ތިމާވެއްޓާ ގުޅޭ ދެ މުއާހަދާއެއްގައި ރާއްޖެއިން ސޮއިކުރުމަށް ރައީސް ނިންމަވައިފި
މި ދެ މުއާހަދާގައި ބައިވެރިވުމަށް ނިންމެވީ މިއަދުގެ ވަޒީރުންގެ ބައްދަލުވުގައި މަޝްވަރާކުރެއްވުމަށް ފަހު
ކެބިނެޓް ބައްދަލުވުމެއް ކުރިއަށްދަނީ
މޫސުމަށް އަންނަ ބަދަލު ކުޑަކުރުމަށާއި ދިރޭ ތަކެތީގެ ނަސްލު ހިމާޔަތްކުރުމަށް އެކުލަވާލާފައިވާ ބައިނަލްއަގްވާމީ ދެ މުއާހަދާއެއްގައި ރާއްޖެ ބައިވެރިކުރަން ރައީސުލްޖުމްހޫރިއްޔާ ނިންމަވައިފިއެވެ.
ރާއްޖެއިން އަންގާރަ ދުވަހު ބައިވެރިވާން ނިންމާފައި ވަނީ، "ފްރޭމްވޯކް އެގްރީމެންޓް އޮފް ދަ އެސްޓެބްލިޝްމަންޓް އޮފް ދަ އިންޓަރނޭޝަނަލް ސޯލާ އެލަޔަންސް" (އައިއެސްއޭ) އާއި ދިރޭތަކެތީގެ ނަސްލު ހިމާޔާތްކުރުމާއި، ދެމެހެއްޓެނިވި ގޮތެއްގައި ދިރޭތަކެތީގެ ބައިތަކުގެ ބޭނުން ހިފައި، ޖެނެޓިކްސް ރިސޯސަސް އިންސާފުވެރި ގޮތެއްގައި ބޭނުންކުރުމާ ބެހޭ ގޮތުން އެކުލަވާލާފައިވާ ނަގޯޔާ ޕްރޮޓޮކޯލްގައި ބައިވެރިވުމަށެވެ. ސަރުކާރުން މިގޮތަށް ނިންމާފައި ވަނީ، މިއަދު ބޭއްވެވި ވަޒީރުންގެ މަޖިލީހުގެ ޖަލްސާގައި އެންވަޔަރަމަންޓް މިނިސްޓްރީ ހުށަހެޅި ދެ ކަރުދާހާ ބެހޭ ގޮތުން މަޝްވާރާކުރުމަށް ފަހު ކަމަށް ރައީސް އޮފީހުން ބުންޏެވެ.
ވަޒީރުންގެ މަޖިލީހުގެ މަޝްވަރާގެ މަތިން، މި ދެ އެއްބަސްވުމުގައި ބައިވެރިވުމަށް ރައީސުލްޖުމްހޫރިއްޔާ ނިންމެވުމާ ގުޅިގެން، ގާނޫނުއަސާސީގައިވާ ގޮތުގެ މަތިން މި ދެ މުއާހަދާގައި ބައިވެރިވުމަށްޓަކައި ފުރިހަމަ ކުރަންޖެހޭ ގާނޫނީ އިޖްރާއަތުތައް ފުރިހަމަކުރުމުގެ މަސައްކަތް ކުރިޔަށް ގެންދާނެ ކަމަށް ރައީސް އޮފީހުން މައުލޫމާތުދެއެވެ.
ވަޒީރުންގެ މަޖިލީހުގެ ބައްދަލުވުމެއް ބޭއްވިކަން ރައީސް އޮފީހުން ހާމަކޮށްފައި މި ވަނީ އެތައް ދުވަހެއް ފަހުންނެވެ. ވަޒީރުންގެ މަޖިލީހުގެ ބައްދަލުވުންތައް ނުބާއްވާތީ ސަރުކާރަށް ގިނަ ފާޑުކިޔުންތަކެއް މީގެ ކުރިން ވެސް އަމާޒުވެފައި ވެއެވެ.
