އޯޕެކް ފަންޑުން ތަރައްގީގެ މަޝްރޫއުތަކަށް 40 މިލިއަން ޑޮލަރު ދޭން ނިންމައިފި
17 ޖުލައި 2018 | އަންގާރަ 16:18ލުއި ލޯނުގެ ދަށުން ތަރައްގީގެ މަޝްރޫއުތައް ހިންގުމަށް ހަމަޖެހިފައި ވަނީ ތިން ދާއިރާއަކުން
އެންވަޔަރަންމަންޓް މިނިސްޓްރީގައި ބޭއްވި ނޫސްވެރިންގެ ބައްދަލުވުމުގެ ތެރެއިން
ރާއްޖޭގެ ތަރައްގީގެ މަޝްރޫއުތަކަށް އޯޕެކް ފަންޑުން 40 މިލިއަން ޑޮލަރު (616 މިލިއަން ރުފިޔާ) ދޭން ހަމަޖެހިއްޖެއެވެ.
އެންވަޔަރުމަންޓް މިނިސްޓްރީން ބުނީ މި ކޮންސެޝަނަލް (ލުއި) ލޯނުގެ ދަށުން ތަރައްގީގެ މަޝްރޫއުތައް ހިންގުމަށް ހަމަޖެހިފައި ވަނީ ތިން ދާއިރާއަކުން ކަމަށެވެ.
އެގޮތުން ނަރުދަމާގެ ނިޒާމު ގާއިމުކުރުމަށާއި، ބަނދަރު ހެދުމަށާއި އެއަރޕޯޓު އެޅުމަށް ހަތަރު ޕެކޭޖަކަށް ބަހާލައިގެން މަޝްރޫއުތައް ކުރިއަށް ގެންދިއުމަށް ހަމަޖެހިފައިވާ ކަމަށް މިނިސްޓްރީން މައުލޫމާތުދެއެވެ.
އެންވަޔަރުމެންޓް މިނިސްޓްރީން ބުނީ ޕެކޭޖު އެކެއްގައި ހދ. އަދި ށ. އަތޮޅުގެ ރަށްރަށަށް އަމާޒުކުރެވިގެން ކުރިއަށް ގެންދާ ކަމަށާއި މި ޕެކޭޖުގެ ތެރެއިން ހދ. ނެއްލައިދޫ، ހދ. ނޭކުރެންދޫ، ހދ. މަކުނުދޫ އަދި ށ. ފޭދޫ ގެ ނަރުދަމާގެ ނިޒާމު ގާއިމުކުރުމާއި، ށ. މަރޮށީގެ ގޮނޑުދޮށް ހިމާޔަތްކުރުން ހިމެނޭ ކަމަށެވެ.
ފެކޭޖު ދޭއްގައި ގއ، ގދ. އަދި ސ. އަތޮޅުގެ ރަށްރަށުގެ ތެރެއިން ގދ. ވާދޫ، ގދ. ފިޔޯރީ ގެ ނަރުދަމާ ގާއިމުކުރުމާއި އަދި ގދ. ކޮލަމާފުށި، ގދ. ހޯޑެއްދޫ އަދި ސ. މަރަދޫ ފޭދޫ ގެ ބަނދަރު ހެދުމާއި ސ. މީދޫ ގެ ގޮނޑުދޮށް ހިމާޔަތްކުރުން ހިމެނޭ ކަމަށް އެމިނިސްޓްރީން މައުލޫމާތުދެއެވެ.
މީގެ އިތުރުން ބ. އަތޮޅުގެ ރަށްރަށަށް އަމާޒުކުރެވިގެން އެންވަޔަރުމެންޓް މިނިސްޓްރީން ހިންގާ ތިން ވަނަ ޕެކޭޖުގެ ދަށުން، ބ. ކުޑަރިކިލާއި ބ. ދޮންފަނާއި، ބ. ކިހާދޫ ބަނދަރުހެދުމާއި އަދި ބ، ދަރަވަންދޫ ބ. ކެންދޫ ނަރުދަމާގެ ނިޒާމު ގާއިމުކުރުން ހިމެނޭ ކަމަށެވެ.
ޕެކޭޖް ހަތަރަކުން ފ. އަތޮޅަށް އަމާޒުކޮށްގެން ހިންގާ އިރު ފ، ނިލަންދޫ އެއަރޕޯޓު އެޅުން ހިމެނޭ ކަމަށް އެންވަޔަރުމެންޓް މިނިސްޓްރީން މައުލޫމާތުދެއެވެ.
