12 މެމްބަރުން މަޖިލީހަށް ވަނުމަށް ފުލުހުން ހުރަސް އަޅައިފި
1 އޯގަސްޓު 2018 | ބުދަ 08:31މަޖިލީހާ ގުޅޭ ސަރަހައްދުގެ މަގުތައް ބަންދުކޮށްފައި
12 މެމްބަރުން މަޖިލީހަށް ވަނުމަށް ހުރަސް އަޅާފައި
ގޮނޑި ގެއްލިފައިވާ ކަމަށް ބުނާ ރައްޔިތުންގެ މަޖިލީހުގެ 12 މެމްބަރުން މަޖިލީހުގެ ޖަލްސާގައި ބައިވެރިވެވަޑައިގަތުމަށް، މަޖިލީހަށް ވަދެވަޑައިގަތުމަށް ފުލުހުން ހުރަސް އަޅައިފިއެވެ.
ބުދަ ދުވަހުގެ މެންދުރުފަހު 1:00ގައި ފެށި މަޖިލީހުގެ ޖަލްސާގައި ބައިވެރިވެވަޑައިގަަތުމަށް 12 މެމްބަރުން މަޖިލީހަށް ވަޑައިގަންނަވަން އުޅުއްވުމުން، އެ ބޭފުޅުން މަޖިލީހަށް ވެންނެވުމަށް ހުރަސް އަޅާފައި ވަނީ މަޖިލިސްކުރާ އިމާރާތް ހިމެނޭ ސަރަހައްދުގައި ބެރިކޭޑު ޖަހައިގެންނެވެ. މަޖިލީހާ ގުޅިފައިވާ މަގުތައް ފުލުހުން ބަންދުކުރީ ބުދަ ދުވަހުގެ ހެނދުނުން ފެށިގެންނެވެ.
ފުލުހުންގެ ހުރަސްއެޅި ނަމަވެސް 12 މެމްބަރުން ގެންދަވަނީ މަގުމަތީގައި ތިބެ އިހްތިޖާޖު ކުރަމުންނެވެ. ބެރިކޭޑު ޖަހައި، އެ މެމްބަރުން ކުރިއަށް ނުގެންދެވޭނެ ގޮތަށް ފުލުހުން ހުރަސް އަޅާފައިވާއިރު، މަޖިލިސް ކުރާ އިމާރާތުގައި ސިފައިން ގެންދަނީ ފޯރިމަރަމުންނެވެ.
މަޖިލީހުގައި ކުރިއަށްދާ ޖަލްސާގައި ކުރިއަށް ދަނީ ފޮނަދޫ ދާއިރާގެ މެމްބަރު އަބްދުއްރަހީމް އަބްދުﷲ ގާނޫނުލް އުގޫބާތަށް ހުށަހެޅި ބިލަށް ބަހުސް ކުރުމުގެ މަރުހަލާއެވެ. އޭނާ ހުށަހެޅުއްވި ބިލަކީ ރިޝްވަތާ ގުޅޭ ކުށް ބަޔާން ކުރާ އިސްލާހެވެ. އެ ބިލު މަޖިލީހަށް ހުށަހެޅީ ރިޝްވަތުގެ ކުށް އުވާލަން ޕީޕީއެމުން ބިލެއް ހުށަހެޅި މައްސަލަ ފެންމަތިވެފައިވަނިކޮށެވެ.
