ހަންޏާމީދޫން ރަނިންގމޭޓް ފައިސަލްއަށް ޙޫނު މަރުޙަބާއެއް ދަންނަވައިފި
31 ޖުލައި 2018 | އަންގާރަ 06:41މި ބައްދަލުވުމުގައި ގިނަ އަދަދެއްގެ ރައްޔިތުން ބައިވެރިކަން ފާހަގަކޮށްލެވޭ
ހަންޏާމީދޫއިން ފައިސަލް އަށް މަރުޙަބާ ދަންނަވަނީ
ގުޅިފައިވާ ސިޔާސީ ޕާޓީތަކުގެ ފަރާތުން އިންތިހާބުގައި ވާދަކުރައްވާ އެމްޑީޕީގެ ކެންޑިޑޭޓް އިބްރާހިމް މުހައްމަދު ސޯލިހު (އިބޫ)ގެ ރަނިންގްމޭޓް ފައިސަލް ނަސީމް ހަންޏާމީދޫއަށް ވަޑައިގަތުމުން އެރަށު ރައްޔިތުން ޙޫނު މަރުޙަބާއެއް ދަންނަވާއިފިއެވެ.
ފައިސަލް ހަންޏާމީދޫއަށް ވަޑައިގެންނެވީ އަންގާރަ ދުވަހު ހެނދުނެވެ. ގުޅިފައިވާ ސިޔާސީ ޕާޓީތަކަށް ތާއިކުރައްވާ ރައްޔިތުން ފައިސަލްއަށް މަރުޙަބާ ދަންނަވާފައި ވަނީ އެރަށު ބަނދަރު ސަރަހައްދުންނެވެ. މިދަތުރުގައި ގުޅިފައިވާ ސިޔާސީ ޕާޓީތަކުގެ ބައެއް އިސްވެރިން ބައިވެރިވަޑައިގަންނަވާއިރު، ފައިސަލް ވަނީ ހަންޏާމީދޫގައި ކެމްޕެއިންގައި އިސްކޮށް ހަރަކާތްތެރިވާ އަންމު ރައްޔިތުން ބައްދަލުކުރައްވާފައެވެ.
މި ބައްދަލުވުމުގައި ފައިސަލްގެ އިތުރުން އެމްޑީޕީގެ ނައިބް ރައީސް މުހައްމަދު ޝިފާޒު، ރައްޔިތުންގެ މަޖިލީހުގެ މެމްބަރު އިބްރާހިމް ޝަރީފް، ރައްޔިތުންގެ މަޖިލީހުގެ މެމްބަރު އަނާރާ ނައީމްގެ އިތުރުން ޖުމްހޫރީ ޕާޓީގެ ދެ ކައުންސިލް މެމްބަރުން ކަމަށްވާ އާދަމް އާޒިމާއި، މުހައްމަދު މަލީހު ބައިވެރިވަޑައިގެންނެވިއެވެ.
ފައިސަލް ހަންޏާމީދޫގެ ރައްޔިތުންނާއި ބައްދަލުކުރައްވަނީ
ދެ ދުވަހުގެ މި ދަތުރުފުޅުގައި ހޯމަ ދުވަހު ފައިސަލް ވަނީ މަންދޫ، ފެންފުށީ، ދިއްދޫ އަދި ދިގުރަށަށް ވަޑައިގެންފައެވެ. އަންގާރަ ދުވަހު ހަންޏާމީދޫ، އޮމަދޫ، މަހިބަދޫ، ކުނބުރުދޫ އަދި މާމިގިއްޔަށް ވަޑައިގަންނަވާނެއެވެ. މި ދަތުރުގައި ފައިސަލް ދެން ވަޑައިގެންނުމަށް ހަމަޖެހިފައި ވަނީ އެ އަތޮޅު މަހިބަދޫއަށެވެ.
