ފުލުހުންގެ ޚިދުމަތާ އަލަށް ގުޅުނު 43 ފުލުހަކު ހުވާކޮށްފި
17 ޖުލައި 2018 | އަންގާރަ 05:57ފުލުހުންގެ ޒިންމާ އަދާކުރުމަށް ފަސްނުޖެހި ސާބިތުކަމާ އެކުގައި ހިދުމަތް ކުރުމަށް ގޮވައިލެއްވި
އަލަށް ގުޅުނު ފުލުހުންނަށް ހުވާލައިދިނުމުގެ ރަސްމިއްޔާތުގެ ތެރެއިން ހައިކޯޓުގެ ފަނޑިޔާރު މުހައްމަދު ނިޔާޒު
ފުލުހުންގެ ހިދުމަތާ އަލަށް ގުޅުނު 43 ފުލުހުން ހުވާކޮށްފިއެވެ.
އިސްކަންދަރު ބިލްޑިންގގައި ހޯމަ ދުވަހު ބޭއްވި ހާއްސަ ރަސްމިއްޔާތުގައި ފުލުހުންނަށް ހުވާ ލައިދެއްވީ ފަނޑިޔާރު ނިޔާޒު އެވެ. އެއީ 31 ފުލުހުންނާއި ސްޕެޝަލް ކޮންސްޓަބިއުލަރީ 12 ފުލުހެކެވެ.
މި ރަސްމިއްޔާތުގައި ވާހަކަ ދައްކަވަމުން ހައިކޯޓުގެ ފަނޑިޔާރު މުހައްމަދު ނިޔާޒު ވަނީ ފުލުހުންގެ ޒިންމާ އަދާކުރުމަށް ފަސްނުޖެހި ސާބިތުކަމާ އެކުގައި ހިދުމަތް ކުރުމަށް ގޮވާލައްވާފައެވެ.
ފަނޑިޔާރު ނިޔާޒް ވިދާޅުވީ ފުލުހުންގެ ހުވަޔަކީ ވަރަށް އަގުހުރި އެއްޗެއް ކަމަށާއި މާތް ﷲ ގަންދީ ހުވާކޮށްގެން ހުރެ ހުވަޔާއި ހިލާފުވެއްޖެ ނަމަ އެކަމުގެ އުޤޫބާތު އެމީހަކަށް ލިބިގެންދާނެ ކަމަށެވެ. އަދި ފުލުހުންގެ ތެރޭގައި ހެދިފައިވާ އެންމެހާ ގަވާއިދުތަކަށް ބޯލެނބުމަށާއި، ފުލުހުންގެ ޒިންމާ އަދާކުރުމަށް ފަސްނުޖެހި ސާބިތުކަމާ އެކުގައި ހިދުމަތް ކުރުމަށް ފަނޑިޔާރު ގޮވާލެއްވިއެވެ.
އަލަށް ގުޅުނު ފުލުހުންނަށް ހުވާލައި ދިނުމުގެ ރަސްމިއްޔާތުގެ ތެރެއިން
މި ރަސްމިއްޔާތުގައި ސްޓާފް ވެލްފެއަރ އެންޑް ފައިނޭންސް މެނޭޖްމެންޓުގެ ހެޑް ޗީފް ސްޕްރިންޓެންޑެންޓް އޮފް ޕޮލިސް އާސިމް އަބްދުﷲ އާއި ހިއުމަން ރިސޯސް ޑިޕާޓްމަންޓުގެ ވެރިންނާއި މުވައްޒަފުން ބައިވެރިވެފައިވެއެވެ.
