'ދަޅަކް' ރިލީޒް ކުރިތާ 12 ދުވަސް: އަދި ވެސް ދަނީ ބޮޑު ތަރުހީބެއް ލިބެމުން

ޝަޝާންކް ކެއިތަން ޑައިރެކްޓް ކޮށްފައިވާ ފިލްމް " ދަޅަކް" ރިލީޒް ކުރިތާ 12 ދުވަސް ވެފައިވާ އިރު ވެސް އެ ފިލްމަށް ދަނީ ބޮކްސް އޮފީހުގައި ބޮޑު ތަރުހީބެއް ލިބެމުންނެވެ.

ޖާންވީ ކަޕޫރާއި އިޝާން ޚައްތަރު ލީޑް ރޯލުން ފެނިގެންދާ މި ފިލްމަށް ބޮކްސް އޮފީހުގައި މިހާތަނަށް ލިބުނު އާމްދަނީ 63.39 ކްރޯޑް ރުޕީސް އަށް އަރާފައިވާ ކަމަށް ޚަބަރުތައް ބުނެއެވެ.

މި ފިލްމް އެޅުވި ފުރަތަމަ ދުވަހު އާމްދަނީގެ ގޮތުގައި 8.50 ކުރޯޑް ރުޕީޒް ލިބިފައެވެ. އެހެން ކަމުން މި ފިލްމް ވެފައި މިވަނީ ބޮލީވުޑަށް އަލަށް ތަޢާރަފްވާ ތަރިން ކުޅެފައިވާ ފިލްމްތަކުގެ ތެރެއިން ފިލްމް ރިލީޒްކުރި ފުރަތަމަ ދުވަހު އެންމެ ބޮޑު އާމްދަނީއެއް ލިބިގެންދިޔަ ފިލްމަށެވެ.

"ދަޅަކް" އަކީ ކާމިޔާބު މަރާތީ ފިލްމް "ސައިރާތް" އަސްލަކަށް ބަލައިގެން ހަދާފައިވާ ފިލްމެކެވެ.

މި ފިލްމުން ބޮލީވުޑަށް އަލަށް ތަޢާރުފުވާ ޖާންވީ ކަޕޫރަކީ ބޮލީވުޑްގެ ކާމިޔާބު ބަޠަލާ ސްރީ ދޭވީގެ ދަރިފުޅެވެ. އަދި ދަޅަކްގެ ފިރިހެން ލީޑްގެ ގޮތުގައި ބޮލީވުޑަށް ތަޢާރުފުވާ އިޝާން ޚައްތަރަކީ ބޮލީވުޑްގެ އެކްޓަރ ރާޖޭޝް ޚައްތާރާއި ޓީވީ އެކްޓްރެސް ނީލިމާ އަޒީމްގެ ދަރިފުޅެވެ. އަދި ކާމިޔާބު ގިނަ ފިލްމުތަކެއް ކުޅެފައިވާ ޝާހިދު ކަޕޫރަކީ އިޝާންގެ އެއްބަނޑު ބޭބެއެވެ.