ހަތް ރިސޯޓުގައި ވޯޓުފޮށި ބަހައްޓާފަ، ވޯޓުލުގެ ޙައްގު ނިގުޅައިގަންނަން އެ މަސައްކަތް ކުރަނީ: މާރިޔާ

މި އަހަރުގެ ރިޔާސީ އިންތިހާބުގައި އެންމެ ހަތް ރިސޯޓުގައި ވޯޓު ފޮށި ބަހައްޓަން އިލެކްޝަން ކޮމިޝަނުން ނިންމުމާއި ގުޅިގެން އެއީ ވޯޓުލުމުގެ ހައްގު ނިގުޅައިގަތުމަށް ކުރާ ކަމެއް ކަމަށް އެމްޑީގެ ރިޔާސީ ކެމްޕެއިންގެ ތަރުޖަމާން ރައްޔިތުންގެ މަޖިލީހުގެ މައްޗަން ގޯޅި އުތުރު ދާއިރާގެ މެމްބަރު މާރިޔާ އަހުމަދު ދީދީ ވިދާޅުވެއްޖެއެވެ.

ހޯމަ ދުވަހު ސޯލްޓު ކެފޭގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން މާރިޔާ ވިދާޅުވީ ދިވެހިން އެތައް ބައިވަރު ރިސޯޓުތަކެއްގައި ވަޒީފާ އަދާކުރަމުން އަންނައިރު، އިންތިހާބުގައި ވޯޓުލުމަށް، އެންމެ ހަތް ރިސޯޓުގައި ވޯޓު ފޮށި ބަހައްޓަން ނިންމުމަކީ ކަންބޮޑުވާ ކަމެއް ކަމަށެވެ. މިއަދު މި ފެންނަނީ ރިސޯޓުތަކުގައި މަސއްކަތް ކުރާ މުވައްޒިފުންނަން ވޯޓުލުމުގެ ޙައްގު ރައީސް ޔާމީންގެ ސަރުކާރުން ނިގުޅައި އިގަންނަމުންދާތަން ކަމަށް މާރިޔާ ވިދާޅުވިއެވެ.

އިންތިޚާބުގައި ޖުމްލަ 452 ވޯޓު ފޮށި ބަހައްޓާއިރު، އޭގެ ތެރޭގައި ހިމެނެނީ އެންމެ ހަތް ރިސޯޓެވެ. އެއީ ދަ ސަން ސިޔާމް އިރުފުށި މޯލްޑިވްސް އާއި، ކޮންރަޑް މޯލްޑިވްސް ރަންގަލި އައިލެންޑާއި، ބަނޑޮސް މޯލްޑިވްސް އާއި، ކުރަމަތި އައިލެންޑް ރިސޯޓާއި، ޕެރެޑައިސް އައިލެންޑް ރިސޯޓާއި، ސަން އައިލެންޑް ރިސޯޓާއި، ކުރެއްދޫ އައިލެންޑް ރިސޯޓު ކަމަށް މާރިޔާ ވިދާޅުވިއެވެ.

މާރިޔާ ވިދާޅުވި ގޮތުގައި 2013ގެ ރިޔާސީ އިންތިޚާބުގައި 43 ރިސޯޓެއްގައި ވޯޓު ފޮށި ބަހައްޓާފައިވެއެވެ، އެ އަދަދު ހަތަކަށް ތިރިކޮށްލުމުން ވޯޓުފޮށި ބެހެއްޓުމުގައި، އެއްވެސް އަސާސެއް ނެތް ކަމަށް މާރިޔާ ވިދާޅުވިއެވެ. އަދި އެހެން ރިސޯޓުތަކުގައި 250 އަށް ވުރެ ގިނަ މީހުން ވޯޓުލުމަށް ރަޖިސްޓްރީ ކުރުމުން ވެސް އިތުރު ފޮއްޓެއް ބަހައްޓާނެ ކަމަށް އިލެކްޝަން ކޮމިޝަނުން ބުނެފައި ނެތް ކަމަށް މާރިޔާ ވިދާޅުވިއެވެ.

މީގެ އިތުރުން 2013 ވަނަ އަހަރުގެ ރިޔާސީ އިންތިހާބުގައި ރާއްޖެއިން ބޭރުގައި ފަސް ވޯޓު ފޮށި ބައްހައްޓާފައި ވާއިރު، މި އިންތިހާބުގައި ބަހައްޓަން ނިންމާފައި ވަނީ ހަތަރު ވޯޓުފޮށި ކަމަށް ވެސް މާރިޔާ ވިދާޅުވިއެވެ. މި އިންތިހާބުގައި ސިންގަޕޫރުގައި ވޯޓު ފޮށި ނުބަހައްޓަން ނިންމާފައިވާއިރު، ސްރީލަންކާއާއި، އިނގެރޭސި ވިލާތާއި، މެލޭސިޔާ އާއި، އިންޑިޔާގައި ފޮށި ބަހައްޓަން ހަމަޖެހިފައިވާ ކަމަށް މާރިޔާ ވިދާޅުވިއެވެ.

އެގޮތުން ސްރީލަންކާގައި ދެ ވޯޓު ފޮއްޓެއް ބަހައްޓަން އިލްކެޝަން ކޮމިޝަނުން ނިންމާފައި ވާއިރު، އެއްފޮޓަށް ވޯޓު ލެވެނީ ސިޓީތަކަށް ނިސްބަތްވާ ރައްޔިތުން ކަމަށާއި، އަނެއް ފޮއްޓަށް ވޯޓު ލެވެނީ އަތޮޅުތެރެއަށް ނިސްބަތްވާ ރައްޔިތުން ކަމަށް އެކޮމިޝަނުން ބުނެފައި ވާތީ ކަންބޮޑުވާ ކަމަށް ވެސް ވިދާޅުވިއެވެ. މީގެ ކުރިން ރާއްޖެއިން ބޭރުގައި ބަހައްޓާ ވޯޓު ފޮށިތަކަށް އަތޮޅުތެރެ އާއި ސިޓީތައް ވަކިކޮށްފައި ނުވާ ކަމަށް މާރިޔާ ފާހަގަ ކުރެއްވިއެވެ.