ބާރުތައް ހިފެހެއްޓިފައި އޮތް އޮތުން ނިމުމަކަށް އަންނާނެ: ސިޓީ ކައުންސިލް
ރައްޔިތުންނަން އަޅާލޭނެ ބައެއް މިއަދު ނެތް
އިބޫ މާލޭ ސިޓީ ކައުންސިލަށް ވަޑައިގަތުމުން ސިޓީ ކައުންސިލްގެ މޭޔަރު ޝިފާ މަރުޙަބާ ދަންނަވަނީ
ގުޅިފައިވާ ސިޔާސީ ޕާޓީތަކުގެ ވެރިކަމުގައި ލާމަރުކަޒީ ނިޒާމްގެ ހުރިހާ ބާރުތަކެއް ރައީސް އަބްދުﷲ ޔާމީންގެ ހިފަހައްޓާފައި އޮތް އޮތުމަށް ނިމުމެއް އަންނާނެ ކަމަށް މާލޭ ސިޓީ ކައުންސިލުން ބުނެފި އެވެ.
ގުޅިފައިވާ ޕާޓީތަކުގެ ފަރާތުން އިންތިހާބުގައި ވާދަކުރައްވާ އެމްޑީޕީގެ ކެނޑިޑޭޓް އިބްރާހިމް މުހައްމަދު ސޯލިހު އާއި އެމަނިކުފާންގެ ރަނިންގމޭޓް ކާށިދޫ ދާއިރާގެ ރައްޔިތުންގެ މަޖިލީހުގެ މެމްބަރު ފައިސަލް ނަސީމް މާލޭ ސިޓީ ކައުންސިލާއި ބައްދަލުކުރެއްވުމާއި ގުޅިގެން ބުދަ ދުވަހު އެ ސިޓީ ކައުންސިލްގެ މޭއަރު، ޝިފާ މުހައްމަދު ވިދާޅުވީ ސިޓީ ކައުންސިލްގެ ހުރިހާ ބާރުތަކެއް ރައީސް ޔާމީން ސަރުކާރުގެ އެކި މިނިސްޓްރީތަކަށް ބަހާލާފައިވާއިރު، ރައްޔިތުން އަޅާލާނެ ބައެއް މިއަދު ނެތް ކަމަށެވެ. އެހެންކަމުން ކައުންސިލްތަކަށް ލިބެދޭ ބާރުތަކަށް ގުޅިފައިވާ ސިޔާސީ ޕާޓީތަކުގެ ވެރިކަމެއްގައި ލިބޭނެ ކަމަށާއި އެއީ ރައްޔިތުން އެދޭ ގޮތް ކަމަށް ވެސް ޝިފާ ވިދާޅުވިއެވެ.
"އަޅުގަނޑުމެންގެ މަޝްވަރާގެ ތެރެއިން މައިގަނޑު ގޮތެއްގައި ލާމަރުކަޒީ ނިޒާމް ހަލާކުވެފައި އޮތް ވަރު ހިއްސާކުރެއްވުނު. އަދި ހަމައެކަނި މާލޭ ސިޓީ އަކަށް ނޫން، މުޅި ރާއްޖެއަށް ވެސް ލާމަރުކަޒީ ނިޒާމުގެ ހުރި ގާނޫނުތަކާއި ގަވައިދުތަކަށް ބަދަލުތައް ގެނެސް، ގާނޫނުތަކަށް އެގޮތް މި ގޮތް ހެދުމުގެ ސަބަބުން ހުރިހާ ބާރެއް ހުރިހާ ބާރެއް ރައީސް އޮފީހުގެ ތެރޭގައި ހިފެހެއްޓިފައި އޮތް އޮތުމުގެ ސަބަބުން އޭގެ އެންމެ ބޮޑަތި ދަތިތަށް ތަޙައްމަލު ކުރަމުން ގެންދަވަނީ ރައްޔިތުން" ޝިފާ ވިދާޅުވިއެވެ.
ސިޓީ ކައުންސިލްގެ ބައްދަލުވުމުގައި ބައިވެރިވަޑައިގެންނެވި ރައްޔިތުން މަޖިލީހުގެ ބައެއް މެމްބަރުންނާއި ކައުންސިލް މެމްބަރުން
މާލޭ ސިޓީގެ ޑެޕިއުޓީ މޭޔަރު ސަމާއު ޝަރީފް ވިދާޅުވީ ގުޅިފައިވާ ޕާޓީތަކެއްގެ ވެރިކަމެއްގައި ލާމަރުކަޒީ ނިޒާމަށް ވަރަށް އުންމީދީ ދުވަސްތަކެއް އޮތް ކަމަށެވެ. ރިޔާސީ ކެނޑިޑޭޓް އިބޫ ދައުލަތުގެ މުވައްސަސާތަކާއި ކައުންސިލްތަކާއި ކެމްޕެއިންގައި ކުރައްވާ ބައްދަލުވުންތަކުގެ ތެރެއިން މާލޭ ސިޓީ ކައުންސިލާއި ބައްދަލުކުރެއްވުމުން ލާމަރުކަޒީ ނިޒާމް ހަރުދަނާ ކުރުމަށް ގުޅިފައިވާ ޕާޓީޓަކުން އިސްކަމެއް ދޭނެކަން ހާމަވެގެން ހިގައްޖެ ކަމަށްވެސް އޭނާ ވިދާޅުވި އެވެ.
މާލޭ ސިޓީ ކައުންސިލާއި އިބޫ ބައްދަލުކުރެއްވީ ކުރީގެ މާފަންނު އަވަށު އޮފީހުގައި ހުންނަން ސިޓީކައުންސިލް ގެ އިދާރާގައެވެ. މި ބައްދަލުވުމުގައި ސިޓީ ކައުންސިލްގެ ހުރީ މެމްބަރުން ބައިވެރިވަޑައިގެންނެވިއިރު، މާލޭ އަށް ނިސްބަތްވެވަޑައިގަންނަވާ ރައްޔިތުންގެ މަޖިލީހުގެ ބައެއް މެމްބަރުން ވެސް ވަނީ ބައިވެރިވެވަޑައިގެންފައެވެ.
