ދިވެހި ސަރުކާރުގެ އިސް ފަރާތްތަކާ ދެކޮޅަށް ދަތިކުރުމުގެ ފިޔަވަޅު އެޅުމަށް ވިލާތުގެ އިއްތިޙާދުން ނިންމި ނިންމުމަކީ ދިވެހި ސަރުކާރަށް ދިން މެސެޖެއް ކަމަށާއި، ޙާލަތު ރަނގަޅު ނުވެއްޖެ ނަމަ އަޅާފައިވާ ފިޔަވަޅުތައް ވަރުގަދަކޮށްފާނެ ކަމަށް ވިލާތުގެ އިއްތިޙާދުން ބުނެފިއެވެ.
ވިލާތުގެ އިއްތިޙާދުގެ އޮފިޝަލަކާ ޙަވާލާދީ ރާއްޖޭގައި އިނގިރޭސި ބަހުން ނެރޭ އޮންލައިން ނޫހެއް ކަމަށްވާ މޯލްޑިވްސް އިންޑިޕެންޑެންޓުން ބުނީ ރިޔާސީ އިންތިޚާބާ ދިމާކޮށް، އިސްލާހުކުރަން ޖެހޭ ކަންކަން އިސްލާހު ނުކޮށްފި ނަމަ ފިޔަވަޅުތައް ވަރުގަދަ ކުރާނެ ކަމަށެވެ.
ވިލާތުގެ އިއްތިހާދުން ފިޔަވަޅު އަޅަން ނިންމާފައި ވަނީ ރާއްޖޭގެ އިންސާނީ ހައްޤުތަކަށް އަރައިގަންނަ ފަރާތްތަކާއި، މިނިވަން އިންސާފުވެރި ރިޔާސީ އިންތިޚާބަކަށް ހުރަސް އަޅަމުންދާ ފަރާތްތަކާއި، އެފަރާތްތަކަށް ވާގިވެރިވާ ފަރާތްތަކާ ދެކޮޅަށެވެ. އެގޮތުން އެފަދަ ފަރާތްތަކުގެ މުދާ ހިފަހައްޓައި، ވިލާތުގެ ޤައުމުތަކަށް އެރުން މަނާކުރުމަށް ވަނީ ނިންމާފައެވެ. އެހެން ނަމަވެސް ވިލާތުގެ އިއްތިހާދުން ފިޔަވަޅު އަޅާނެ ފަރާތްތައް އަދި ލިސްޓްކޮށްފައެއް ނުވެއެވެ.
މޯލްޑިވްސް އިންޑިޕެންޑެންޓަށް މައުލޫމާތު ދެއްވި ވިލާތުގެ އިއްތިޙާދުގެ އޮފިޝަލް ވިދާޅުވި ކަމަށް އެނޫހުން ބުނީ އެޖަމާޢަތުން މަސައްކަތްކުރަމުން ދަނީ ރާއްޖޭގެ ރިޔާސީ އިންތިޚާބަކީ މިނިވަން އިންސާފުވެރި އިންތިޚާބަކަށް ހަދައި، އަސާސީ ހައްޤުތައް ކަށަވަރުކޮށްދިނުމަށެވެ. އަދި އެކަމަށްޓަކައި ފާއިތުވި މަސްތަކުގައި ކަމާ ގުޅުން ހުރި އެންމެހާ ފަރާތްތަކާ އެކު މަޝްވަރާކުރަމުންދާ ކަމަށް އެ ޖަމާޢަތުން ވަނީ ބުނެފައެވެ.
