ކުޅުދުއްފުށީގައި ހަދާފައިވާ ރޯހައުސްތައް އެތައް އަހަރެއްވީއިރުވެސް އަދިވެސް ނުދީ ވީރާނާވާން ދޫކޮށްލާފައިވާތީ ރައްޔިތުން ކަންބޮޑުވާންފަށައިފިއެވެ.

ރައީސް މުހައްމަދު ނަޝީދުގެ ސަރުކާރުން އޭރު ހިންގި ބޯހިޔާވަހިކަމުގެ މަޝްރޫއުގެ ދަށުން ރަށްރަށުގައި ހަދަން ފެށި ރޯހައުސްތަކާއި ފްލެޓްތަކުގެ ތެރެއިން ކުޅުދުއްފުށީގައި ވަނީ 166 ޔުނިޓް އަޅަން ފަށާފައެވެ. އޭގެ ތެރެއިން 18 ރޯހައުސްގެ މަސައްކަތް ނިމިފައި ހުންނަތާ އެތައް ޒަމާނެއްވެފައިވާއިރު، އިތުރު 40 ރޯހައުސްގެ އިމާރާތްކުރުމުގެ މަސައްކަތް ވެސް މިހާރު ވަނީ ނިމިފައެވެ. އެތަންތަނުގައި ހަމައެކަނި ނުނިމި ހުރީ ނަރުދަމާ އެޅުމުގެ މަސައްކަތް އެކަންޏެވެ.

ނިމިފައި ހުރި 18 ރޯހައުސްގެ ގުރުއަތުނަގައި އެތަންތަން ލިބޭ މީހުންނަށް އެކަން އޮތީ 2016 ވަނަ އަހަރުގެ ތެރޭގައި އަންގާފައެވެ. އަދި އެއްކޮށް ނިމިފައި ހުރި އަނެއް 40 ރޯހައުސް ނިމުމުން ޝަރުތު ހަމަވާ މީހުންގެ މެދުގައި އޭރު ގުރުނެގުމަށް ކުރި މަސައްކަތް ހައުސިން މިނިސްޓްރީން ހުއްދަ ނުދީގެން އޮތީ މަޑުޖައްސާލާފައެވެ. އަދިއަދަށް ދާންންދެން ވެސް އެކަން އޮތީ ހުއްޓިފައެވެ. އެކަން އޭރު ހުއްޓުވީ ރޯހައުސް ދިނުމުގެ އުސޫލާއި ކައުންސިލުން ޚިލާފްވެފައިވާ ކަމަށްބުނެއެވެ.

ރާއްޖެއެމްވީއަށް މައުލޫމާތު ދެއްވަމުން ކުޅުދުއްފުށި ކައުންސިލް މެންބަރު އަލީ ހާޝިމް ވިދާޅުވީ، ރައީސް ނަޝީދުގެ ސަރުކާރުން އެރަށުގެ ރައްޔިތުންނަށް ދިމާވެފައިވާ ބޯހިޔާވަހިކަމުގެ މައްސަލައަށް ހައްލެއް ހޯދައިދިނުމަށް އަޅައިދިން ރޯ ހައުސްތައް އޭގެ ހައްގުވެރިންނަށް ނުދީ މި ސަރުކާރުން ލަސްކުރަމުންދާ ސަބަބެއް ނުވިސްނޭ ކަމަށެވެ.

އޭނާ ވިދާޅުވީ އެތަންތަން މިހާރު ހުރީ އަލުން މަރާމާތުކޮށްގެން ނޫނީ ނުވަދެވޭ ވަރުވެފައިކަމަށެވެ. އަދި ކުޅުދުއްފުށީ ހިއްކި ބިމުގައި އަޅަންފެށި 100 ރޯހައުސްގެ ވެސް ބޮޑުބައި ނިމިފައިވާއިރު، ފުރާޅުތައް އެއްލާލާ، ވަކަރުތައް ފީވެ ހަސްނެތެމުންދާ ކަމަށެވެ.

އޭނާ ވިދާޅުވިގޮތުގައި ގެދޮރުގެ ދަތިކަން އިންތިހާއަށް އެރަށަށް ކުރިމަތިވެފައިވާއިރު، އެތަންތަން ހަލާކުވާން ދޫކޮށްލާފައި ހުރުމަކީ ރަށުގެ ވަރަށް ގިނަ ރައްޔިތުންގެ ކަންބޮޑުވުން އެކަމުގައި އޮތްކަމެއް ކަމަށެވެ. އަދި ވީހާވެސް އަވަހަށް އެތަންތަން އަލުން މަރާމާތުކޮށް ރައްޔިތުންނަށް ލިބޭނެގޮތް ހަދައިދިނުމަށް ސަރުކާރަށް ގޮވާލާކަމަށް ހާޝިމް ވިދާޅުވިއެވެ.

ކުޅުދުއްފުށީގެ ރޯހައުސް ދޫކުރަން ހަމަޖެހިފައިވަނީ ރަށުންނާއި ރަށުން ބޭރު މީހުންނަށެވެ. 60 އިންސައްތަ ރަށުގެ މީހުންނަށް ދޫކުރުމަށް ހަމަޖެހިފައިވާއިރު 40 އިންސައްތަ ރަށުން ބޭރުމީހުންނަށް ދޫކުރުމަށް އޮތީ ހަމަޖެހިފައެވެ.