ދަޅަކްގެ ޚާއްސަ ސްކްރީނިންގ އެއް ދައްކާލައިފި

ޖާންވީ ކަޕޫރާއި އިޝާން ކައްތަރު ބޮލީވުޑަށް ތަޢާރަފް ވެގެންދާ ފިލްމް "ދަޅަކް" ހުކުރު ދުވަހު ރިލީޒް ކުރުމަށް ހަމަޖެހިފައިވާއިރު އެ ފިލްމްގެ ޚާއްސަ ސްކްރީނިންއެއް ބޮލީވުޑްގެ ފަންނާނުންނަށް ދައްކާލައިފިއެވެ.

މީޑިއާގައި ދައުރުވަމުންދާ ފޮޓޯތަކުން ފެންނަ ގޮތުގައި ޖާންވީގެ ބައްޕަ ބޯނީ ކަޕޫރާއި ކޮއްކޮ ހުޝީ ކަޕޫރު އަދި އެއްބަފާ ބޭބެ އަރުޖުން ކަޕޫރު މި ސްކްރީނިން އަށް ގޮސްފައި ވަނީ އެއްކޮށެވެ. ޖާންވީ ގޮސްފައި ވަނީ އޭނާގެ އެއްބަފާ ދައްތަ އަންޝުލާ ކަޕޫރާ އެކުގައެވެ.

މި ސްކްރީނަށް ދިޔަ އިތުރު ފަންނާނުންގެ ތެރޭގައި "ދަޅަކް" ގެ ޕްރޮޑިއުސަރ ކަރްނަ ޖޯހަރާއި، އިޝާންގެ އެއްބަނޑު ބޭބެ ޝާހިދު ކަޕޫރާއި އޭނާގެ އަންހެނުން މީރާ ރާޖްޕުތް ހިމެނެއެވެ.

މީގެ އިތުރުން ވެސް ބޮލީވުޑްގެ ތަރިން ކަމަށްވާ ކާރްތިކް އާރްޔަން، މަލައިކާ އަރޯރާ، ކަރިޝްމާ ކަޕޫރު، މާދްރީ ޑިކްސިޓް، ރޭކާ، ސޯހާ އަލީ ޚާން، ކުނާލް ކެއިމޫ، ސޯނާކްޝީ ސިންހާ، ސާރާ އަލީ ހާން އަދި އިޝާން ކުރިން ކުޅެފައިވާ ފިލްމް "ބިޔޯޑް ދަ ކްލައުޑްސް" ގެބަތަލާ މަލާވިކާ މޮހަނަން ހިމެނެވެ.

ޝަޝާންކް ޚައިތަން ޑައިރެކްޓް ކޮށްފައިވާ "ދަޅަކް" މި ފިލްމަކީ މަރާތީ ފިލްމް "ސައިރާތު" އަސްލަކަށް ބަލައިގެން ހަދާފައިވާ ފިލްމެކެވެ.