ހުޅުމާލޭގައި ވަޅި ހަރައި ޒަހަމްކޮށްލި މައްސަލައިގައި މިހާތަނަށް މީހަކު ހައްޔަރެއް ނުކުރަން: ޕޮލިސް
21 ޖުލައި 2018 | ހޮނިހިރު 10:30ޒަހަމްވި ޒުވާނާ އެ ހޮސްޕިޓަލަށް ގެންދިޔައީ ހުކުރު ދުވަހުގެ ރޭ 9:30 ހާއިރު
ހުޅުމާލެ ހޮސްޕިޓަލް | ހައުސިންގް ޑިވެލޮޕްމަންޓް ކޯޕޮރޭޝަން
ހުކުރު ދުވަހުގެ ރޭ ހުޅުމާލޭގައި ޒުވާނެއްގެ ގަޔަށް ވަޅި ހަރައި ޒަހަމްކޮށްލި މައްސަލައިގައި މިހާތަނަށް އެއްވެސް މީހަކު ހައްޔަރު ނުކުރާ ކަމަށް ފުލުހުން ބުނެފިއެވެ.
ފުލުހުންގެ މީޑިއާ އޮފިޝަލް ވިދާޅުވީ ހުޅުމާލޭގައި ހުކުރު ދުވަހުގެ ރޭ ޒުވާނެއްގެ ގަޔަށް ވަޅި ހެރި މައްސަލައާ ގުޅިގެން މިހާތަނަށް އެއްވެސް މީހަކު ހައްޔަރުކޮށްފައި ނުވި ނަމަވެސް އެމައްސަލަ ތަހުގީގު ކުރަމުންދާ ކަމަށެވެ. އެ މާރާމާރީއާ ބެހޭ އިތުރު މައުލޫމާތެއް ފުލުހުން އަދި ހާމައެއް ނުކުރެއެވެ.
ހުޅުމާލެ ހޮސްޕިޓަލް ހިންގާ އާސަންދަ ކުންފުނީގެ މީޑިއާ ކޯޑިނޭޓަރ އާޝިއާ ސޯލިހު ވިދާޅުވެފައި ވަނީ ހުޅުމާލޭގައި ހިންގި މާރާމާރީއެއްގައި ޒަހަމްވި ޒުވާނާ އެ ހޮސްޕިޓަލަށް ގެންދިޔައީ ހުކުރު ދުވަހުގެ ރޭ 9:30 ހާއިރު ކަމަށެވެ. އޭނާގެ ގައިގެ ހަތްތަނަކަށް ވަޅި ހަރާފައިވާ ކަމަށް ޑޮކްޓަރުންނާ ހަވާލާދެއްވައި އާޝިޔާ ވިދާޅުވިއެވެ. ޒަހަމްކޮށްލާފައި ވަނީ 24 އަހަރުގެ ޒުވާނެއް ކަމަށާއި އޭނާގެ ހާލު ރަނގަޅުވަމުން އަންނަ ކަމަށް އާޝިއާ ވިދާޅުވެފައި ވެއެވެ.
ހުޅުމާލޭގައި ރޭ ވަޅިން ހަމަލާދީފައިވާ އިރު ބުރާސްފަތި ދުވަހުގެ ރޭ ވެސް މިފަދަ ހާދިސާއެއް ހިނގާފައި ވެއެވެ.
