އީސީގެ ނިންމުން ބަދަލުކޮށް، ރިސޯޓްތަކުގެ މުވައްޒަފުންނަށް ވޯޓް ލެވޭނެގޮތް ހެދުމަށް ޓްރާންސްޕޭރަންސީން ގޮވާލައިފި
މިވަގުތު 132 ރިސޯޓް އެބައޮތް، އެކަމަކު ވޯޓް ފޮށި ބަހައްޓަނީ އެންމެ 7 ރިސޯޓްގައި
ޓްރާންސްޕޭރަންސީ މޯލްޑިވްސްގެ ބައްދަލުވުމެއްގެ ތެރެއިން
ރާއްޖޭގައި މިވަގުތު 132 ރިސޯޓް އޮތްއިރު އެންމެ ހަތް ރިސޯޓްގައި ވޯޓް ފޮށި ބަހައްޓަން އިލެކްޝަންސް ކޮމިޝަނުން ނިންމި ނިންމުން ބަދަލުކޮށް، ރިސޯޓްތަކުގެ މުވައްޒަފުންނަށް ވޯޓް ލެވޭނެ ގޮތް ހެެދުމަށް ޓްރާންޕޭރަންސީ މޯލްޑިވްސް އިން ގޮވާލައިފި އެވެ. ޓްރާންސްޕޭރެންސީން ނެރެފައިވާ ބަޔާނެއްގައި ބުނެފައި ވަނީ 132 ރިސޯޓުގެ ތެރެއިން އެންމެ ހަތް ރިސޯޓްގައި ވޯޓް ފޮށި ބަހައްޓަން ނިންމި ނިންމުމަކީ ރިސޯޓްތަކުގައި މަސައްކަތްކުރާ ގިނަ ފަރާތްތަކަށް ލިބިގެންވާ ވޯޓް ލުމުގެ ހައްގަށް އުނިކަން އަންނަގޮތަށް ނިންމާފައިވާ ނިންމުމެއް ކަމަށެވެ.
ޓްރާންސްޕޭރަންސީން ބުނީ ރާއްޖޭގައި ވަޒީފާ އަދާކުރަމުންދާ އާބާދީގެ 14 އިންސައްތަ މީހުންނަކީ ރާއްޖޭގައި ހިންގާ 132 ރިސޯޓުގައި ވަޒީފާ އަދާ ކުރަމުންދާ މީހުން ކަމަށެވެ. އެ ގޮތުން ރިސޯޓް ތަކުގައި ގާތްގަނޑަކަށް 27،837 ދިވެހިން މަސައްކަތް ކުރަމުން އަންނަކަމަށް އެ ޖަމިއްޔާއިން ބުނެއެވެ.
މީގެއިތުރުން ޓްރާންސްޕޭރަންސީ ބުނީ 2013 ވަނަ އަހަރު ބޭއްވި ރިޔާސީ އިންތިހާބުގައި ރާއްޖޭގެ 56 ރިސޯޓުގައި ވޯޓު ފޮށި ބަހައްޓާފައިވާ ކަމަށާއި މި އަހަރުގެ ރިޔާސީ އިންތިހާބުގައި އެންމެ ހަތް ރިސޯޓުގައި ވޯޓު ފޮށި ބެހެއްޓުމަށް ނިންމުމަކީ ވަރަށް ބޮޑަށް ކަންބޮޑުވާކަމެއް ކަމަށެވެ. އަދި މިއީ އެންމެންނަށް ބައިވެރިވެވޭނެ މިނިވަން އިންސާފުވެރި އިންތިހާބެއް ބޭއްވުމާ ދުރަށް އެޅުނު ފިޔަވަޅެއް ކަމަށް ވެސް ޓްރާންސްޕޭރެންސީން ނެރުނު ބަޔާނުގައި ވެއެވެ.
