ޗާންދަލިޔާ ބުކްޝޮޕަށް ބޮޑު ބަދަލެއް!

ޗާންދަލިޔާ ބުކްޝޮޕަށް ބޮޑު ބަދަލެއް އެ ބުކްޝޮޕުން ގެނެސްފިއެވެ.

މިދިޔަ މަހު ފަހުކޮޅު މި ބަދަލު ގެނައީ ހ. ސަކީނާ މަންޒިލް ކައިރީގައި ހުންނަށް ޗާންދަލިޔާ ބުކްޝޮޕަށެވެ. އަދި މި ގެނައި ބަދަލާ އެކު ކަސްޓަމަރުންނަށް އެތަނުން ވިޔަފާރި ކުރުމަށް އިތުރަށް ލުއި ފަސޭހަވެގެންދާނެ ކަމަށް ޗާންދަލިޔާ އިން ބުނެއެވެ.

ހޮނިހިރު ދުވަހު ރާއްޖެއެމްވީއަށް ދެއްވި އިންޓަވިއުއެއްގައި ޗާންދަލިޔާގެ ޑިރެކްޓަރ ހުސެއިން ނަޒީރު ވިދާޅުވީ ޗާންދަލިޔާ ބުކްޝޮޕަށް ގެނައި ބަދަލަކީ ތަނުގެ "އެރޭންޖްމަންޓަށް" ގެނައި ބަދަލެއް ކަމަށާއި ކަސްޓަމަރުން އެންމެ ގިނައިން ގަންނަ އައިޓަމްތައް ވަރަށް ފަސޭހައިން ފެންނަ ގޮތަށް މިހާރު ޑިސްޕްލޭ ކުރެވިފައި ވާނެ ކަމަށެވެ. އެގޮތުން އެކި ވައްތަރުގެ ކަރުދާސްތައް ވަކިން އެއްތަނެއްގައި ބަހައްޓާފައިވާނެ ކަމަށާއި ފަންސުރާއި ގަލަމާއި ތެރަހުގެ އިތުރުން އެކި ކެޓަގަރީތަކުގެ ފޮތްތައް ވެސް އެއް ދިމާލެއްގައި ފަސޭހައިން ފެންނަ ގޮތަށް އަތުރާލާފައިވާނެ ކަމަށް ނަޒީރު ވިދާޅުވިއެވެ.

ނަޒީރު އިތުރަށް ވިދާޅުވީ ގެނެވުނު ބަދަލުގެ ސަބަބުން ތަނުގެ ޖާގަ ވަރަށް ބޮޑުވާނެ ކަމަށާއި ކަސްޓަމަރުންނަށް ވަރަށް ފަސޭހަކަމާ އެކު ވިޔަފާރި ކޮށްލެވޭނެ ކަމަށެވެ. އަދި ގެނެވުނު ބަދަލަށް ކަސްޓަމަރުންގެ ފަރާތުން ބޮޑު ތަރުހީބެއް ލިބެމުންދާ ކަމަށް ވެސް އޭނާ ވިދާޅުވިއެވެ.

ޗާންދަލިޔާ އިން އޮފީސް ސްޓޭޝަނަރީޒްގެ އިތުރުން އެކި އެޑިއުކޭޝަނަލް ފޮތްތަކާއި ދަބަސް ފަދަ އެއްޗެހި ލިބެން ހުރެއެވެ.

ޗާންދަލިޔާގެ އަމާޒަކީ ފެންވަރު ރަނގަޅު ކޮލެޓީ ޕްރޮޑަކްޓްތައް ކަސްޓަމަރުންނާ ހަމައަށް ފޯރުކޮށްދިނުމާއި ރާއްޖޭގެ އެކި ކަންކޮޅުތަކަށް ޗާންދަލިޔާގެ ވިޔަފާރި ފުޅާކުރުން ކަމަށް އެ ފަރާތުން ބުނެއެވެ.

ޗާންދަލިޔާގެ އެކި ބުކްޝޮޕްތައް މާލޭގެ އެކި ހިސާބުތަކުގަ އާއި އައްޑޫ ސިޓީގައި ހިންގަމުންދެއެވެ.