ސުޕްރީމް ކޯޓުގެ ހުކުމަކުން ޙައްގަކަށް އުނިކަން ލިބޭނަމަ ފެންނަ ނުފެންނަ ވޯޓަކަށް ދާންޖެހޭ: ފައްޔާޒު
8 ޖުލައި 2018 | އާދީއްތަ 18:20ދާންޖެހެނީ ރައްޔިތުންގެ ފެންނަ ނުފެންނަ ވޯޓަކަށް
ގަމު ދާއިރާގެ ރައްޔިތުންގެ މަޖިލީހުގެ މެމްބަރު ފައްޔާޒު އިސްމާއިލް
ސުޕްރީމް ކޯޓުގެ ހުކުމެއް ތިން މަހަށް ވުރެ ގިނަ ދުވަހު ދެމި އޮންނަނަމަ އެކަމުގައި ރައްޔިތުންނަން ފެންނަ ނުފެންނަ ވޯޓަކަށް ދާންޖެހޭ ކަމަށް ރައްޔިތުންގެ މަޖިލީހުގެ ގަމު ދާއިރާގެ މެމްބަރު ފައްޔާޒު އިސްމާއިލް ވިދާޅުވެއްޖެއެވެ.
"މަ އެދޭ ދައުލަތެއްގައި" ނަމުގައި އާދީއްތަ ދުވަހު ފައްޔާޒުގެ ހިޔާލެއްގެ ގޮތުގައި ކުރައްވާފައިވާ ޓްވީޓެއްގައި ވިދާޅުވީ ރައްޔިތުންގެ އަސާސީ ޙައްގަކަށް އުނިކަން ލިބޭ ގާނޫނެއް ނުވަތަ ޙައްގެއްގެ މަފުހޫމަކަށް އުނިކަން ލިބޭ ސުޕްރީމް ކޯޓުގެ ހުކުމެއް ތިން މަހަށް ވުރެ ގިނަ ދުވަހަށް ދެމި އޮންނަނަމަ އެކަމުގައި ރައްޔިތުންނަން ފެންނަ ނުފެންނަ ވޯޓަކަށް ދާންޖެހޭ ކަމަށެވެ.
މީގެ އިތުރުން ވެސް "މަ އެދޭ ދައުލަތެއްގައި" ނަމުގައި ފައްޔާޒު ގެންދަވަނީ އެކިކަންކަމުގައި އެނާ ދެކެވަޑައިގަންނަވާ ގޮތް ޓްވީޓު ކުރައްވަމުނެވެ. ފައްޔާޒު ކުރައްވާފައިވާ އެހެން ޓްވީޓެއްގައި ވިދާޅުވެފައި ވަނީ ޕްރިޒަންސް އޮތޯރިޓީ އަކީ މިނިވަން މުވައްސަސާއަކަށް ވާންވާނެ ކަމަށެވެ. އަދި އެތަނުގެ ގައިދީންގެ އަސާސީ ޙައްގުތަށް ހިމާޔަތް ކުރުމުގެ ފުރިހަމަ ޒިންމާ އުފުލަންވާނެކަން ފާހަގަކުރައްވަމުން ފައްޔާޒު ވިދާޅުވީ ހިއުމަން ރައިޓްސް ކޮމިޝަންގެ މައްޗަށް އެކަން ކަށަވަރުކުރުމަށް ލާޒިމްވާނެކަމަށެވެ.
