ޝަރުތަކާއި ނުލައި ރަނިންގމޭޓްކަން ޤަބޫލުކުރީ ރައީސް ޔާމީންގެ އެދިވަޑައިގަތުމުގެ މަތިވެރިކަމުން: ޑރ. ޝަހީމް
ދީނާ ގުޅޭ ހުރިހާ ކަމެއް ހަވާލުކުރައްވާނެ ކަމަށް ރައީސް ވިދާޅުވި
ޕީޕީއެމުން ބޭއްވި ނޫސްވެރިންގެ ބައްދަލުވުމުގައި ޝަހީމް ވާހަކަ ދައްކަވަނީ
ރައީސުލް ޖުމްހޫރިއްޔާ އަބްދުﷲ ޔާމީންގެ ރިނިންގމޭޓްގެ މަޤާމު ޝަރުތަކާ ނުލައި ޤަބޫލުކުރެއްވީ އެމަނިކުފާނުގެ އެދިވަޑައިގަތުމުގެ މަތިވެރިކަމުން ކަމަށް ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
ހޯމަ ދުވަހު ޕީޕީއެމްގެ އޮފީހުގައި އޮތް ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޑރ. ޝަހީމް ވިދާޅުވީ ރައީސް ޔާމީންގެ ރަނިންގމޭޓަކަށް ޝަހީމް ގެންނެވުމަށް އެމަނިކުފާނު ނިންމެވީ އިސްލާމީ ކަންތައްތަކާއި އިސްލާމީ ވަހުދަތު ދެމެހެއްޓުމަށް ކަމަށެވެ. ރަނިންގމޭޓުކަމަކީ ދަހިވެތިވެވަޑައިގެންނެވި ކަމެއް ނޫންކަން ފާހަގަކުރައްވައި ޑރ. ޝަހީމް ވިދާޅުވީ އޭނާގެ ހިތް ރަނިންގމޭޓް ކަމަށް ތަނަވަސްވެގެންދިޔައީ ކީރިތި ރަސޫލާގެ ސުންނަތާ އެއްގޮތަށް މި ކަމުގައި އަމަލު ކުރެއްވުމުން ކަމަށެވެ.
"އަޅުގަނޑު އިސްލާމީ ދާއިރާއަށް ނިސްބަތްވާ މީހެއްގެ ހައިސިއްޔަތުން އަދި ކަންކަން ކުރުމުގެ ކޮންމެވެސް ވަރެއްގެ ޤާބިލްކަން ލިބިފައިވާ މީހަކަށް ވާތީވެ، ރާއްޖޭގެ ވަލީއުލް އަމްރު އަޅުގަނޑުގެ ކިބައިން އެދިވަޑައިގަތް އެދިވަޑައިގަތުމަކީ ވަރަށް މަތިވެރި އެދިވަޑައިގަތުމެއް، އެކަމުގެ މަތިވެރިކަމަށްޓަކައި އެއްވެސް ޝަރުތެއް ނެތި އަޅުގަނޑު ވަނީ އެކަން ޤަބޫލުކޮށްފައި" ޝަހީމް ވިދާޅުވިއެވެ.
ރައީސް ޔާމީންގެ ސަރުކާރުގެ އިސްލާމިކް މިނިސްޓަރުކަމުން އިސްތިއުފާ ދެއްވީ އަދާލަތު ޕާޓީގެ ރައީސް ޝެއިހް އިމްރާން އަބްދުﷲ ބަންދުވެގެންދިޔުމާ ގުޅިގެން ކަމަށާއި އެކަމުގައި ވަރަށް ބޮޑު ހިތާމަވެރިކަމެއް މެދުވެރި ކަމަށް ވެސް ޑރ. ޝަހީމް ވިދާޅުވިއެވެ. އަދި މްރާނަށް އެހީވުމަށްޓަކައި ސަރުކާރުގައި މަޑުކުރުމަށް އޭރު ވެސް ރައީސް ޔާމީން އެދިވަޑައިގަތް ކަމަށް ޝަހީމް ވިދާޅުވިއެވެ.
"ސަރުކާރުން އިސްތިއުފާ ދިނުމަށް ފަހުގައި އިދިކޮޅު ހަރަކާތުގެ ތެރެއަށް އަޅުގަނޑު ދާން ބޭނުންނުވީ. އެއީ އަޅުގަނޑުގެ ކިތަންމެ ގާތް އަހެއް (ޝެއިހް އިމްރާން އަކީ) ނަމަވެސް އެ ބޭފުޅަކު އެވަޑައިގަންނަވަނީ އަޅުގަނޑަށް ޤަބޫލުނުކުރެވޭ ހަމައެއްގެ ތެރެއިން ކަމަށް ވާނަމަ އަޅުގަނޑަށް އޭގެ ތެރެއަކަށް ނުވަދެވޭނެ. އަޅުގަނޑަކީ ވެސް ވަކި އުސޫލުތަކެއް ޤަބޫލު ކުރާ މީހެއް. އެހެންވީމަ ވަރަށް އިހްތިރާމާ އެކު އަޅުގަނޑުމެން ދެމީހުން ސިޔާސީ ގޮތުން ވަކިވެގެންދިޔައީ. މިއަދާ ހަމައަށް ވެސް ސިޔާސީ ގުޅުމެއް އަޅުގަނޑާއި ޝެއިހް އިމްރާނަކާ ނެތް،" ޝަހީމް ވިދާޅުވިއެވެ.
ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޑރ. ޝަހީމް ވިދާޅުވީ އިލްމުވެރިން ނިކުމެވަޑައިގެން ވެރިކަން ވައްޓާލަން އުޅެފިކަމުގައިވާ ނަމަ، އެ އިލްމުވެރިޔަކު އެމީހުން އުންމީދު ނުކުރާ ހާލަތަކަށް ހިނގައިދާނެ ކަމަށާއި ޤާނޫނީ ވެރިކަން ބަދަލުކުރަން އުޅެފިކަމުގައި ވާނަމަ އޭގެ ހިތި ނަތީޖާ ފެނިގެން ހިނގައިދާނެ ކަމަށެވެ.
