ވާދަވެރިއަކީ ރައީސް ޔާމީނެއް ނޫން، ވަދާވެރިއަކީ އިލެކްޝަންސް ކޮމިޝަން: އަލީ ނިޔާޒު
އީސީގެ ފަސް މެމްބަރުންގެ ދުއްތުރާތަކުން ސަލާމަތްވާން ޖެހޭ
ޖަގަހަ ހުޅުވުމަށް ފަހު އަލީ ނިޔާޒު ވާހަކަ ދައްކަވަނީ
ރިޔާސީ އިންތިހާބުގައި ގުޅިފައިވާ ސިޔާސީ ޕާޓީތަކުގެ ވާދަވެރިއަކީ ރައީސް ޔާމީން ނޫން ކަމަށާއި ވާދަވެރި ފަރާތަކީ އިލެކްޝަންސް ކޮމިޝަން ކަމަށް އެމްޑީޕީގެ ޗެއަރޕާސަންގެ ނައިބު އަލީ ނިޔާޒު ވިދާޅުވެއްޖެއެވެ.
ބުރާސްފަތި ދުވަހުގެ ރޭ ހުޅުމާލޭގައި "ޖަޒީރާ ރީ ރަޖިސްޓްރޭޝަން" ޖަގަހަ ހުޅުވުމަށް ފަހު ވާހަކަދައްކަވަމުން އަލީ ނިޔާޒު ވިދާޅުވީ އިލެކްޝަންސް ކޮމިޝަންގެ ފަސް މެމްބަރުން މި އިންތިހާބަށް ކުރައްވާ ދުއްތުރާތަކުން ގުޅިފައިވާ ޕާޓީތައް ސަލާމަތްވާން ޖެހޭކަމަށެވެ. ހަގީގަތުގައި މި އިންތިހާބުގައި ވާދަވެރިއަކީ ރައީސް ޔާމީން ނޫން ކަމަށާއި، ވާދަވެރި ފަރާތަކީ އިލެކްޝަންސް ކޮމިޝަން ކަމަށް އަލީ ނިޔާޒު ވިދާޅުވިއެވެ.
"އަޅުގަނޑުމެންގެ މި އިންތިހާބުގެ އެންމެ ބޮޑު ވާދަވެރިއަކީ ރައީސް ޔާމީނެން ނޫން، އެންމެ ބޮޑު ވާދަވެރިއަކީ އިލެކްޝަންސް ކޮމިޝަން، އެބޭފުޅުންގެ ނޮހޮރޮއްޕާނާ ދުއްތުރާއިން ސަލާމަތްވެ އަޅުގަނޑުމެން މި އިންތިހާބު ކާމިޔާބު ކުރަންއެބަޖޭ" ނިޔާޒު ވިދާޅުވިއެވެ.
"ޖަޒީރާ ރީ ރަޖިސްޓްރޭޝަން" ޖަގަހަ ހުޅުމާލޭގައި ރަނިންގ މޭޓް ފައިސަލް ހުޅުއްވައިދެއްވަނީ
ނިޔާޒު ވިދާޅުވީ މިނިވަން އިންސާފުވެރި އިންތިހާބެއް ކަށަވަރުކުރުމަށްޓަކައި އެންމެ ފަހު ވަގުތާއި ހަމައަށް ވެސް ކުރާނެ މަސައްކަތަކީ އެކޮމިޝަން ބަދަލުކުރުމަށް ކުރާ މަސައްކަތް ކަމަށެވެ. އެކަން ގުޅިފައިވާ ސިޔާސީ ޕާޓީތަކުން ކުރާނެ ކަމަށާއި، އިލެކްޝަންސް ކޮމިޝަންގެ މަގާމުތަކަށް ދެން އައްޔަން ކުރާނީ މިނިވަން އިންސާފުވެރި އިންތިހާބެއް ހޯދޭނެ ފަދަ ބޭފުޅުން ކަމަށް ނިޔާޒު ވިދާޅުވިއެވެ.
"މިއަދު އިލެކްޝަންސް ކޮމިޝަނުގެ މަގާމުތަކާއި ހަވާލުވެ ތިއްބެވި ފަސް މެމްބަރުން އެ މާގަމުން ދުރުކޮށް، އަލުން މިނިވަން އިންސާފުވެރި އިންތިހާބެއް ހޯދޭނޭފަދަ ބަޔަކު އެ މާގަމުތަކަށް ގެނެއުން. އިރާދަކުރެއްވިއްޔާ އެކަން އަޅުގަނޑުމެން ކާމިޔާބުކުރާނަން، ގުޅިފައިވާ ޕާޓީތަކުން ކުރާ މަސައްކަތުން މިރާއްޖެއަށް ހަމަޖެހުން ލިބި ފަހި ދުވަސްތަކެއް ފަހިވެގެން ދާނެ،" ނިޔާޒު ވިދާޅުވިއެވެ.
މިވަގުތު އެންމެ އިސްކަމެއް ދޭންވީ ރަށްވެހިފައި ރަށް ނޫން ރަށަކަށް ވޯޓުލާ ރައްޔިތުން ރީރަޖިސްޓްރީ ކުރުންކަން ފާހަގަކުރައްވަމުން ނިޔާޒު ވިދާޅުވީ މިވަގުތު ގުޅިފައިވާ ސިޔާސީ ޕާޓީތަކުން ކުރިއަށް ގެންދާ ހަރާކާތުން، 45 ހާހަށްވުރެ ގިނަ ރައްޔިތުން ގުޅިފައިވާ ޕާޓީތަކުގެ ބެލުމުގެ ދަށުން ރީރަޖިސްޓްރީ ކުރާނެކަމަށެވެ. އެކަން ހާސިލްކުރުމަށް ރާއްޖޭގެ އެކި ކަންކޮޅުތަކުގައި ގާއިމްކޮށްފައިވާ އެމްޑީޕީގެ ޖަހަތަކަށް ރައްޔިތުން އެއްބާރުލުން ދޭނެކަމުގެ ފުރިހަމަ ޔަގީންކަން އެބައޮތް ކަމަށް ނިޔާޒު ވިދާޅުވިއެވެ.
"ޖަޒީރާ ރީރަޖިސްޓްރޭޝަން" ޖަގަހައަކީ ހުޅުމާލޭގައި ދިރިއުޅޭ ރައްޔިތުން ވޯޓު ރީ ރަޖިސްޓްރީ ކުރުމަށް ހާއްސަކޮށްގެން ހުޅުވި ޖަގަހައެކެވެ. މި ޖަގަހަ ހުޅުވި ހަފްލާގައި ގުޅިފައިވާ ސިޔާސީ ޕާޓީތަކުގެ އިސްބޭފުޅުން ބައިވެރިވަޑައިގެންނެވިއެވެ.
