ރާއްޖެޓީވީގައި ގިނަ ދުވަސްތަކެއް ވަންދެން މަސައްކަތް ކޮށްފައިވާ ނޫސްވެރިޔާ އަހުމަދު ފައިރޫޒް އަލުން ރާއްޖެޓީވީ އާއި ގުޅިއްޖެ އެވެ.
ފައިރޫޒް ރާއްޖެ ޓީވީގެ ވަޒީފާގެ އެއްބސްވުމުގައި ސޮއިކޮށްފައިވަނީ ރާއްޖެ ޓީވީގެ " ފަށާއިރު" ޕްރޮގްރާމުގެ ތެރެއިންނެވެ.
މި އެއްބަސްވުމުގައި ރާއްޖެ ޓީވީގެ ފަރާތުން ސޮއިކުރެއްވީ ރާއްޖެ ޓީވީގެ ޗީފް އޮޕްރޭޓިން އޮފިސަރ ހުސައިން ފިޔާޒް މޫސާ އެވެ.
މި އެއްބަސްވުމުގައި ސޮއިކުރުމަށް ފަހު ފައިރޫޒް ބުނީ މީޑިއާގައި އެންމެ ހިތްހަމަޖެހިގެން އެންމެ ގިނަދުވަހު މަސައްކަތް ކުރެވުނު ސްޓޭޝަނަކީ ރާއްޖެޓީވީ ކަމަށާއި އެންމެ މިނިވަން ކަމާއިއެކު ގަލަން ހިންގަން ލިބުނު ސްޓޭޝަނަކީ ވެސް ރާއްޖެޓީވީ ކަމަށެވެ.
މި ސޮއިކުރުމުގައި ފިޔާޒް ވިދާޅުވީ ފައިރޫޒް އަކީ ވަރަށް ކުޅަދާނަ ނޫސްވެރިއެއް ކަމަށާއި ނޫސްވެރިއެއްގެ ހުރިހާ ޝަރުތެއް ހަމަވާ ނޫސްވެރިއެއް ކަމަށެވެ.
އަދި ކުރިއަށް އޮތް ރިޔާސީ އިންތިޚާބުގައި ފައިރޫޒްގެ މަސައްކަތް އެންމެ ފުރިހަމައަށް ރާއްޖެ ޓީވީން ފެނިގެންދާނެ ކަމަށް އުއްމީދު ކުރައްވާކަމަށް ފިޔާޒް ވިދާޅުވިއެވެ.
2008 ވަނަ އަހަރުން ފެށިގެން މީޑިއާގައި މަސައްކަތް ކުރާ ފައިރޫޒް އަކީ ރާއްޖޭ ޓީވީގައި ޚަބަރު ލިޔުމުގެ އިތުރުން ސިޔާސީ ގިނަ ޕްރޮގްރާމުތަކެއް ހުށަހަޅާ ނޫސްވެރި އެކެވެ.
