އިދިކޮޅުން އުޅެނީ އިންތިޚާބު ހައިޖެކް ކުރަން: ޑރ. ޚަލީލު
5 އޯގަސްޓު 2018 | އާދީއްތަ 18:07ހަމަނުޖެހުން އުފައްދަން އުޅެނީ އިދިކޮޅުންކަމަށް ޚަލީލު ތުހުމަތުކުރޭ
ޕީޕީއެމްގެ ސެކްރެޓަރީ ޖެނެރަލް އަދި ރައްޔިތުންގެ މަޖިލީހުގެ ނިލަންދޫ ދާއިރާގެ މެމްބަރު އަބްދުﷲ ޚަލީލް | ގޫގުލް
އިދިކޮޅު ފަރާތްތަކުން މަސައްކަތް ކުރަނީ ރާއްޖޭގައި ހަމަނުޖެހުން އުފައްދައި، އަންނަ މަހު 23 ގައި އޮންނަ ރިޔާސީ އިންތިޚާބު ހައިޖެކް ކުރަން ކަމަށް ޕީޕީއެމްގެ ސެކްރެޓަރީ ޖެނެރަލް އަދި ރައްޔިތުންގެ މަޖިލީހުގެ ނިލަންދޫ ދާއިރާގެ މެމްބަރު އަބްދުﷲ ޚަލީލް ވިދާޅުވެއްޖެ އެވެ.
ރާއްޖޭގެ އަމާންކަން ނަގާލަން ބަޔަކު ރާވަމުންދާ ކަމުގެ މައުލޫމާތު ލިބިފައިވާތީ ސިފައިންނާއި ފުލުހުން އެކަން ބަލަމުން އަންނަ ކަމަށް ޑިފެންސް މިނިސްޓަރު އާދަމް ޝަރީފް ވިދާޅުވި ވާހަކަ ތަކާއި ގުޅިގެން އިންތިޚާބު ނުބާއްވަން ސަރުކާރުން މަސައްކަތް ކުރާކަމަށް ތުހުމަތުކޮށް، އިދިކޮޅު ފަރާތްތަކުން ސަރުކާރަށް ބަހުގެ ހަމަލާތައް ދޭން ފަށާފައިވާއިރު، އިދިކޮޅު ފަރާތްތަކަށް ރައްދު ދެއްވައި، ޚަލީލް އާދިއްތަ ދުވަހު ކުރެއްވި ޓުވީޓެއްގައި ވިދާޅުވީ އެ ފަރާތްތަކުން މަސައްކަތް ކުރަނީ ރާއްޖޭގައި ހަމަނުޖެހުން އުފައްދައި، ރިޔާސީ އިންތިޚާބު ހައިޖެކް ކުރަން ކަމަށެވެ.
އިދިކޮޅު ފަރާތްތަކުން މަސައްކަތް ކުރަނީ ހަމަނުޖެހުން އޮތް ކަން ދައްކުވައިގެން މިނިވަން މި ގައުމުގައި ބާއްވާ ރިޔާސީ އިންތިޚާބުގެ ކަންކަން ހިންގަން ބޭރުގެ ބަޔަކު ގެންނަން ކަމަށް އޭނާ ތުހުމަތު ކުރެއްވި އެވެ. އޭނާ ވިދާޅުވިގޮތުގައި އިދިކޮޅަށް ނޫނެކޭ ބުނަނީ މިހެންވެއެވެ.
ޚަލީލް ކުރެއްވި އެހެން ޓުވީޓެއްގައި ވިދާޅުވީ ރައްޔިތުންގެ ތާއީދު ނެތުމުން، ރިޔާސީ އިންތިޚާބަށް ނުފޫޒު ފޯރުވަން އިދިކޮޅުން ފަށާފައިވާ މިފަދަ މަސައްކަތްތައް ރައްޔިތުން ހުއްޓުވާނެ ކަމަށެވެ. އަދި މަގުތައް ނާމާން ކުރުމަށް ކުރާ މަސައްކަތްތައް ގާނޫނުން ބަލި ކުރާނެ ކަމަށް އޭނާ ވިދާޅުވި އެވެ.
ޚަލީލް މިހެން ވިދާޅުވިއިރު، ގައުމުގެ އަމާންކަން ނަގާލަން ބަޔަކު ރާވަމުން ދާ ކަމަށް ދިފާއީ ވަޒީރު އެމަނިކުފާނުގެ ފޭސްބުކް ޕޭޖްގައި ވަނި ވިދާޅުފައެވެ. އެހެންނަމަވެސް އެ އިޝާރާތްކުރެއްވިފަދަ އެއްވެސް ކަމެއްގެ އަލާމާތެއް އަދި މިހާތަނަށް ފެނިފައެެއް ނުވެއެވެ. އަދި އަންނަ މަހު 23 ގައި އޮންނަ ރިޔާސީ އިންތިޚާބަށް ސަރުކާރު ހިންގާ ޕީޕީއެމުންވެސް އަދި އިދިކޮޅު ކޯލިޝަނުންވެސް ގެންދަނީ ވަރުގަދައަށް ކެމްޕެއިން ކުރަމުންނެވެ. ބަހުގެ ހޫނު ހަމަލާތަށް ފިޔަވާ އިތުރު އެއްވެސް ގޯހެއް މިހާތަނަކަށް ނުހިނގައެވެ.
