ރާއްޖެއާއި ގުޅުމެއްވެސް ނެތް ސަޢޫދީ-ކެނެޑާ މައްސަލައިގެ ތެރެއަށް ރާއްޖެއިން ވަދެއްޖެ!
8 އޯގަސްޓު 2018 | ބުދަ 18:08ކެނެޑާއާއި ސަޢޫދީ ޢަރަބިއްޔާއާއި ދެމެދު ޖެހިފައިވާ ޑިޕްލޮމެޓިކް މައްސަލައިގައި ރާއްޖެއިން ކަންބޮޑުވާކަމަށް ބުނެ ބަޔާނެއް ނެރުނު
ފޮރިން މިނިސްޓްރީ
ރާއްޖެއާއި ގުޅުމެއްވެސް ނެތް ސަޢޫދީ-ކެނެޑާ މައްސަލައިގެ ތެރެއަށް ދިވެހިރާއްޖެއިން ވަދެއްޖެއެވެ.
ދިވެހި ސަރުކާރުން ވަނީ ކެނެޑާއާއި ސަޢޫދީ ޢަރަބިއްޔާއާއި ދެމެދު ޖެހިފައިވާ ޑިޕްލޮމެޓިކް މައްސަލައިގައި ރާއްޖެއިން ކަންބޮޑުވާކަމަށް ބުނެ ބަޔާނެއް ނެރެފައެވެ.
ސަޢޫދީއާއި ކެނެޑާއާއި ދެމެދު މައްސަލަތަކެއް އުފެދުނީ ސަޢޫދީއިން އިންސާނީ ހައްޤުތަކަށް މަސައްކަތްކުރާ ފަރާތްތަކާއިމެދު އަމަލުކުރާ ގޮތާއިމެދު ކަންބޮޑުވެ، ކެނެޑާއިން ނުރުހުން ފާޅުކުރުމާއި ގުޅިގެންނެވެ. އަދި އެމައްސަލައި ސަޢޫދީއިން ވަނީ އެޤައުމުގައި ހުންނަ ކެނެޑާ އެމްބެސެޑަރ އަނބުރާ ފޮނުވާލާފައެވެ. އަދި ކެނެޑާއާއިއެކު ކުރަމުން އަންނަ ވިޔަފާރިތައް ހުއްޓާލައި، އެޤައުމާއެކު ހުރިހާ ގުޅުމެއް ކަނޑާލުމަށް ސަަޢޫދީއިން ވަނީ ނިންމާފައެވެ.
އުތުރު އެމެރިކާގެ ޤައުމަކާއި، މެދުއިރުމަތީގެ ޤައުމަކާއި ދެމެދު އުފެދުނު މިމައްސަލައިގައި ދިވެހި ސަރުކާރުން ވަނީ ސަޢޫދީ ސަރުކާރަށް ތާޢީދުކުރާކަމަށް ބުނެފައެވެ. އަދި އެއްވެސް ޤަައުމެއްގެ ދާޚިލީ ކަންކަމުގެ ތެރެއަށް އެހެން ޤައުމުތަކުން ވަދެގެން ނުވާނެކަމަށް ބުނެ، އެހެން ދެޤައުމެއްގެ މެދުގައި އުފެދުނު މައްސަލައެއްގެ ތެރެއަށް ރާއްޖެއިން މިވަނީ ވަދެފައެވެ.
ސަޢޫދީގެ ޚާރިޖީ ސިޔާސަތަށް އަންނަމުންދާ ބަދަލުތަކާއިއެކު، ގުޅުން ކަނޑަމުންދާ ޤައުމުތަކާއިއެކު ރާއްޖެއިންވެސް ދަނީ ގުޅުން ކަނޑާލަމުންނެވެ. އެގޮތުން އީރާނާއި ޤަތަރާއިއެކު އޮންނަ ގުޅުން ސަަޢޫދީއިން ކަނޑާލުމާއިއެކު ރާއްޖެއިންވެސް ވަނީ އެޤައުމުތަކާއިއެކު އޮންނަ ގުޅުން ކަނޑާލާފައެވެ.
ސަޢޫދީއާއި ކެނެޑާއާއި ދެމެދު އުފެދުނު މައްސަލައިގައިވެސް ރާއްޖެއިން ބަޔާނެއް ނެރުނުއިރު، ދިވެހި ޚާރިޖިއްޔާއަށާއި ސަރުކާރަށްވެސް އެމައްސަލައިގައި ހަޤީޤަތުގައިވީ ކިހިނެއްކަން ނޭނގޭކަމަށް ބައެއް ފަރާތްތަކުން ފާހަގަކުރިއެވެ. އަދި އެހެން ޤައުމުތަކުގެ ދާޚިލީ ކަންކަމުގެ ތެރެއަށް ނުވަންނަން ރާއްޖެއިން ގޮވާލާއިރު، މިމައްސަލައަކީ މާދުރުގައި އޮތް ދެޤައުމެއްގެ މެދުގައި ޖެހުނު މައްސަލައެއްކަންވެސް ދިރާސާކުރާ ފަރާތްތަކުން ފާހަގަކުރެއެވެ.
