ޝައިޚް އިލްޔާސް ޖަމާލު ސަރުކާރާމެދު ހިތްހަމަޖެހިވަޑައި ނުގެން އިސްތިއުފާ ދެއްވައިފި
21 ޖުލައި 2018 | ހޮނިހިރު 19:48މިހާރު ވަނީ ރާއްޖެވަޑައިގެންފައި
ޝައިޚް އިލްޔާސް ޖަމާލް: މިހާރު ވަނީ ރާއްޖެ ވަޑައިގެންފައި
ސައޫދީ އަރަބިއްޔާގައި ހުންނަ ދިވެހި އެމްބަސީގައި މަސައްކަތް ކުރައްވާ އައްޝައިޚް އިލްޔާސް ޖަމާލް ސަރުކާރާ މެދު ހިތްހަމަޖެހިވަޑައި ނުގަންނަވާތީ އެވަޒީފާ ދޫކުރައްވައި ރާއްޖެއަށް ވަޑައިގަންނަވައިފިއެވެ.
ބައެއް މީޑިއާތަކުން ކަށަވަރުކޮށްފައިވާ ގޮތުގައި ޝެއިހް އިލްޔާސް ޖަމާލު ރާއްޖެ ވަޑައިގެންފައި ވަނީ މިދިޔަ މަހުގެ ތެރޭގައެވެ. އަދި ޝެއިހް އިލްޔާސް ޖަމާލު އިސްތިއުފާ ދެއްވާފައި ވަނީ ސަރުކާރާ މެދު ހިތްހަމަ ނުޖެހޭތީ ކަން ވެސް ވަނީ ކަށަވަރުވެފައެވެ.
އިލްޔާސް ޖަމާލު ހުންނެވީ ސައުދީ އަރަބިއްޔާގައި ހުންނަ ދިވެހި ރާއްޖޭގެ އެމްބަސީގެ ސެކަންޑް ސެކެރެޓަރީއެއްގެ މަގާމުގައެވެ.
ޝައިޚް އިލްޔާސް ޖަމާލް، ސަރުކާރާމެދު ހިތްހަމަޖެހިވަޑައި ނުގެން މަޤާމް ދޫކުރައްވައި ރާއްޖެ ވަޑައިގެންފައި މި ވަނީ ސިޔާސީ ހަތިޔާރެއްގެ ގޮތުގައި ސަރުކާރުގައި ތިއްބެވި ދީނީ އިލްމުވެރިން ބޭނުން ކުރަމުންދާތީ ގިނަބައެއްގެ ފާޑުކިއުން އަމާޒުވެފައިވާ ދަނޑިވަޅެއްގައެވެ. އެގޮތުން ރައީސް ޔާމީންގެ ރަނިންގ މޭޓެއްގެ ގޮތުގައި ޑރ މުހައްމަދު ޝަހީމް ޢަލީ ސައީދު ކަނޑައަޅުއްވައި ސަރުކާރުން ރާވައިގެން ދީނީ އިލްމުވެރިންގެ ނަމުގައި ސަރުކާރުގެ ވަޒީފާތަކުގައި ތިއްބެވި ދީނީ އިލްމުވެރިންތަކެއް ދެއްވި ޕްރެސް ކޮންފަރެންސެއްގެ ސަބަބުން ގިނަ ބަޔަކު ދަނީ ނުރުހުން ފާޅުކޮށް ފާޑު ކިޔަމުންނެވެ.
