ބްރޯޑްކާސްޓަރުން ހަމަހަމަ ފުރުސަތު ދިނުމާ ގުޅޭ އުސޫލު އޭޖީއަށް ފޮނުވައިފި
ގެޒެޓް ކުރާނީ އޭޖީގެ ލަފާގެ މަތިން
ގުޅިފައިވާ ޕާޓީތަކުގެ ކެންޑިޑޭޓް އިބްރާހިމް މުހައްމަދު ސޯލިހު (އިބޫ) އާއި ރައީސް އަބްދުﷲ ޔާމީން ވާހަކަފުޅު ދައްކަވަނީ---
އިންތިހާބުތަކުގައި ވާދަކުރާ ކެންޑިޑޭޓުންނާއި ސިޔާސީ ޕާޓީތަކަށް ވަގުތު ދިނުމުގައި ބްރޯޑްކާސްޓަރުން ޢަމަލު ކުރަންވީ ހަމަތަކާއި، އެ ހަމަތަކާ ޚިލާފުވާ ބްރޯޑްކާސްޓަރުންނާ މެދު ފިޔަވަޅުއެޅުމުގެ އުޞޫލެއް އެކުލައި އެޓާނީ ޖެނަރަލް (އޭޖީ) އޮފީހަށް ފޮނުވާފައިވާ ކަމަށް ބްރޯޑްކާސްޓިން ކޮމިޝަން (ބްރޯޑްކޮމް) އިން ބުނެފިއެވެ.
ކެންޑިޑޭޓުންނާއި ޕާޓީތަކަށް ބްރޯޑްކާސްޓަރުން ހަމަހަމަ ފުރުސަތު ދިނުމުގެ އުސޫލު އުކުލަވާލީ އިންތިހާބުތަކާ ބެހޭ އާންމު ގާނޫނަށް ސަރުކާރުން ގެނައި އިސްލާހަކާ ގުޅިގެންނެވެ.
އިންތިހާބުތަކާ ބެހޭ އާންމު ގާނޫނަށް ގެނައި އެ ބަދަލުގައި ބުނެފައި ވަނީ އެ ސްޓޭޝަނަކުން ކެންޑިޑޭޓުންނަށް ކަނޑައަޅާފައިވާ ވަގުތަށް ވުރެ، އެއްވެސް މިންވަރަކަށް އިތުރު ވަގުތު، އެހެން ކެންޑިޑޭޓަކަށް ދީގެން ނުވާނެ ކަމަށާއި އަދި ވިއްކައިގެން ވެސް ނުވާނެ ކަމަށެވެ. ކެންޑިޑޭޓުންނަށް ހާއްސަކުރާ ވަގުތު ދިނުމުގައި ބްރޯޑްކާސްޓަރުން އަމަލުކުރަން ވާނީ ހަމަހަމަކަމާ އެކުގައި ކަމަށް އިސްލާހުގައި ވެއެވެ.
"ބްރޯޑްކޮމް"އިން ބުނީ ސިޔާސީ ޕާޓީތަކަށް ތާއީދު ހޯދުމުގެ ގޮތުން ބްރޯޑްކާސްޓަރުން ފޮނުވާ ޕްރޮގްރާމާއި އިޝްތިހާރަށް ވަގުތު ދިނުމުގައި އަމަލު ކުރަންވީ ހަމަތައް ބަޔާން ކުރާ ގަވާއިދަށް އިލެކްޝަންސް ކޮމިޝަން (އީސީ) އާއި ހިއުމަން ރައިޓްސް ކޮމިޝަން (އެޗްއާރްސީއެމް) އާއި ބްރޯޑްކާސްޓަރުންނާއި އާންމުންގެ ހިޔާލު ހޯދާފައިވާ ކަމަށެވެ.
އިންތިހާބުތަކާ ބެހޭ އާންމު ގާނޫނުގައި ބުނެފައިވާ ގޮތުން ބްރޯޑްކާސްޓްކުރާ ކޮންމެ ފަރާތަކުން ވެސް ވަގުތު ވިއްކާ ނަމަ، ވިއްކުމަށް ހަމަޖެހިފައިވާ އަގުތައް އާންމުކޮށް އިއުލާން ކުރަންވާނެއެވެ. އަދި ކެންޑިޑޭޓުންނަށް ވަގުތު ދޫކުރުމުގައި ނުވަތަ ވަގުތު ވިއްކުމުގައި ހަމަހަމަ އުސޫލެއް ގެންގުޅެންވާނެ ކަމަށް ވެސް ގާނޫނުގައި ބުނެފައި ވެއެވެ.
އެ ގާނޫނުގެ ދަށުން ބްރޯޑްކޮމް އިން އެކުލަވާލާފައިވާ އުސޫލު، ގާނޫނުގައި ކަނޑައަޅާފައިވާ ގޮތުން އަންނަ ބުދަ ދުވަހުގެ ކުރިން ގެޒެޓް ކުރަންޖެހޭނެއެވެ. އެ އުސޫލަށް އަމަލު ކުރަން ފަށާނީ އެޓާނީ ޖެނަރަލް ލަފާގެ މަތިން، އެ އުސޫލު ގެޒެޓް ކުރުމުންނެވެ.
