މިރާއްޖޭގެ ސަލާމަތާއި ރައްކާތެރިކަން ކަށަވަރުކުރުމަށް އިބޫއަށް ވޯޓު ދޭންޖެހޭ: ޑރ. ހުސެއިން
މިއަހަރުގެ ރިޔާސީ އިންތިޚާބަކީ މިފަހުގެ ތާރީހެއްގައި ބޭއްވިގެންދާނެ އެންމެ އުނދަގޫ އެއް އިންތިޚާބު
ތިމަރަފުށީގައި ޖަލްސާގައި އިބޫ ވާހަކަ ދައްކަވަނީ
މިރާއްޖޭގެ ސަލާމަތާއި ރައްކާތެރިކަން ކަށަވަރުކުރުމަށް މި އަހަރުގެ ރިޔާސީ އިންތިޚާބުގައި ގުޅިފައިވާ ސިޔާސީ ޕާޓީތަކުގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިހު (އިބޫ) އަށް ވޯޓު ދޭން ޖެހޭ ކަމަށް ޖުމްހޫރީ ޕާޓީގެ ޑެޕިއުޓީ ލީޑަރު ޑރ. ހުސައިން ރަޝީދު ހަސަން ވިދާޅުވެއްޖެއެވެ.
ތ. ތިމަރަފުށީގައި ގުޅިފައިވާ ސިޔާސީ ޕާޓީތަކުން ބޭއްވި ޖަލްސާގައި ވާހަކަ ދައްކަވަމުން ޑރ. ހުސެއިން ވިދާޅުވީ މިއަހަރުގެ ރިޔާސީ އިންތިޚާބަކީ މިފަހުގެ ތާރީހެއްގައި ބޭއްވިގެންދާނެ އެންމެ އުނދަގޫ އެއް އިންތިޚާބު ކަމަށާއި، މި އިންތިޚާބު މިނިވަން ކުރުމަށް ރައްޔިތުން ގަދައަޅާ މަސައްކަތް ކުރަންޖެހޭ ކަމަށެވެ.
"ކުރަން މިއުޅެނީ ވަރަށް ބޮޑު ކަމެއް. އަޅުގަނޑުމެންނާ މިއަދު ކުރިމަތިވެފައި ވަނީ ކުޑަ ކަމެއް ނޫން. ކުރަން މިއުޅޭ ކަމަކީ ފަސް އަހަރު މުއްދަތަށް ދިވެހިރާއްޖޭގެ ދައުލަތް ހިންގުމަށް ރައްޔިތުން ނުކުމެ ސަރުކާރެއް ހޮވަން. މީހަކާ ވެރިކަން ހަވާލުކުރަން. އަޅުގަނޑުމެން ކުރިމަތީގައި މިކަމަށް ގޮންޖަހަން ހުރި މީހަކީ މިހާރު ވެސް އެމަގާމު ވެސް ފުރަމުންދާ މީހާ" ޑރ. ހުސެއިން ވިދާޅުވިއެވެ.
ޑރ. ހުސެއިން ވިދާޅުވީ ރައީސް ޔާމިނަށް އެއް ދައުރު ދިނުމަށް ރައްޔިތުންގެ ކިބައިން އެދޭ އިރު އެމަނިކުފާނުގެ ވެރިކަމުގައި ދައުލަތުގެ މާލިއްޔަތާއި، ނުހައްގުން އަނިޔާ ދީފައިވާ މިންވަރާއި، މިގައުމުގެ ސަލާމަތާއި ރައްކާތެރިކަން އޮތް މިންވަރަށް ރައްޔިތުން ވިސްނަން ޖެހޭ ކަމަށެވެ.
ޑރ. ހުސެއިން ވިދާޅުވީ ރައްޔިތުންނަށް އެއީ ވަގެއް ކަން ކަށަވަރުވާ އިރު ދައުލަތުގެ މާލިއްޔަތުގެ ތަޅުދަނޑި ހަވާލުނުކުރާނެ ކަމަށާއި، އެކަމަށް އުންމީދު ކުރުމަކީ ވެސް މޮޔަ ކަމެއް ކަމަށެވެ.
ބަޑިގުދަނުގެ ތަޅުދަނޑި ހަވާލުކުރުމުން އެތާނގާއި ހުރި ގިނަ އަދަދެއްގެ ހަތިޔާރުތައް ނެގީ ފަޅުރަށެއްގެ ފަޅުތެރިންކަން ފާހަގަކުރައްވައި ޑރ. ހުސެއިން ވިދާޅުވީ ދިވެހިރައްޔިތުންނާއި، ގައުމުގެ ސަލާމަތާއި ރައްކާތެރިކަން ކަށަވަރުކުރުމަށް އިބޫއަށް ވޯޓު ދޭން ޖެހޭ ކަމަށެވެ. އޭނަ ވިދާޅުވީ ފަސް އަހަރު ދައުރު ނިމިގެން ދިޔައިރު އިންޓެލިޖެންސް ރިޕޯޓެއް ކިޔާލަން ވަގުތު ނުވި މީހަކަށް ގައުމު ހިންގޭނެ ކަމަށް އުންމީދު ނުކުރާ ކަމަށެވެ.
