ރަށްވެފައިވާ ރަށް ނޫން އެހެން ތަނެެއްގައި ވޯޓުލުމަށް ބޭނުންވާ ފަރާތްތަކުން ބޭނުންވާ މައުލޫމާތު އޮޅުން ފިލުވައި ދިނުމަށް ގުޅިފައިވާ ޕާޓީތަކުން ހޮޓްލައިން ނަމްބަރެއް ތައާރަފްކޮށްފިއެވެ.
ގުޅިފައިވާ ޕާޓީތަކުން ރީރަޖިސްޓްރޭޝަނަށް ހާއްސަކޮށްފައިވާ ހޮޓްލައިން ނަމްބަރަކީ 7776982 އެވެ.
ގުޅިފައިވާ ޕާޓީތަކުގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިހު (އިބޫ)ގެ ސްޕޯކްސްޕާސަން މާރިޔާ އަހުމަދު ދީދީ ވިދާޅުވީ އެ ނަމްބަރަށް ގުޅާލުމުން ރީރަޖިސްޓްރޭޝަނާ ގުޅޭ މައުލޫމާތުގެ އިތުރުން، އިންތިހާބާ ގުޅޭ ގޮތުން އުފެދޭ ސުވާލުތަކަށް ވެސް ޖަވާބު ދޭނެ ކަމަށެވެ.
"އެންމެ ރަނގަޅު ތިޔަ ބޭފުޅުންގެ ހިތުގައި އުފެދޭ ސުވާލަކަށް ވިޔަސް، އަދި އެ ނޫން ކަމެެއް ވިޔަސް. ހަމަ މި ނަންބަރާ ގުޅުއްވައި، ތިޔަބޭފުޅުން ކަންކަން ރަނގަޅަށް އޮޅުން ފިލުއްވައިގެން މި ރަޖިސްޓްރޭޝަންގެ ކަންކަން ވީހާ ވެސް އަވަހަށް ކުރެއްވުމަކީ އަޅުގަނޑުމެން އިލްތިމާސްކުރާ ކަމެއް،" މައްޗަންގޮޅީ އުތުރު ދާއިރާގެ މެމްބަރުކަން ވެސް ކުރައްވާ މާރިޔާ ވިދާޅުވިއެވެ.
މާރިޔާ ވިދާޅުވީ ބައެއް އޮފީސްތައް މެދުވެރިކޮށް، ފުރިހަމަ ކުރާ ރީރަޖިސްޓްރޭޝަން ފޯމުތަކުގައި ވޯޓުލުމަށް ބޭނުންވާ ތަނުގެ ނަން، ޔަގީން ނުކޮށް، ފޯމު ފުރުމުގެ ސަބަބުން، ބޭނުންވާ ތަން ނޫން އެހެން ތަނަކަށް ރީރަޖިސްޓްރީ ކުރަމުންދާ ކަމުގެ މައުލޫމާތު ލިބެމުންދާ ކަމަށެވެ. އަދި އެފަދަ އޮފީސްތައް މެދުވެރިކޮށް، ގަސްތުގައި އޮޅުވާލައިގެން ރީރަޖިސްޓްރޭޝަން ފޯމު ފުރާ ފަރާތްތަކުގެ މައްޗަށް ޖިނާއީ ދައުވާ އުފުލޭނެ ކަމަށް މާރިޔާ ވިދާޅުވިއެވެ.
"ސަރުކާރުގެ އޮފީހެއްގައި މިކަން ކުރައްވަން އިންނަވާ ބޭޭފުޅާ ވެސް އެ ނަންގަވަނީ ވަރަށް ބޮޑު ޒިންމާއެއްކަން، އެބަ ހަނދާން ކުރައްވަންޖެހޭ. ގަސްތުގައި އެކަހަލަ ކަމެއް އޮޅުވާލެެވިއްޖެނަމަ، ބޮޑު ޖިނާއީ ކުށަކަށް ވާނެ. އެ ބޭފުޅުންނަށް އަދަބު ލިބޭނެކަން އެ ބޭފުޅުން ހަނދުމަފުޅު ކުރައްވާ. މިގޮތަށް މިކަން ނުކުރެއްވުމަށް އަޅުގަނޑުމެން ނަސޭހަތްތެރިވަން،" މާރިޔާ ވިދާޅުވިއެވެ.
އަންނަ މަހުގެ 23 ވަނަ ދުވަހު ބާއްވާ ރިޔާސީ އިންްތިހާބުގައި ވޯޓުލުމުގެ ހައްގު ލިބިގެންވާ މީހުންގެ ތެރެއިން, ރަށްވެހިވެފައިވާ ރަށް ނޫން އެހެން ތަނެއްގައި ވޯޓުލުމަށް ބޭނުންވާ ފަރާތްތަކުން ރީ-ރަޖިސްޓްރީ ކުރުމުގެ ފުރުސަތު މި މަހުގެ 12 ވަނަ ދުވަހުގެ ނިޔަލަށް ވަނީ ހުޅުވާލާފައެވެ.
