މަސްވެރިން ބާނާ ރީނދޫ އުރަހަ ކަންނެލި ގަންނާނެ އެންމެ ދަށް އަގު ކަނޑައަޅުއްވާނެ ކަމަށާއި މަސްވެރިންނަށް ހާއްސަކޮށް ކާޑެއް ތައްޔާރު ކޮށްދެއްވާނެ ކަމަށް ރައީސުލްޖުމްހޫރިއްޔާ އަބްދުﷲ ޔާމީން ވިދާޅުވެއްޖެއެވެ.
ހއ. ހޯރަފުއްޓަށް ވަޑައިގެން، އެ ރަށުގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުން ރައީސް ޔާމީން ވިދާޅުވީ ރިޔާސީ އިންތިހާބަށް ޕީޕީއެމުން ރައްޔިތުންނަށް ހުށަހަޅާ މެނިފެސްޓޯގައި ރީނދޫ އުރަހަ ކަންނެލި ގަތުމަށް ކަނޑައަޅާ އަގަށް ވުރެ ދަށް އަގެއްގައި މަސް ގަތުމުގެ ހުއްދައެއް ނޯންނާނެ ކަމަށެވެ.
"އަޅުގަނޑުމެންގެ ސަރުކާރެއްގައި އަޅުގަނޑުމެން މިހާރު ނިންމައިފިން ރީނދޫ އުރަހަ ކަންނެލި އެންމެ ދަށްވެގެން ގަންނާނެ އަގު އަޅުގަނޑުމެން ކަނޑައަޅާނަން. އެއަށްވުރެ ދަށް އަގެއްގައި ގަންނާކަށް ހުއްދައެއް ނޯންނާނެ،" ރައީސް ޔާމީން ވިދާޅުވިއެވެ.
ފިޝަމެންސް އައިޑީކާޑެއް ތައާރަފް ކޮށްދެއްވާނެ ކަމަށާއި އެ އައިޑީކާޑު ބޭނުންކޮށްގެން، އާންމު ހިދުމަތްތައް ފަސޭހައިން މަސްވެރިންނަށް ހޯދޭނެ ކަމަށް ރައީސް ޔާމީން ވިދާޅުވިއެވެ.
ރީނދޫ އުރަހަ ކަންނެލީގެ ގަނެވޭނެ އެންމެ ދަށް އަގު ކަނޑައަޅުއްވާނެ ކަމަށް ރައީސް ޔާމީން ވައުދު ވެވަޑައިގެންނެވިއިރު، ރައީސް މުހައްމަދު ނަޝީދުގެ ސަރުކާރުން ފެށިގެން މަސް ގަންނަމުން ދިޔަ އަގު ދަށް ކުރެއްވީ ޕީޕީއެމްގެ ސަރުކާރުންނެވެ.
ޕީޕީއެމްގެ ސަރުކާރުން 20 ރަށެއްގެ ބިން ހިއްކައި، އިތުރުކޮށް ދެއްވާފައިވާ ކަމަށް ވިދާޅުވެ، ރައީސް ޔާމީން ވިދާޅުވީ ހއ. ހޯރަފުށްޓަށް 4،000 ހެކްޓަރުގެ ބިން އިތުރު ކުރެވިދާނެ ކަމަށެވެ. އެ ވަރަށް ބިން އިތުރު ކުރެވޭނީ ހޯރަފުށީ ފަޅު ހިއްކައިގެން ކަމަށް ރައީސް ޔާމީން ވިދާޅުވިއެވެ.
ރައީސް ޔާމީން ތިލަދުއްމައްޗަށް ކުރައްވާ ދަތުރުފުޅުގައި ހޯރަފުށްޓަށް ވަޑައިގެން އެ ރަށުގެ ރަށުގެ ގޮނޑުދޮށް ހިމާޔަތް ކުރުމަށް ކުރިއަށް ގެންދިޔަ މަޝްރޫއުގެ ނިމުން އިފްތިތާހު ކޮށްދެއްވާފައިވެއެވެ. އެ މަޝްރޫއަކީ 20.9 މިލިއަން ރުފިޔާ ހަރަދުކޮށްގެން ކުރިއަށް ގެންދިޔަ މަޝްރޫއެކެވެ.
