ޅ. ނައިފަރަށް ކުރިމަތިވެފައިވާ އެންމެ ބޮޑު ދަތިކަމަކީ ބިމުގެ ދަތިކަން ކަމަށް ނައިފަރު ކައުންސިލްގެ ރައީސް މުހައްމަދު ކާރިމް ވިދާޅުވެއްޖެއެވެ.

ރާއްޖެޓީވީގެ "ދާއިރާ" ޕްރޮގްރާމްގައި ވާހަކަ ދައްކަވަމުން ކާރިމް ވިދާޅުވީ ނައިފަރަކީ 5،378 މީހުންގެ އާބާދީއެއް އޮތް ރަށެއް ކަމަށާއި، މިހާރު އެރަށަށް ދިމާވެފައިވާ އެންމެ ބޮޑު މައްސަލައަކީ ބިމުގެ ދަތިކަން ކަމަށެވެ. ގެދޮރުގެ ދަތިކަމަކީ ޒަމާންވީ މައްސަލައެއް ކަމަށާއި، ރައީސް އަބްދުﷲ ޔާމިންގެ ދައުރުގައި ވެސް މިމައްސަލައަށް ހައްލު ހޯދައިދީފައި ނުވާ ކަމަށް އޭނާ ވިދާޅުވިއެވެ.

ކާރިމް ވިދާޅުވީ ނައިފަރު ރައްޔިތުން ތާއީދު ކުރާނީ ގޯތިގެދޮރުގެ ދަތިކަމަށް ހައްލު ހޯދައިދޭނެ ބަޔަކަށް ކަމަށާއި، މިސަރުކާރަށް ރައްޔިތުންގެ މެޖޯރިޓީ ތާއީދު ނުލިބޭނެ ކަމަށެވެ. އެއީ މިސަރުކާރުން 100 ހައުސިން ޔުނިޓް އަޅައިދޭނެ ކަމުގެ ހުވަފެން ރައްޔިތުންނަށް ދެއްކި ކަމަށާއި، މިއަހަރުގެ ބަޖެޓްގައި 14.6 މިލިއަން ރުފިޔާ ހިމަނާފައިވާ އިރު މިމަޝްރޫއުގެ އެއްވެސް ޚަބަރެއް ވެފައިނުވާ ކަމަށެވެ.

"މިދިޔަ ނޮވެންބަރުގައި ހައުސިން މިނިސްޓްރީން މިފޮނުވަނީ ތިމަންނަމެން 100 ހައުސިން ޔުނިޓް އަޅަން ބޭނުންވޭ އެބަ. އެހެންވީމަ ތިބޭފުޅުން ބިން ދައްކާށޭ. ފަނަރަވަރަކަށް ދުވަސް ވެސް އަޅުގަނޑުމެން ނުވާނެ މުޅި ލޮކޭޝަން އާއި ހުރިހާ ތަނެއް ކުރެހުމުން ދައްކާފައި އަޅުގަނޑުމެން ވަނީ ފޮނުވާފަ. އަދިއަދަށް ދަން ވެސް އަޅުގަނޑުމެންނަށް ޖަވާބެއް ނުލިބޭ،" ކާރިމް ވިދާޅުވިއެވެ.

ނައިފަރުގެ ތަރައްގީގެ މަޝްރޫއުތަކަށް އަލިއަޅުއްވައިލައްވަމުން ކާރިމް ވިދާޅުވީ ބަނދަރުގެ ހެދުމުގެ މަޝްރޫއު ނިމިފައިވާ ކަމަށާއި، ފެނާއި ނަރުދަމާގެ މަސައްކަތް ކުރިއަށް ނުދާ ކަމަށެވެ. ކާރިމް ވިދާޅުވީ ފެނާއި ނަރުދަމާގެ މަސައްކަތް ހަވާލުކުރީ 18 މަސްދުވަހުން ނިންމަން ކަމަށާއި، ނަމަވެސް 14 މަސް ފާއިތުވެގެން ދިޔައިރު ވެސް މަސައްކަތުގެ 10 އިންސައްތަ ކުރިއަށް ނުދާ ކަމަށެވެ. 

މީގެ އިތުރުން ކާރިމް ވިދާޅުވީ ނައިފަރު ހޮސްޕިޓަލުން އެކަށީގެންވާ ޙިދުމަތް ނުލިބޭ ކަމަށާއި، ހުރީ ފަސް ފަންގިފިލާ ހިމެނޭ ބޮޑު އިމާރާތެއް ކަމަށެވެ. އޭނަ ވިދާޅުވީ އެތެރެ ހަށީގެ ޑޮކްޓަރެއް ނެތްތާ ދެ އަހަރަށް ވުރެ ގިނަ ދުވަސްވެފައިވާ ކަމަށާއި އަންހެނުންގެ ޚާއްސަ ޑޮކްޓަރާއި، ކުޑަ ކުދިންނަށް ޚާއްސަ ޑޮކްޓަރު ނުހުންނަ ފަހަރު ގިނަ ކަމަށެވެ. އަދި ހޭނައްތާ ޑޮކްޓަރެއް ނެތުމުން އަންހެނަކު ސިޒޭރިއަންއަކަށް ދާންޖެހޭ ހާލަތްތަކުގައި ރަށުން ބޭރުން ފުރަން ޖެހޭ ކަމަށެވެ.

"ޑޮކްޓަރުން ނެތް ހާލެއްތަކުގައި އާސަންދައިން ފޮނުވާލަދޭން ވެސް އެތައް ފަހަރަކު ހޮސްޕިޓަލް ތެރޭގައި އެތައް ހައިޖާނެއް ހިންގަންޖެހޭ. އެތައް ގަނޑުބަނޑުތަކެއް ހަދަންޖެހޭ. ހެދިގެން ގިނަ ފަހަރަށް ޓްރާންސްފާރއެއް ޕޭޝަންޓަށް ލިބިގެން މިދަނީ. މަދު ހާލަތެއް މިހެން ދެންނެވިއަސް ފަސޭހައިން ނުދެވޭ ވާހަކައެއް ނޫން،" ކާރިމް ވިދާޅުވިއެވެ.

ނައިފަރަކީ މަސްވެރިކަމަށް ވަރަށް ބޮޑަށް ބަރޯސާވެފައިވާ ރަށެއް ކަން ފާހަގަކުރައްވައި ކާރިމް ވިދާޅުވީ ރައީސް ޔާމިން އެރަށުގެ މަސްވެރިންނަށް ވީ ވައުދު ވެސް މި ސަރުކާރުން ނުފުއްދާ ކަމަށާއި، މަސްވެރިން މިއަދު މަސައްކަތް ކުރަނީ ވަރަށް ދަތި އުނދަގޫކޮށް ކަމަށެވެ. އެގޮތުން މަސްވެރިން ކިރުވާ މަސްކޮޅަށް އެކަށީގެންވާ އަގު ނުލިބޭ ކަމަށާއި، އަގު ލިބެނީ ވެސް ދެހަފްތާ ނުވަތަ ތިން ހަފްތާ ފަހުން ކަމަށެވެ.