ޕްރޮސެކިއުޓަރ ޖެނަރަލް (ޕީޖީ) އޮފީހުގެ އެސިސްޓެންޓް ޕްރޮސެކިއުޓަރ ޖެނެރަލް އައިޝަތު ފަޒުނާ އަހުމަދު އިސްތިއުފާ ދެއްވައިފިއެވެ. 

ފަޒުނާ އިސްތިއުފާ ދެއްވާފައިވާކަން "ރާއްޖެއެމްވީ"އަށް ކަށަވަރު ކުރެވޭގޮތް ނުވިނަމަވެސް ވީއެފްޕީން ރިޕޯޓް ކޮށްފައިވާ ގޮތުން ފަޒުނާ އިސްތިއުފާ ދެއްވާފައިވާކަން އޭނާ ވަނީ އެ ނޫހަށް ކަށަވަރު ކޮށްދެއްވާފަ އެވެ. އަދި އެމަގާމުން އިސްތިއުފާ ދެއްވީ އަމިއްލަ ހިތްހަމަނުޖެހުމަކާ ގުޅިގެން ކަމަށް ވެސް ފަޒުނާއާ ހަވާލާދީ ވީއެފްޕީން ރިޕޯޓް ކޮށްފައި ވެއެވެ.

މިކަން ކަށަވަރު ކުރުމަށް ޕީޖީ އޮފީހުގެ މީޑިއާ އޮފީޝަލަށް ގުޅަންކުރި މަސައްކަތް ވަނީ ކާމިޔާބުވާގޮތް ނުވެފައެވެ.

ފަޒުނާއަކީ މިހާރު ޕީޖީ އޮފީހުގައި މަސައްކަތް ކުރައްވާ ގާނޫނީ ވަކީލުންގެ ތެރޭގައި ހިމެނެވަޑައިގަންނަވާ ތަޖުރިބާކާރު ގާނޫނީ ވަކީލެކެވެ. ޕީޖީ އޮފީހުގައި ގިނަ ދުވަސްތަކެއް ވަންދެން މަސައްކަތް ކުރައްވާފައިވާ ފަޒުނާ ވަނީ ދައުލަތުން ދައުވާ ކުރި ބޮޑެތި މައްސަލަތަކުގައި ދައުލަތުގެ ފަރާތުން އިސް ވަކީލެއްގެ ގޮތުގައި މަސައްކަތް ކުރައްވާފަ އެވެ.

އެގޮތުން، ރައީސް އަބްދުﷲ ޔާމީން އަބްދުލްގައްޔޫމްގެ ސަރުކާރު ގާނޫނާ ހިލާފަށް ވައްޓާލަން އުޅުނުކަމަށް ބުނެ، ދައުލަތުގެ ބައެއް އިސްވެރިންގެ މައްޗަށް ދައުލަތުން ކުރާ ޓެރަރިޒަމް ދައުވާތަކުގައި ދައުލަތުގެ ފަރާތުން ވަކާލާތު ކުރައްވާ އިސް ގާނޫނީ ވަކީލަކީ ފަޒުނާއެވެ. 

އޭގެ ތެރޭގައި ކުރީގެ ރައީސް މައުމޫން އަބްދުލްގައްޔޫމާއި ކުރީގެ އުއްތަމަ ފަނޑިޔާރު އަބްދުﷲ ސައީދާއި ސުޕްރީމް ކޯޓުގެ ފަނޑިޔާރު އަލީ ހަމީދުގެ އިތުރުން ޖުމްލަ 09 ބޭފުޅެއްގެ މައްޗަށް ދައުލަތުން އުފުލާފައިވާ ޓެރަރިޒަމް ދައުވާ ހިމެނެ އެވެ. 

މީގެ އިތުރުން ފަޒުނާއަކީ ކުރީގެ ރައީސް މުހައްމަދު ނަޝީދު އާއި ކުރީގެ ޑިފެންސް މިނިސްޓަރު ކާނަލް މުހައްމަދު ނާޒިމްގެ މައްޗަށް އުފުލި ދައުވާއާ ގުޅިގެން ދައުލަތުގެ ފަރާތުން ވަކާލާތު ކުރެއްވި ގާނޫނީ ވަކީލުންގެ ޓީމުގައި ވެސް ހިމެނިވަޑައިގެން ވަކާލާތު ކުރައްވާފައިވާ ގާނޫނީ ވަކީލެކެވެ.