވުމަށް ވަނީ ނިންމާފައެވެ.
