ޔޫރަޕުން ރާއްޖެއަށް ތަރުކާރީ އާއި މޭވާ އެތެރެކުރުމުގެ އުސޫލު ހަރުކަށި ކޮށްފިއެވެ.

މޯލްޑިވްސް ފުޑް އެންޑް ޑްރަގް އޮތޯރިޓީން (އެމްއެފްޑީއޭ) އަންގާރަ ދުވަހު ނެރުނު ނޫސްބަޔާނެއްގައި ބުނެފައިވަނީ ރައްކާތެރިކަން ކަށަވަރު ނުކުރެވޭ ޔޫރަޕުގެ ޤައުމުތަކުން އިމްޕޯޓްކުރާ ގަނޑުކުރި ތަރުކާރީ އާއި މޭވާ އަދިވެސް އިމްޕޯޓް ކުރަމުންދާ ކަމަށް ފާހަގަކުރެވޭ ކަމަށެވެ. އަދި އެ ތަކެތީގެ ރައްކާތެރިކަން ކަށަވަރު ކުރުމާއި އިމްޕޯޓްކުރާ ފަރާތްތަކަށް ދިމާވާ ދަތިތައް ހައްލު ކުރުމަށް އެ އުފެއްދުންތައް ހިރާސްއަށް ބަލައި އިތުރު ފިޔަވަޅުތަކެއް އެޅުމަށް ނިންމާފައިވާ ކަމަށެވެ.

އެގޮތުން ޔޫރަޕުން އިމްޕޯޓް ކުރާ މޭވާ އާއި ތަރުކާރީއަށް ހެލްތް ކްލިއަރަންސް ދިނުމަށް ހަމަޖެހިފައިވަނީ އިމްޕޯޓްކުރާ ޤައުމެއްގެ ކޮންޕިޓެންޓް އޮތޯރިޓީއެއްގެ ފައިޓޯސެނިޓަރީ ސެޓްފިކެޓް ހުށަހެޅުމުން ކަމަށް ވެސް ބަޔާނުގައިވެއެވެ. އަދި އެ ސެޓްފިކެޓް ހުށަނާޅާ ޝިޕްމަންޓްތަކަށް ހެލްތް ކްލިއަރަންސް ދެވޭނީ އިމްޕޯޓްކުރާ ފަރާތުގެ އަމިއްލަ ހަރަދުގައި އެކްރެޑިޓް ކޮށްފައިވާ ލެބޯރަޓަރީއަކުން ތަހުލީލުކޮށް އެ ތަހުލީލުގެ ނަތީޖާ ހުށަހެޅުމުން އެއަށް ރިޔާއަތްކޮށް ބުލުމަށްފަހުގައި ވެސް އެ އޮތޯރިޓީން ބުނެފައިވެއެވެ.

ފުޑް އެންޑް ޑްރަގް އޮތޯރިޓީން ޖުލައި 16 ވަނަ ދުވަހު ނެރުނު އިތުރު ނެރެފައިވާ ބަޔާނެއްގައި ބުނެފައި ވަނީ ލިސްޓީރިއާ މޮނޯސައިޓޮޖެންސް ޖަރާސީމުން ތަޣައްޔަރުވެފައިވާ ގަނޑުކުރި ތަރުކާރީ ރާއްޖެއަށް އެތެރެވެފައިވާ ކަމުގެ މައުލޫމާތު ދުނިޔޭގެ ސިއްހަތު ޖަމިއްޔާގެ އިންޓަނޭޝަނަލް ފުޑް ސޭޕްޓީ އޮތޯރިޓީ ނެޓްވޯރކް އަދި ޔޫރަޕްގެ ރެޕިޑް އެލަރޓް ސިސްޓަމް ފޮރ ފުޑް އެންޑް ފީޑް އިން އެ އޮތޯރިޓީއަށް އަންގާފައިވާ ކަމަށެވެ.

މޯލްޑިވްސް ފުޑް އެންޑް ޑްރަގް އޮތޯރިޓީން ބުނީ އެ މައްސަލައާ ގުޅިގެން ބަޔާނާއެކު ނެރެފައިވާ ލިސްޓުގައި ހިމެނޭ އުފެއްދުންތައް ރާއްޖެއަށް އެތެރެކޮށް ވިއްކުމަކީ މަނާ ކަމެއް ކަމަށާއި މި ތަކެތި ބޭނުން ނުކުރުމަށް ވެސް އިލްތިމާސްކޮށްފައެވެ. އަދި ތަޢައްޔަރުވެފައިވާ އެ އުފެއްދުން ވިއްކަން ހުރިކަން ފާހަގަކުރެއްވިއްޖެނަމަ އެ އޮތޯރިޓީގެ ނަންބަރު 3014361 ފޯނަށް ގުޅައި މައުލޫމާތު ހިއްސާކުރުމަށް ވެސް އެއޮރިޓީން ވަނީ އެދިފައެވެ.