ސަރުކާރު މުވައްޒަފުން އޮފީހުގައި ތިބެ ރީރަޖިސްޓްރީ ކުރުމާ ގުޅޭ ގޮތުން އެއްޗެއް ވިދާޅުވެވޭނީ ގަވައިދު ބެލުމަށް ފަހު: ސީއެސްސީގެ ރައީސް
22 ޖުލައި 2018 | އާދީއްތަ 10:32މުވައްޒަފުންގެ ޝަކުވާއެއް ނުލިބޭ
ސިވިލް ސަރވިސް ކޮމިޝަނުގެ ރައީސް އަލީ ޝަމީމު އަދި ފިނޭންސް މިނިސްޓަރ އަހުމަދު މުނައްވަރު
ރީރަޖިސްޓްރޭޝަންގެ ކަންކަން އޮފީސް ވަގުތުގައި ކުރެވޭކަމާ ގުޅޭ ގޮތުން އެއްޗެއް ވިދާޅުވަން އެނގޭނީ ގަވައިދު ބެލުމަށްފަހުގައި ކަމަށް ސިވިލް ސަރވިސް ކޮމިޝަނުގެ ރައީސް ޑރ އަލީ ޝަމީމް ވިދާޅުވެއްޖެއެވެ.
ރާއްޖެއެމްވީއާ ވާހަކަދައްކަވަމުން ޝަމީމު ވިދާޅުވީ، ރީރަޖިސްޓްރޭޝަންގެ ކަންކަން ކުރުމާއި ސިޔާސީ ޕާޓީތަކާ ގުޅޭ ކަންކަން ރަސްމީ ވަގުތުތަކުގައި އޮފީހުގައި ކުރާ ކަމަށް މުވައްޒަފުންގެ ޝަކުވާތަކެއް ލިބިފައިނުވާ ކަމަށެވެ.
މުވައްޒަފުންގެ މަސައްކަތުގެ ވަގުތުތަކުގައި މިފަދަ ކަންކަން ކުރެވޭނެ ކަމާ މެދު ސުވާލު ކުރެއްވުމުން ޝަމީމު ވިދާޅުވީ ޖެހިވަޑައިގަންނަވާނީ ގަވައިދު ރަނގަޅަށް ބަލާލަން ކަމަށާއި ކުއްލިއަކަށް އެކަމާ ގުޅޭ އެއްޗެއް ހާމަކުރަން ބޭނުން ނުވާ ކަމަށެވެ. ޝަމީމު ވިދާޅުވީ ސިވިލް ސަރވިސްގެ މުވައްޒަފުންނަށް ޕާޓީތަކުގައިވެސް ރަޖިސްޓްރީ ކުރެވޭ ކަމަށާއި ރީރަޖިސްޓްރޭޝަން ފަދަ ކަންކަމާ ގުޅިގެން އެއްޗެއް ވިދާޅުވަން އެނގޭނީ ހުށަހެޅޭ ޝަކުވާއަކާ ގުޅިގެން ކަމަށެވެ. ޝަކުވާއެއް ލިޔުމުން ހުށަހެޅުމުން ސިވިލް ސަރވިސް ކޮމިޝަނުން ގޮތެއް ނިންމާނެ ކަމަށް އޭނާ ވިދާޅުވިއެވެ.
މިކަމާ ގުޅިގެން އެއްޗެއް ވިދާޅުވެވޭނީ ސިވިލް ސަރވިސްގެ ގަވައިދު ބެލުމަށްފަހު ކަމަށް ޝަމީމު ވިދާޅުވެފައިވާ އިރު މިކަމާ ގުޅިގެން ފަހުން ގުޅުމުން ފޯނަށް ޖަވާބު ދެއްވާފައެއް ނުވެއެވެ.
ސިވިލް ސަރވިސް ގަވައިދުގައި ބުނެފައި ވަނީ ސިވިލް ސަރވިސްގެ އެއްވެސް މުވައްޒަފެއް، އެ މުވައްޒަފެއްގެ ރަސްމީގަޑީގައި ވަޒީފާގެ މަސްއޫލިއްޔަތުން ބޭރު އެއްވެސް ކަމެއް ކޮށްގެން ނުވާނެ ކަމަށާއި އަދި ކުރުވައިގެންވެސް ނުވާނޭ ކަމަށެވެ.
މުވައްޒަފުންނަށް އޮފީސް ވަގުތުތަކުގައި ރީރަޖިސްޓްރޭޝަންގެ ކަންކަން ކުރުމަށް މަޖުބޫރު ކުރުމާއި ސިޔާސީ ކެމްޕެއިންގ ހަރަކާތްތަކުގައި އުޅުމަށް ބައެއް އިދާރާތަކުން ގޮވާލަމުންދާ ކަމަށް ސިވިލް ސަރވިސްގެ ގިނަ މުވައްޒަފުންތަކެއް ދަނީ ޝަކުވާ ކުރަމުންނެވެ.
