ޑަބަލް ޓެކްސް އެވޮއިޑަންސް އެއްބަސްވުމުގެ މަޝްވަރާގެ ފުރަތަމަ ބުރު ނިމިއްޖެ
އެއްބަސްވުމުގެ މަޝްވަރާތައް މި މަހުގެ 9 ދުވަހުން 12 އަށް ކުރިއަށް ގެންގޮސްފައިވޭ
ޑަބަލް ޓެކްސް އެވޮއިޑަންސް އެއްބަސްވުމުގެ މަޝްވަރާގެ ތެރެއިން
ރާއްޖެ އާއި ސިންގަޕޫރާ ދެމެދު "ޑަބަލް ޓެކްސް އެވޮއިޑަންސް" އެއްބަސްވުމެއް އެކުލަވައިލުމާ ބެހޭ މަޝްވަރާތަކުގެ ފުރަތަމަ ބުރު ބުރާސްފަތި ދުވަހު ނިންމާލައިފިއެވެ.
މި އެއްބަސްވުމުގެ މަޝްވަރާތައް މި މަހުގެ 9 ދުވަހުން 12 އަށް ކުރިއަށް ގެންގޮސްފައިވާ އިރު ރާއްޖޭގެ ފަރާތުން ބައިވެރިވެވަޑައިގެންނެވީ ޑެޕިއުޓީ ކޮމިޝަނަރ އޮފް ޓެކްސޭޝަން ހަސަން ޒަރީރެވެ. އަދި ސިންގަޕޫރު ތަމްސީލްކޮށްފައި ވަނީ އިންލޭންޑް ރެވެނިއު އޮތޯރިޓީ އޮފް ސިންގަޕޯއިންނެވެ. ސިންގަޕޫރުގެ ވަފުދުގެ ވެރިއަކީ ޑެޕިއުޓީ ކޮމިޝަނަރ ޗިއާ-ޓަރން ހުއޭ މިންނެވެ.
"ޑަބަލް ޓެކްސް އެވޮއިޑަންސް" އެއްބަސްވުން އެކުލަވާލުމުން ދެ ޤައުމުގެ ވިޔަފާރީތަކުގެ މެދުގައި ކުރެވޭ މުއާމަލާތްތަކުން އެއް އާމްދަނީއަކުން ދެ ފަހަރަށް ޓެކްސް ކުރުން ހުއްޓުމަކަށް އައިސް، ދެ ޤައުމުގެ މެދުގައި ޓެކުހާ ގުޅޭ މައުލޫމާތުތައް ބަދަލުކުރުމަށް މަގު ފަހިވެގެންދާނެ ކަމަށް މޯލްޑިވްސް އިންލޭންޑް ރެވެނިއު އޮތޯރިޓީ (މީރާ) އިން ބުންޏެވެ.
